നിയന്ത്രണംവിട്ട കാര്‍ റെയില്‍വേ ഗേറ്റിലിടിച്ചു; ഗേറ്റിന്റെ ലോക്കിംഗ് സംവിധാനം തകര്‍ന്നതിനെ തുടര്‍ന്ന് മണിക്കൂറുകളോളം ഗതാഗതം തടസപ്പെട്ടു

തൃക്കരിപ്പൂര്‍: (www.kasargodvartha.com 24.07.2019) നിയന്ത്രണംവിട്ട കാര്‍ റെയില്‍വേ ഗേറ്റിലിടിച്ചു. ഗേറ്റിന്റെ ലോക്കിംഗ് സംവിധാനം തകര്‍ന്നതിനെ തുടര്‍ന്ന് മണിക്കൂറുകളോളം ഗതാഗതം തടസപ്പെട്ടു. ബീരിച്ചേരി റെയില്‍വേ ഗേറ്റാണ് തകര്‍ന്നത്. തിങ്കളാഴ്ച രാത്രി 11 മണിയോടെയാണ് അപകടമുണ്ടായത്.

പയ്യന്നൂരില്‍ നിന്ന് തൃക്കരിപ്പൂര്‍ ഭാഗത്തേക്ക് പോവുകയായിരുന്ന കാര്‍ നിയന്ത്രണംവിട്ട് റെയില്‍വേ ഗേറ്റിലിടിക്കുകയായിരുന്നു. ഇടിയുടെ ആഘാതത്തില്‍ ഗേറ്റിന്റെ ലോക്കിംഗ് സംവിധാനം തകരാറിലായി. ഇതോടെ ഇതുവഴിയുള്ള ഗതാഗതം തടസപ്പെടുകയും വാഹനങ്ങള്‍ രാമവില്യം ഗേറ്റ് വഴി തിരിച്ചുവിടുകയും ചെയ്തു.

ചൊവ്വാഴ്ച രാവിലെ ജീവനക്കാരെത്തിയ ശേഷമാണ് ഗേറ്റിന്റെ തകരാര്‍ പരിഹരിച്ചത്. തുടര്‍ന്ന് ഉച്ചയ്ക്ക് രണ്ടുമണിയോടെ ഗതാഗതം പുനഃസ്ഥാപിക്കുകയായിരുന്നു.