നിയന്ത്രണം വിട്ട കാര്‍ പള്ളിയുടെ മുകളിലേക്ക് മറിഞ്ഞു; ചുമരുകള്‍ക്ക് കേടുപാട് സംഭവിച്ചു, ഡ്രൈവര്‍ രക്ഷപ്പെട്ടു

By Web Desk SUDec 6, 2017, 16:52 IST

ചെര്‍ക്കള:(www.kasargodvartha.com 06/12/2017) നിയന്ത്രണം വിട്ട കാര്‍ പള്ളിയുടെ മുകളിലേക്ക് മറിഞ്ഞ് ചുമരുകള്‍ക്ക് കേടുപാട് സംഭവിച്ചു. ചൊവ്വാഴ്ച രാത്രി 11 മണിയോടെ ചെര്‍ക്കള ചൂരിമൂല മുഹ്യുദ്ദീന്‍ ജുമാ മസ്ജിദിന് മുകളിലേക്കാണ് കാര്‍ മറിഞ്ഞത്. ഡ്രൈവര്‍ മദ്യപിച്ചിരുന്നുവെന്നും കാര്‍ അമിത വേഗതയിലായിരുന്നുവെന്നും പറയുന്നു. അപകടത്തില്‍ ഡ്രൈവര്‍ക്ക് നിസാരമായി പരിക്കേറ്റു. കോഴിക്കോട് ജവഹര്‍ നഗര്‍ കോളനിയിലെ റെനില്‍ ശേഖറിനാണ് പരിക്കേറ്റത്.

മംഗളൂരുവില്‍ നിന്നും കോഴിക്കോട്ടേക്ക് പോവുന്നതിനിടെ വഴി തെറ്റിവന്ന കാര്‍ ആണ് അപകടത്തില്‍ പെട്ടത്. സുഹൃത്ത് കോട്ടക്കല്‍ സ്വദേശി ഹമീദിനോടൊപ്പമാണ് റെനില്‍ മംഗളൂരുവില്‍ നിന്നും പുറപ്പെട്ടത്. കോഴിക്കോട്ട് നിന്ന് കോട്ടക്കല്ലിലേക്ക് ഏറെ ദൂരമുള്ളതിനാല്‍ കാസര്‍കോട് ഇറങ്ങി ബസില്‍ പോകാന്‍ ഹമീദ് തീരുമാനിച്ചു. ഹമീദിനെ കാസര്‍കോട്ട് ഇറക്കി റെനില്‍ ശേഖര്‍ കോഴിക്കോട്ടേക്ക് യാത്ര തുടരുകയായിരുന്നു.

നിയന്ത്രണം വിട്ട കാര്‍ പള്ളിയുടെ മുകളിലേക്ക് മറിഞ്ഞു; ചുമരുകള്‍ക്ക് കേടുപാട് സംഭവിച്ചു, ഡ്രൈവര്‍ രക്ഷപ്പെട്ടു

ചെര്‍ക്കളയിലെത്തിയപ്പോള്‍ വഴിതെറ്റി ബദിയഡുക്ക റോഡിലൂടെ പോവുകയായിരുന്നു. ചൂരിമൂല വളവിലെത്തിയപ്പോള്‍ നിയന്ത്രണം വിടുകയും ചൂരിമൂല മുഹ്യുദ്ദീന്‍ ജുമാമസ്ജിദിന്റെ ചുമരിലിടിച്ച് സ്‌കോര്‍പിയോ മറിയുകയുമായിരുന്നു. പള്ളിയിലെ എയര്‍കണ്ടീഷന് തകരാര്‍ സംഭവിക്കുകയും വാതിലിനോട് ചേര്‍ന്ന് അകത്തും പുറത്തും മതിലിന്റെ തേപ്പു പാളി അടര്‍ന്നുവീഴുകയും ചെയ്തു.

വിവരമറിഞ്ഞ് വിദ്യാനഗര്‍ സിഐ ബാബു പെരിങ്ങേത്തും സംഘവും സ്ഥലത്തെത്തിയിരുന്നു. പോലീസ് ആശുപത്രിയിലേക്ക് കൊണ്ടുപോകാമെന്ന് പറഞ്ഞെങ്കിലും തനിക്ക് പരിക്കൊന്നുമില്ലെന്ന് റെനില്‍ ശേഖര്‍ പറഞ്ഞു. അപകടവിവരമറിഞ്ഞ് കാസര്‍കോട്ട് നിന്ന് യാത്ര പുറപ്പെട്ട സുഹൃത്ത് കോട്ടക്കല്‍ സ്വദേശി ഹമീദ് തിരികെ വന്നു.