Public Announcement | കാസർകോട്ട് സ്ഥിരം എക്സ്പോ ഗ്രൗണ്ട്, അനന്തപുരം വ്യവസായ കേന്ദ്രത്തിലേക്ക് ബസ് സർവീസ്; പ്രഖ്യാപനങ്ങളുമായി കലക്ടർ

കാസർകോട്: (KasargodVartha) ജില്ലയിൽ ഒരു സ്ഥിരം എക്സ്പോ ഗ്രൗണ്ട് സ്ഥാപിക്കാനുള്ള നടപടികള്‍ സ്വീകരിക്കുമെന്ന് ജില്ലാ കലക്ടർ കെ ഇമ്പശേഖർ അറിയിച്ചു. വനിതാ സംരംഭകരുമായുള്ള ഒരു മുഖാമുഖം പരിപാടിയിൽ അധ്യക്ഷത വഹിക്കുകയായിരുന്നു അദ്ദേഹം. ഈ സംവാദത്തിൽ വനിതാ സംരംഭകർ ഉന്നയിച്ച വിവിധ ആവശ്യങ്ങൾക്കും പ്രശ്നങ്ങൾക്കും കളക്ടർ മറുപടി നൽകി.

അനന്തപുരം വ്യവസായ ഏരിയയിൽ ഹൈ മാസ്റ്റ് ലൈറ്റുകൾ സ്ഥാപിക്കുന്നതിന് കളക്ടർ ജില്ലാ വ്യവസായ കേന്ദ്രം ജനറൽ മാനേജർക്ക് നിർദ്ദേശം നൽകി. തൊഴിലാളികളുടെ സൗകര്യവും അവരുടെ എണ്ണവും കണക്കിലെടുത്ത് അനന്തപുരം വ്യവസായ ഏരിയയിലേക്ക് ബസ് സർവീസ് ആരംഭിക്കുന്നതിനുള്ള നടപടികളും ഉടൻ സ്വീകരിക്കുമെന്നും കലക്ടർ ഉറപ്പുനൽകി. ഫാർമർ പ്രൊഡ്യൂസർ കമ്പനികളുടെ ആവശ്യകതകളും അവർ നേരിടുന്ന പ്രശ്നങ്ങളും വിശദീകരിച്ച് അപേക്ഷ സമർപ്പിക്കാൻ കളക്ടർ യോഗത്തിൽ നിർദ്ദേശം നൽകി. ജില്ലാ വ്യവസായ കേന്ദ്രം ജനറൽ മാനേജർ പരിപാടിയുടെ ലക്ഷ്യങ്ങളെക്കുറിച്ച് വിശദീകരിച്ചു.

യോഗത്തിൽ പങ്കെടുത്ത വനിതാ സംരംഭകർ തങ്ങളുടെ അനുഭവങ്ങളും ആവശ്യങ്ങളും പങ്കുവെച്ചു. ഷിഫാനി മുജീബ് ജില്ലയിലെ എല്ലാ വനിതാ സംരംഭകരെയും ഉൾപ്പെടുത്തി ഒരു ക്ലസ്റ്റർ രൂപീകരിക്കണമെന്നും വനിതാ സംരംഭകർക്കായി പ്രത്യേക വ്യവസായ എസ്റ്റേറ്റുകൾ സ്ഥാപിക്കണമെന്നും ആവശ്യപ്പെട്ടു. ജില്ലയിൽ എക്സ്പോകൾ സംഘടിപ്പിക്കാൻ സ്ഥലപരിമിതി ഉണ്ടെന്നും അതിനാൽ ഒരു സ്ഥിരം എക്സ്പോ ഗ്രൗണ്ട് അനിവാര്യമാണെന്നും അവർ ചൂണ്ടിക്കാട്ടി. 

പ്രിൻ്റിംഗ് രംഗത്ത് പ്രവർത്തിക്കുന്ന വനിതാ സംരംഭകർക്ക് സർക്കാർ ഓഫീസുകളിൽ നിന്നും വിദ്യാലയങ്ങളിൽ നിന്നുമുള്ള പ്രിൻ്റിംഗ് ഓർഡറുകൾ നൽകിയാൽ മറ്റു ജില്ലകളിൽ നിന്ന് ഓർഡർ ചെയ്യുന്നതിനേക്കാൾ കുറഞ്ഞ ചെലവിൽ ഇവിടെ നിർമ്മാണം നടത്താനും വിതരണം ചെയ്യാനും സാധിക്കുമെന്നും ഇത് കൂടുതൽ വനിതകൾക്ക് തൊഴിൽ നൽകാൻ സഹായിക്കുമെന്നും സ്വാതി ഓഫ്സെറ്റ് പ്രിൻ്റിംഗ് പ്രസ് ഉടമ പത്മാവതി അഭിപ്രായപ്പെട്ടു.

അംഗൻവാടികളിലേക്കും വിദ്യാലയങ്ങളിലേക്കും ഗുണമേന്മയുള്ള തേൻ വിതരണം ചെയ്യാൻ ഫാർമർ പ്രൊഡ്യൂസർ കമ്പനികളെ ചുമതലപ്പെടുത്തിയാൽ അത് നിരവധി കർഷകർക്ക് പ്രയോജനകരമാകുമെന്നും പഞ്ചായത്ത് വഴി നടപ്പാക്കുന്ന പദ്ധതികളിൽ തങ്ങളെയും പങ്കാളികളാക്കണമെന്നും അന്നമ്മ ജോസ് ആവശ്യപ്പെട്ടു. 

രാത്രികാലങ്ങളിൽ സാമൂഹ്യവിരുദ്ധർ വ്യവസായ ഏരിയയിലേക്ക് പ്രവേശിക്കുന്നത് തടയുന്നതിനും വനിതാ സംരംഭകരുടെ സുരക്ഷിതത്വം ഉറപ്പാക്കുന്നതിനും അനന്തപുരം വ്യവസായ ഏരിയയിൽ കിൻഫ്രയിലേതുപോലുള്ള സുരക്ഷാ സംവിധാനം ഏർപ്പെടുത്തണമെന്നും സ്ട്രീറ്റ് ലൈറ്റുകൾ സ്ഥാപിക്കണമെന്നും തൊഴിലാളികൾക്ക് കാൻ്റീൻ സൗകര്യം ഒരുക്കണമെന്നും ഫമീദ യോഗത്തിൽ ആവശ്യപ്പെട്ടു.

കളക്ടറേറ്റ് വീഡിയോ കോൺഫറൻസ് ഹാളിൽ നടന്ന പരിപാടിയിൽ നിരവധി വനിതാ സംരംഭകർ പങ്കെടുത്തു. തുളുനാട് ഇക്കോ ഗ്രീൻ എഫ്.പി.സി പ്രതിനിധി അന്നമ്മ ജോസ്, സ്വാതി ഓഫ്സെറ്റ് പ്രിൻ്റിംഗ് പ്രസ് ഉടമ പത്മാവതി, ഹുദാ ഹോം മേഡ് പ്രോഡക്ട്സ് ഉടമ മറിയാമ്മ, ബി.ആർ ഹോം മേഡ് പ്രോഡക്ട്സ് ഉടമ ബേബി രാഘവൻ, കേക്ക് ആർട്ടിസ്റ്റ് ഹംദ സലീം, പ്രിൻ്റിംഗ് സംരംഭക ഷിഫാനി മുജീബ്, എം.വി.ഐ ഫ്ലവേഴ്സ് ഉടമ എം. അരുണാക്ഷി, ഉമ ഗാർമെൻ്റ്സ് ഉടമ പി.കെ ഉമാവതി, ഗ്രാനൈറ്റ് ഉദ്യോഗ് ഉടമ സി. ബിന്ദു, താമാ ഹണി ആൻഡ് ബീ ഫാം ഉടമ ആലിയാമ ഫിലിപ്പ്, എം.എ കെയർ കോർണർ ഉടമ പി.എ സീനത്ത്, റീയൂസബിൾ സാനിറ്ററി പാഡ് സംരംഭക രാജി ഷിനോയ്, പ്ലൈവുഡ് ഇൻഡസ്ട്രി സംരംഭക ഫാമിദ തുടങ്ങിയവർ സംവാദത്തിൽ സജീവമായി പങ്കെടുത്തു.

#Kasargod, #WomenEntrepreneurs, #BusService, #ExpoGround, #IndustrialArea, #Infrastructure