കൂറ്റൻ പാറക്കല്ല് വീടിന് മുകളിലേക്ക് പതിച്ചു; വീട് പൂർണമായും തകർന്നു, കുടുംബാംഗങ്ങൾ രക്ഷപെട്ടത് തലനാഴിരയ്ക്ക്; പരാതി നൽകിയിട്ടും നടപടിയുണ്ടായില്ലെന്ന് വീട്ടുകാർ

കാസർകോട്: (KasargodVartha) ചന്ദ്രഗിരി നടക്കൽ ടയർ കടയിലെ ജീവനക്കാരനായ മിതേഷിന്റെ വീടിന് മുകളിൽ കൂറ്റൻ പാറക്കല്ല് പതിച്ച് വീട് പൂർണമായും തകർന്നു. ബുധനാഴ്ച രാത്രി 8:30 ഓടെയാണ് നാടിനെ ഞെട്ടിച്ച സംഭവമുണ്ടായത്. 

വീടിന് സമീപത്തെ കുന്നിൻ മുകളിൽ നിന്നാണ് കൂറ്റൻ പാറക്കല്ല് ഉരുണ്ടുവീണത്. പാറക്കല്ല് പതിച്ചത് കിടപ്പുമുറിയുടെ ഭാഗത്തേക്കാണ്. ഭാഗ്യം കൊണ്ടുമാത്രം വലിയൊരു ദുരന്തം ഒഴിവായി. സംഭവസമയത്ത് മിതേഷിന്റെ ഭാര്യയും കുഞ്ഞും തൊട്ടടുത്ത ക്ഷേത്രത്തിൽ പോയതായിരുന്നു. മിതേഷും മാതാവും വീടിന്റെ മുൻവശത്തായിരുന്നതിനാൽ തലനാരിഴയ്ക്ക് രക്ഷപ്പെട്ടു.

ഉഗ്ര ശബ്ദം കേട്ട് ഓടിയെത്തിയ നാട്ടുകാർ കണ്ടത് തകർന്ന വീടാണ്. ഓടുമേഞ്ഞ വീടിന്റെ ഭൂരിഭാഗവും തകർന്നു. ഏകദേശം രണ്ട് ലക്ഷം രൂപയുടെ നഷ്ടം കണക്കാക്കുന്നു. വിവരമറിഞ്ഞ് തഹസിൽദാർ, വില്ലേജ് ഓഫീസർ, കളക്ടറേറ്റിൽ നിന്നുള്ള ഉദ്യോഗസ്ഥർ, പഞ്ചായത്ത് അധികൃതർ എന്നിവർ സ്ഥലത്തെത്തി സ്ഥിതിഗതികൾ വിലയിരുത്തി.

എന്നാൽ, പാറക്കല്ല് വീഴാനുള്ള സാധ്യത ചൂണ്ടിക്കാട്ടി വീട്ടുകാർ നേരത്തെ പരാതി നൽകിയിരുന്നുവെന്ന് വ്യക്തമാക്കുന്നു. ഹബീബ് എന്നയാളുടെ ഉടമസ്ഥതയിലുള്ള കുന്നിൻ മുകളിൽ നിന്ന് വലിയ പാറക്കല്ലുകളും മരങ്ങളും വീടിന് മുകളിലേക്ക് വീഴാൻ സാധ്യതയുണ്ടെന്ന് കാണിച്ച് മിതേഷിന്റെ ഭാര്യ സി.എച്ച്. ചൈത്ര വില്ലേജ് ഓഫീസർക്കും ബന്ധപ്പെട്ട അധികാരികൾക്കും പരാതി നൽകിയിരുന്നു. എന്നിട്ടും അധികൃതർ നടപടിയെടുക്കാത്തതാണ് ഈ ദുരന്തത്തിന് വഴിവെച്ചതെന്നാണ് വീട്ടുകാരുടെ പ്രധാന ആക്ഷേപം.

ഈ സംഭവത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Boulder falls on Kasaragod house, family escapes; prior complaints ignored.

#Kasaragod #Landslide #HouseDamaged #NaturalDisaster #Kerala #OfficialNegligence