പോലീസ് കസ്റ്റഡിയിലെടുത്ത തോണി മണല്‍ മാഫിയ മോഷ്ടിച്ചു
Aug 5, 2012, 14:55 IST
ശനിയാഴ്ച പുലര്‍ച്ചെയാണ് സംഭവം. തളങ്കര അഴിമുഖം വടക്കുഭാഗത്ത് മണല്‍ കടത്തുന്നതിനിടയിലാണ് കാസര്‍കോട് തീരദേശ പോലീസ് എസ്.ഐ. അനില്‍കുമാറും സംഘവും രണ്ട് തോണികള്‍ പിടികൂടിയത്. മണല്‍ കടത്തിയ രണ്ടുപേര്‍ ഓടിരക്ഷപ്പെടുകയായിരുന്നു.
പിടികൂടിയ രണ്ടുതോണികളും തീരദേശ പോലീസ് സ്റ്റേഷന് പരിസരത്താണ് സൂക്ഷിച്ചിരുന്നത്. ഇതിലൊന്നാണ് മോഷണം പോയത്. മോഷ്ടിച്ച തോണി കളനാട് ഭാഗത്തെ രഹസ്യ കേന്ദ്രത്തില്‍ എത്തിക്കുകയായിരുന്നു. ദിവസങ്ങള്‍ക്ക് മുമ്പ് പുലിക്കുന്നിന് സമീപം ചന്ദ്രഗിരി പുഴയിലെ ദ്വീപില്‍ കെട്ടിയിട്ട തോണിയും മോഷ്ടിക്കപ്പെട്ടിരുന്നു. ഈ തോണി കാസര്‍കോട് റെയില്‍വെ സ്റ്റേഷന് പടിഞ്ഞാറുഭാഗത്തെ കണ്ടല്‍ക്കാടിനുള്ളില്‍ നിന്നാണ് കണ്ടെത്തിയത്.
മണല്‍ മാഫിയ ശക്തമായതോടെ ചന്ദ്രഗിരി പുഴയോരത്തെ നിരവധി തോണികള്‍ ഇതിനകം മോഷ്ടിക്കപ്പെട്ടിട്ടുണ്ട്. മുന്‍കാലങ്ങളില്‍ ചന്ദന-ചാരായ മാഫിയ കാര്‍ ഉള്‍പ്പടെയുള്ള വാഹനങ്ങളാണ് കട്ട് കടത്തിയതെങ്കില്‍ മണല്‍ മാഫിയ സംഘം തോണികളാണ് ഇപ്പോള്‍ മോഷ്ടിക്കുന്നത്.
Keywords: Boat, Robbery, Thalangara, Sand Mafia, Kasaragod
Tags
Share this story
