പൈതൃകത്തിൻ്റെ മടിത്തട്ടിൽ യോഗ: ബേക്കൽ കോട്ടയിൽ 200 പേർക്ക് അവസരം!

ബേക്കൽ: (KasargodVartha) ലോക യോഗാദിനാചരണത്തിന്റെ ഭാഗമായി കേന്ദ്ര പുരാവസ്തു വകുപ്പ് ബേക്കൽ കോട്ടയിൽ സംഘടിപ്പിക്കുന്ന യോഗാഭ്യാസ പരിപാടിയിൽ 200 പേർക്ക് യോഗ പരിശീലനത്തിന് അവസരം. പങ്കെടുക്കുന്ന എല്ലാവർക്കും പ്രവേശനം സൗജന്യമായിരിക്കും.

കേന്ദ്ര പുരാവസ്തു വകുപ്പ് തൃശൂർ സർക്കിളിന്റെ നേതൃത്വത്തിൽ ജൂൺ 21-ന് (ശനിയാഴ്ച) രാവിലെ ആറുമണിക്ക് ബേക്കൽ കോട്ടയിലാണ് പരിപാടി. കേന്ദ്ര പുരാവസ്തു വകുപ്പ് സൂപ്രണ്ടിംഗ് ആർക്കിയോളജിസ്റ്റ് വിജയകുമാർ എസ്. നായരുടെ അധ്യക്ഷതയിൽ നടക്കുന്ന ചടങ്ങ് സി.എച്ച്. കുഞ്ഞമ്പു എം.എൽ.എ ഉദ്ഘാടനം ചെയ്യും. പത്മശ്രീ സത്യനാരായണ ബെലേരി വിശിഷ്ടാതിഥിയായിരിക്കും.

പള്ളിക്കര പഞ്ചായത്ത് പ്രസിഡന്റ് എം. കുമാരൻ, ബി.ആർ.ഡി.സി. എം.ഡി. ഷിജിൻ പറമ്പത്ത്, പഞ്ചായത്തംഗം അബ്ദുല്ല സിംഗപ്പൂർ, ഡെപ്യൂട്ടി സൂപ്രണ്ടിംഗ് ആർക്കിയോളജിസ്റ്റ് കുമാരൻ സി. തുടങ്ങിയ പ്രമുഖർ യോഗാദിനാചരണത്തിൽ പങ്കെടുക്കും.

പരിപാടിയുടെ ഒരുക്കങ്ങൾ വിലയിരുത്തുന്നതിനായി പുരാവസ്തു വകുപ്പ് തൃശൂർ സർക്കിൾ ഓഫീസിലെ ഉദ്യോഗസ്ഥർ ബേക്കലിലെത്തിയിരുന്നു. യോഗയിൽ പങ്കെടുക്കാൻ താൽപ്പര്യമുള്ള വിദ്യാർത്ഥികളടക്കമുള്ളവർ രാവിലെ ആറുമണിക്ക് തന്നെ ബേക്കൽ കോട്ടയിലെത്തണമെന്ന് അധികൃതർ അറിയിച്ചു. യോഗാദിനത്തിന്റെ ഭാഗമായി ശനിയാഴ്ച ബേക്കൽ കോട്ടയിൽ പ്രവേശനം സൗജന്യമാണ്.
 

യോഗയുടെ പ്രാധാന്യം ജനങ്ങളിലേക്ക് എത്തിക്കാൻ ഇത്തരം പരിപാടികൾ എത്രത്തോളം സഹായിക്കുന്നു? നിങ്ങളുടെ അഭിപ്രായം രേഖപ്പെടുത്തുക.

Article Summary: Bekal Fort hosts Yoga Day event for 200 with free entry.

#YogaDay, #BekalFort, #KeralaYoga, #ArchaeologyDept, #InternationalYogaDay, #FreeEntry