ബന്തിയോട്-പെർമുദേ ഹൈടെക് റോഡിൽ അരികിടിച്ചിൽ വ്യാപകം; വാഹനങ്ങൾക്ക് കടന്നുപോകാൻ കഴിയാതെ ദുരിതം, യാത്രക്കാർ ആശങ്കയിൽ

ബന്തിയോട്: (KasargodVartha) മഞ്ചേശ്വരം മണ്ഡലത്തിലെ പ്രധാന പാതകളിലൊന്നായ ബന്തിയോട്-പെർമുദേ പൊതുമരാമത്ത് ഹൈടെക് റോഡിൽ വശങ്ങളിലെ മണ്ണ് ഒലിച്ചുപോകുന്നത് വ്യാപകമായതോടെ വാഹനാപകട ഭീഷണി വർധിക്കുന്നു. ഒരു പതിറ്റാണ്ടായി യാതൊരുവിധ നവീകരണ പ്രവർത്തനങ്ങളും നടക്കാത്തതാണ് ഈ ഹൈടെക് റോഡിൻ്റെ ഓരങ്ങളെ തകർച്ചയിലേക്ക് തള്ളിവിട്ടത്. നേരാംവണ്ണമുള്ള ഓവുചാൽ പോലും പലസ്ഥലങ്ങളിലുമില്ല. റോഡിൻ്റെ അരികുകൾ ഇടിയുന്നതും വലിയ കുഴികൾ രൂപപ്പെടുന്നതും ഈ റൂട്ടിലെ യാത്രക്കാർക്ക് കടുത്ത അപകടഭീഷണിയാണ് സൃഷ്ടിക്കുന്നത്. അബദ്ധത്തിൽ കുഴിയുള്ള ഭാഗങ്ങളിലെ വശങ്ങളിലിറങ്ങി വാഹനങ്ങൾക്ക് കേടുപാടുകൾ സംഭവിക്കുന്നത് പതിവു കാഴ്ചയാണ്. പലപ്പോഴും അപകടങ്ങൾക്കും ഈ മണ്ണൊലിപ്പ് കാരണമാകുന്നു.

എന്താണ് ബിഎം ആൻഡ് ബിസി (BM & BC) ഹൈടെക് റോഡുകൾ?

കേരളത്തിൽ പ്രധാന പൊതുമരാമത്ത് റോഡുകൾ നിർമിക്കാൻ ഉപയോഗിക്കുന്ന അത്യാധുനിക സാങ്കേതികവിദ്യയാണ് ബിറ്റുമിനസ് മക്കാഡം ആൻഡ് ബിറ്റുമിനസ് കോൺക്രീറ്റ് (BM & BC). ഇത് സാധാരണ ടാറിങ്ങിനേക്കാൾ കൂടുതൽ ഈടുനിൽക്കുന്നതും ഭാരം താങ്ങാൻ ശേഷിയുള്ളതുമാണ്. എന്നാൽ റോഡിന് കൃത്യമായ ഓവുചാലുകളും പാർശ്വഭിത്തികളും നിർമിച്ചില്ലെങ്കിൽ മഴവെള്ളം കെട്ടിനിനും കുത്തൊഴുക്കില്പെട്ടു വശത്തെ മണ്ണിളകിയും റോഡിൻ്റെ അരികുകൾ തകരാൻ സാധ്യത കൂടുതലാണ്. ബന്തിയോട്-പെർമുദേ റോഡിൽ ഇപ്പോൾ സംഭവിച്ചിരിക്കുന്നതും ഇതാണ്.

കോടികൾ മുടക്കിയ പാത സംരക്ഷിക്കപെടണം

കഴിഞ്ഞ പ്രാവശ്യത്തെ മഴയിലാണ് കൂടുതലും റോഡിൻ്റെ ഇരുഭാഗങ്ങളിലും മണ്ണൊലിപ്പ് ഉണ്ടായതും കുഴികൾ രൂപപ്പെട്ടതും. ഇവിടങ്ങളിൽ രൂപപ്പെടുന്ന കുഴികൾ മണ്ണിട്ട് നികത്താൻ പോലും കാലങ്ങളായി അധികൃതർ തയ്യാറായില്ലെന്ന് ജനങ്ങൾ പരാതിപ്പെടുന്നു. എംഎൽഎ ആയിരുന്ന പരേതനായ പി ബി അബ്ദുൽ റസാഖിൻ്റെ ശ്രമഫലമായാണ് പിഡബ്ല്യുഡി ഫണ്ട് ഉപയോഗപ്പെടുത്തി കോടികൾ ചെലവഴിച്ച് ഈ റോഡ് പൂർണമായും ഹൈടെക് സംവിധാനത്തിൽ നിർമാണം പൂർത്തിയാക്കിയത്.

എന്നാൽ അതിനുശേഷം റോഡിൻ്റെ യാതൊരുവിധ പരിപലന പ്രവർത്തനങ്ങളും നടന്നിട്ടില്ല. കോടികൾ മുടക്കിയ പാതയിലെ ഈ തകർച്ച കാണുമ്പോൾ പ്രദേശവാസികൾക്ക് കടുത്ത സങ്കടവും പ്രതിഷേധവുമുണ്ട്.

അപകടക്കെണിയായി ഓവുചാലുകളും കുഴികളും

കാലവർഷം തുടരുന്ന സാഹചര്യത്തിൽ റോഡിലെ അപകട സാധ്യതയും നാട്ടുകാർ മുന്നിൽ കാണുന്നുണ്ട്. ഇരുഭാഗങ്ങളിൽ നിന്നായി വലിയ വാഹനങ്ങൾ വന്നാൽ റോഡിൽനിന്ന് താഴെയിറക്കാൻ കഴിയാത്ത സാഹചര്യമാണ് നിലവിലുള്ളത്. കഴിഞ്ഞ തവണ മഴയ്ക്ക് മുൻപ് റോഡിലെ അരിക് സംരക്ഷണം അടക്കമുള്ള ജോലികൾ ചെയ്യണമെന്ന് അധികൃതരോട് ആവശ്യപ്പെട്ടിരുന്നുവെങ്കിലും ബന്ധപ്പെട്ടവർ അത് കൂട്ടാക്കിയില്ലെന്ന് പറയുന്നു.

വിവിധ സ്ഥലങ്ങളിൽ റോഡിൻ്റെ ഇരുവശങ്ങളിലും ഓവുചാലുകൾ പൂർണമായും മൂടിയ നിലയിലാണ്. റോഡരികിൽ നിന്ന് മണ്ണ് ഒലിച്ചുപോയതോടെ റോഡിൻ്റെ വശങ്ങൾ തകരാൻ തുടങ്ങിയത് ജനങ്ങളുടെ ആശങ്ക വർധിപ്പിക്കുന്നുണ്ട്. മണ്ണൊലിപ്പും കുഴിയും രൂപപ്പെട്ട സ്ഥലത്ത് മണ്ണിട്ട് നിരത്തി, ആവശ്യവുള്ളിടത്ത് കോൺക്രീറ്റ് ചെയ്ത് എത്രയും വേഗം പാത ഗതാഗതയോഗ്യമാക്കണമെന്നാണ് പ്രദേശവാസികളുടെ പ്രധാന ആവശ്യം.

നാട്ടുകാരുടെ യാത്രാദുരിതവുമായി ബന്ധപ്പെട്ട ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ വിശേഷങ്ങൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: Bandiyod-Permude hi-tech road in Kasaragod is severely ruined.

#KasaragodNews #Bandiyod #PermudeRoad #PWD #RoadAccidentThreat #KeralaNews #AparnaNews