Health Care | ശ്രദ്ധ നേടി വയോജന ആയുര്‍വേദ മെഡിക്കല്‍ ക്യാമ്പ്

കാസർകോട്: (KasargodVartha) ദേശീയ ആയുഷ് മിഷൻ കേരളം സഹകരണത്തോടെയും ഭാരതീയ ചികിത്സാ വകുപ്പിന്റെ മേൽനോട്ടത്തോടെയും കാസർകോട് നഗരസഭയുടെയും ഗവ. ആയുർവേദ ആശുപത്രിയുടെയും സംയുക്താഭിമുഖ്യത്തിൽ മുനിസിപ്പൽ കോൺഫറൻസ് ഹാളിൽ സംഘടിപ്പിച്ച വയോജന ആയുർവേദ മെഡിക്കൽ ക്യാമ്പ് വലിയ ശ്രദ്ധ നേടി. ക്യാമ്പിൽ നൂറുകണക്കിന് വയോജനർ പങ്കെടുത്ത് സേവനം പ്രാപിച്ചു.

കാസർകോട് നഗരസഭ ചെയർപേഴ്‌സൺ അബ്ബാസ് ബീഗം ഉദ്ഘാടനം ചെയ്തു,  വികസന കാര്യ സ്ഥിരം സമിതി ചെയർമാൻ സഹീര്‍ ആസിഫ് അദ്ധ്യക്ഷത വഹിച്ചു. ആരോഗ്യ കാര്യ സ്ഥിരം സമിതി ചെയർമാൻ ഖാലിദ് പച്ചക്കാട് സ്വാഗതം പറഞ്ഞു. ഡോ. അഞ്ജു പി. രാമചന്ദ്രൻ ക്യാമ്പിന്റെ പ്രധാന പദ്ധതികളെ കുറിച്ച് വിശദീകരിച്ചു.

നഗരസഭ കൗൺസിലർ ലളിത, നഗരസഭാ സെക്രട്ടറി ജസ്റ്റിന്‍ പി. എ., ഡോ. മഹേഷ് പി. എസ്., ഡോ. പ്രവീൺ, ഡോ. ദീപ്തി കെ. നായർ, ഡോ. യിൻസി ഗാർഗി, ഡോ. പ്രതിഭ, ഡോ. അനഘ തുടങ്ങിയവർ ചടങ്ങിൽ പ്രസംഗിച്ചു. ചീഫ് മെഡിക്കൽ ഓഫീസർ ഡോ. സ്വപ്ന കെ. എസ്. നന്ദി രേഖപ്പെടുത്തി.

ഈ മെഡിക്കൽ ക്യാമ്പിൽ ജനറൽ മെഡിസിൻ, സ്ത്രീരോഗം, നേത്ര രോഗങ്ങൾ, മാനസികാരോഗ്യം, യോഗ, പഞ്ചകർമ്മ വിഭാഗങ്ങളിൽ വിദഗ്ധരായ ഡോക്ടർമാർ സേവനം നൽകി. കൂടാതെ, സൗജന്യ മരുന്നുകളും വിതരണം ചെയ്തു. എട്ട് വിദഗ്ധ ഡോക്ടർമാരുടെ സജീവ പങ്കാളിത്തം ക്യാമ്പിന്റെ പ്രധാന ഹൈലൈറ്റ് ആയിരുന്നു.