സ്‌കൂള്‍ കുട്ടികളുമായി പോവുകയായിരുന്ന ഓട്ടോറിക്ഷയില്‍ ജെസിബി കയറ്റിവന്ന ലോറിയിടിച്ച് ഡ്രൈവര്‍ മരിച്ചു; 5 വിദ്യാര്‍ത്ഥികള്‍ക്ക് പരിക്ക്

കാസര്‍കോട്: (www.kasargodvartha.com 21.11.2018) സ്‌കൂള്‍ കുട്ടികളുമായി പോവുകയായിരുന്ന ഓട്ടോറിക്ഷയില്‍ ജെസിബി കയറ്റിവന്ന ലോറിയിടിച്ച് ഓട്ടോ ഡ്രൈവര്‍ മരിച്ചു. അപകടത്തില്‍ അഞ്ച് വിദ്യാര്‍ത്ഥികള്‍ക്ക് പരിക്കേറ്റു.

ഓട്ടോഡ്രൈവര്‍ പെരിയാട്ടടുക്കം സ്വദേശി അന്‍സാരി (35) ആണ് മരിച്ചത്. ബുധനാഴ്ച രാവിലെ 11 മണിയോടെ കുണിയ ദേശീയപാതയിലാണ് അപകടമുണ്ടായത്. കുണിയ ഹയര്‍ സെക്കന്‍ഡറി സ്‌കൂളിലേക്കും അംഗണ്‍വാടിയിലേക്കും കുട്ടികളെയും കയറ്റി പോവുകയായിരുന്ന ഓട്ടോറിക്ഷയിലാണ് ലോറിയിടിച്ചത്.


പൂനെയിലേക്ക് ജെ സി ബി കയറ്റി പോവുകയായിരുന്ന ലോറി ഓട്ടോറിക്ഷയെ ഇടിച്ചുതെറിപ്പിക്കുകയായിരുന്നു. ഇടിയുടെ ആഘാതത്തില്‍ ഓട്ടോറിക്ഷ തെറിച്ച് കാറിലേക്ക് വീണ് കാറിന് കേടുപാട് സംഭവിച്ചു.

കുണിയ സ്‌കൂളിലെ യു കെ ജി വിദ്യാര്‍ത്ഥികളായ അനാമിക (ആറ്), ഫാത്വിമത്ത് സൈദ (ആറ്), റുബീന മുഹമ്മദ് (ആറ്), സിയാന (ആറ്), ഖദീജത്ത് അസ്‌ന (ആറ്) എന്നിവര്‍ക്കാണ് പരിക്കേറ്റത്. ഇതില്‍ അസ്‌നയെ കാസര്‍കോട് കെയര്‍വെല്‍ ആശുപത്രിയിലും മറ്റുള്ളവരെ ചെങ്കള ഇ.കെ നായനാര്‍ ആശുപത്രിയിലും പ്രവേശിപ്പിച്ചു.

പരേതനായ നിസാര്‍- നൂര്‍ജഹാന്‍ ദമ്പതികളുടെ മകനാണ്. ഭാര്യ: നസീറ. മക്കള്‍: അന്‍സാഫ്, അര്‍ഫാസ്, ഫാത്വിമ. ഏക സഹോദരന്‍ അനസ്.