'പക്ഷേ നൊന്തുപെറ്റ കുഞ്ഞിനെ ഉപേക്ഷിക്കാന്‍ മനസ്സുവന്നില്ല'
Oct 22, 2012, 20:21 IST
കുമ്പള ഷിറിയ കടപ്പുറത്തെ 25കാരിയാണ് ആശുപത്രിയില്‍ പ്രസവിച്ചത്. നാട്ടുകാരാണെന്ന് പറഞ്ഞ് യുവതിയോടൊപ്പം എത്തിയവരാണ് അഡ്മിറ്റ് ചെയ്തതെന്ന് ആശുപത്രി അധികൃതര്‍ പറഞ്ഞു. 16 നാണ് യുവതിയെ ആശുപത്രിയില്‍ എത്തിച്ചത്. അന്ന് തന്നെ പ്രസവിക്കുകയും ചെയ്തു. ദിവസങ്ങള്‍ കഴിഞ്ഞിട്ടും യുവതി ആശുപത്രിയില്‍ നിന്ന് ഡിസ്ചാര്‍ജ് ചെയ്ത് പോകാത്തതിനെ തുടര്‍ന്നാണ് പീഡനത്തിന് ഇരയായാണ് ഗര്‍ഭിണിയായതെന്ന വിവരം പുറത്തായത്.
ആശുപത്രിയില്‍ നവജാത ശിശുവിനൊപ്പം ആറ് ദിവസം കഴിഞ്ഞിരുന്ന യുവതി പറയുന്നതിങ്ങനെ-'ആറ് വര്‍ഷം മുമ്പ് അബ്ദുല്ല എന്നയാള്‍ തന്നെ വിവാഹം കഴിച്ചിരുന്നു. അഞ്ച് മാസത്തിന് ശേഷം ഉപേക്ഷിച്ച് പോയി. അതിനിടെ വീട്ടുകാര്‍ മറ്റൊരാള്‍ക്ക് വിവാഹം ചെയ്തു കൊടുത്തുവെങ്കിലും അയാളുമായുള്ള ബന്ധം കൂടുതല്‍ കാലം നീണ്ടുപോയില്ല. പിന്നീട് മാതാപിതാക്കള്‍കൊപ്പമായിരുന്നു താമസം. ഇതിനിടെ മാതാപിതാക്കളും സഹോദരനും മരിച്ചുപോയി. അതിന് ശേഷം ഞാനും വികലാംഗയായ 18 വയസ്സുള്ള സഹോദരിയും അനാഥരായി. പിന്നീട് വീടുകളില്‍ ചെന്ന് ജോലി ചെയ്താണ് സഹോദരിയും ഞാനും കഴിഞ്ഞിരുന്നത്. ഇതിനിടെ വീട്ടിലെത്തി ഒരാള്‍ എന്നെ പീഡിപ്പിച്ചു. ഇതേകുറിച്ച് പലരോടും പറഞ്ഞുവെങ്കിലും ആരും സഹായിക്കാന്‍ എത്തിയില്ല. പിന്നീട് ആഴ്ചതോറും പ്രസ്തുത യുവാവ് പീഡിപ്പിക്കാന്‍ തുടങ്ങി. ആദ്യമൊക്കെ എതിര്‍ത്തുവെങ്കിലും പിന്നീട് പീഡനം പതിവായി. ഇങ്ങനെയാണ് ഗര്‍ഭിണിയായത്. പൂര്‍ണ ഗര്‍ഭിണിയായതിനെ തുടര്‍ന്ന് ജോലിക്ക് പോകാന്‍ കഴിഞ്ഞില്ല. പീഡിപ്പിച്ച യുവാവും തിരിഞ്ഞു നോക്കാതെയായി.
16ന് പ്രസവ വേദന അനുഭവപ്പെട്ടപ്പോള്‍ ചിലര്‍ചേര്‍ന്ന് ആശുപത്രിയില്‍ എത്തിച്ചു. ഒരു ജനപ്രതിനിധിയും ആശുപത്രിയില്‍ എത്തിക്കാന്‍ ഉണ്ടായിരുന്നു. ആദ്യത്തെ മൂന്ന് ദിവസം കുഞ്ഞ് ഐ.സി.യു.വില്‍ ആയിരുന്നു. പിന്നീട് വാര്‍ഡിലേക്ക് മാറ്റി. ഇതിനിടയില്‍ ആശുപത്രിയില്‍ എത്തിയ ഒരാള്‍ കുഞ്ഞിനെ അമ്മതൊട്ടിലില്‍ ഉപേക്ഷിക്കാന്‍ ഉപദേശിച്ചു. പക്ഷേ നൊന്തുപെറ്റ കുഞ്ഞിനെ ഉപേക്ഷിക്കാന്‍ മനസ്സുവന്നില്ല'.
ചിലര്‍ യുവതിയുടെയും കുഞ്ഞിന്റെയും ഫോട്ടോയെടുക്കുകയും വിവരങ്ങള്‍ ശേഖരിക്കുകയും ചെയ്തു. ഈ വിവരമറിഞ്ഞാണ് രണ്ട് സ്ത്രീകള്‍ ധൃതി പിടിച്ച് യുവതിയെയും കുഞ്ഞിനെയും ഡിസ്ചാര്‍ജ് ചെയ്ത് കൂട്ടികൊണ്ടുപോയത്.
Keywords: Molestation, Delivery, Kasaragod, General-hospital, Kerala, Girl.
Tags
Share this story
