Healthcare | കാസർകോട്ട് ആസ്റ്റർ മിംസിന്റെ അത്യാധുനിക ആശുപത്രിയുടെ നിർമാണ പ്രവർത്തനങ്ങൾ അന്തിമ ഘട്ടത്തിൽ; പുരോഗതി വിലയിരുത്താൻ നേരിട്ടെത്തി ഡോ. ആസാദ് മൂപ്പൻ

കാസർകോട്: (KasargodVartha) ലോകത്തിലെ ഏറ്റവും വലിയ ആതുരസേവന ദാതാക്കളിലൊന്നായ ആസ്റ്റർ ഗ്രൂപ്പ് കാസർകോട്ട് സ്ഥാപിക്കുന്ന അത്യാധുനിക ആശുപത്രിയുടെ നിർമണ പ്രവർത്തനങ്ങൾ അന്തിമ ഘട്ടത്തിൽ. ചെർക്കള ഇന്ദിരാനഗറിലുള്ള സ്ഥലത്താണ് അത്യാധുനിക സൗകര്യങ്ങളോടുകൂടിയ ഈ ബൃഹത് ആശുപത്രി സമുച്ചയം ഉയരുന്നത്. ഈ വർഷം ജൂൺ മാസത്തോടെ പ്രവർത്തനം ആരംഭിക്കാനാകുമെന്ന പ്രതീക്ഷയിലാണ് അധികൃതർ.

ചൊവ്വാഴ്ച ഡി എം ഹെൽത്ത്കെയർ സ്ഥാപക ചെയർമാൻ ഡോ. ആസാദ് മൂപ്പൻ നിർമ്മാണ പ്രവൃത്തികൾ നേരിൽ സന്ദർശിച്ച് പുരോഗതി വിലയിരുത്തി. അദ്ദേഹത്തോടൊപ്പം ഡി എം ഹെൽത്ത്കെയർ എക്സിക്യൂട്ടീവ് ഡയറക്ടർ അനൂപ് മൂപ്പൻ, ഡി എം ഹെല്‍ത്ത് കെയർ കേരള ക്ലസ്റ്റര്‍ മെഡിക്കൽ ഡയറക്ടർ ഡോ. സൂരജ്, ആസ്റ്റർ കണ്ണൂർ ആൻഡ് കാസർകോട് സിഒഒ ഡോ. അനൂപ് നമ്പ്യാർ, ഹെഡ് ഓഫ് പബ്ലിക് റിലേഷൻസ് നസീർ അഹ്‌മദ്‌, ഹെഡ് ഓഫ് ഓപ്പറേഷൻസ് രഞ്ജു ആലപ്പാട്ട്, പ്രോജക്ട് ഹെഡ് ദിലീപ് അഗർവാൾ, പ്രോജക്ട് മാനേജർ വൈശാഖ് തുടങ്ങിയവർ ഉണ്ടായിരുന്നു.

രണ്ട് ലക്ഷം സ്ക്വയർ ഫീറ്റിൽ 270 ബെഡുകളുള്ള സമ്പൂർണ ചികിത്സാ സംവിധാനങ്ങളോടുകൂടിയാണ് ഈ അത്യാധുനിക ആശുപത്രി നിർമിക്കുന്നത്. 24 മണിക്കൂറും പ്രവർത്തിക്കുന്ന എമർജൻസി ആൻഡ് ട്രോമ കെയർ വിഭാഗം, അത്യാധുനിക കാത് ലാബ്, അത്യാധുനിക ന്യൂറോ സയൻസസ് വിഭാഗം, ഐസിയു, സിസിയു, എൻഐസിയു, ഏഴ് ഓപ്പറേഷൻ തീയേറ്ററുകൾ, ഡയാലിസിസ് യൂണിറ്റ്, പ്ലാസ്റ്റിക് സർജറി വിഭാഗം, ഓർത്തോപീഡിക് വിഭാഗം തുടങ്ങി എല്ലാവിധ ചികിത്സകളും ഇവിടെ ലഭ്യമാകുമെന്ന് ബന്ധപ്പെട്ടവർ കാസർകോട് വാർത്തയോട് പറഞ്ഞു. 

കാസർകോട് ജില്ലയിൽ തന്നെ ഏറ്റവും നവീനമായതും അത്യധുനികവുമായ സിടി, എംആർഐ സ്കാൻ തുടങ്ങിയ സൗകര്യങ്ങൾ ഇവിടെ ഒരുക്കുന്നു എന്നതും ഈ ആശുപത്രിയുടെ ഏറ്റവും വലിയ പ്രത്യേകതയാണ്. കൃത്യമായ രോഗനിർണയത്തിന് ഇത് ഏറെ സഹായകമാകും.

ആരോഗ്യ രംഗത്ത് ഏറെ പിന്നാക്കം നിൽക്കുന്ന ജില്ലയാണ് കാസർകോട്. നിലവിൽ അയൽ ജില്ലകളെ ആശ്രയിക്കേണ്ട അവസ്ഥയാണ് ഇവിടെയുള്ള രോഗികൾക്ക്. ആസ്റ്റർ ഗ്രൂപ്പിന്റെ ഈ പുതിയ ആശുപത്രി കാസർകോടിന്റെ ആരോഗ്യ രംഗത്ത് വലിയ മുന്നേറ്റം നടത്തുമെന്നാണ് പ്രതീക്ഷ. അത്യാധുനിക ചികിത്സാ സൗകര്യങ്ങൾ കാസർകോട്ട് തന്നെ ലഭ്യമാകുന്നതോടെ, രോഗികൾക്ക് വിദഗ്ധ ചികിത്സയ്ക്കായി മറ്റു ജില്ലകളിലേക്ക് പോകേണ്ട ബുദ്ധിമുട്ട് ഒഴിവാകും. കൂടാതെ, നിരവധി തൊഴിലവസരങ്ങൾ സൃഷ്ടിക്കപ്പെടുന്നതിനും ഈ പദ്ധതി സഹായകമാകും.

കാസർകോടിന്റെ ആരോഗ്യ രംഗത്തെ ദയനീയ സ്ഥിതി തിരിച്ചറിഞ്ഞാണ് ആസ്റ്റർ ഗ്രൂപ്പ് ഇവിടെ ഒരു അത്യാധുനിക ആശുപത്രി സ്ഥാപിക്കാൻ തീരുമാനിച്ചത്. ആരോഗ്യ രംഗത്ത് ഒരുപാട് വിപ്ലവകരമായ ആശയങ്ങൾ നടപ്പിലാക്കിയ ആസ്റ്ററിന്റെ കാസർകോട് ജില്ലയിലെ ഈ പുതിയ ആശുപത്രി, ഇവിടുത്തെ ജനങ്ങൾക്ക് വലിയ പ്രതീക്ഷയും ആശ്വാസവുമാണ് നൽകുന്നത്. ഈ ആശുപത്രിയുടെ വരവോടെ കാസർകോടിന്റെ ആരോഗ്യ രംഗത്ത് വലിയ മാറ്റങ്ങൾ സംഭവിക്കുമെന്നും,  ഇതൊരു 'ആരോഗ്യ വിപ്ലവം' തന്നെയായിരിക്കുമെന്നും വിദഗ്ധർ വിലയിരുത്തുന്നു.

ഈ വാർത്ത ഷെയർ ചെയ്യുക. നിങ്ങളുടെ അഭിപ്രായങ്ങൾ കമന്റ് ബോക്‌സിൽ രേഖപ്പെടുത്തുക 

The construction of Aster Mims' advanced hospital in Kasaragod is nearing completion. The 270-bed hospital will have all modern medical facilities. It is expected to start operating in June this year. DM Healthcare Founder Chairman Dr. Azad Moopen reviewed the construction progress.

#AsterMimsKasaragod #HealthcareKerala #MedicalInfrastructure #HospitalConstruction #Kasaragod #DrAzadMoopen