നിത്യ സംഭവമായി ഗതാഗതക്കുരുക്ക്; ചുങ്കം പിരിവ് ആരംഭിക്കാൻ കേന്ദ്രാനുമതി മാത്രം മതി; ആരിക്കാടി ടോൾ ഗേറ്റ് നിർമ്മാണം അന്തിമഘട്ടത്തിൽ

ആരിക്കാടി: (KasargodVartha) ദേശീയപാത 66-ൽ ആരിക്കാടിയിൽ നിർമ്മിക്കുന്ന ടോൾ ഗേറ്റ് നിർമ്മാണം അന്തിമഘട്ടത്തിൽ എത്തിനിൽക്കെ, പ്രദേശത്ത് ഗതാഗതക്കുരുക്ക് നിത്യ സംഭവമായി മാറുന്നു. കോടതി നിരീക്ഷണം നിലനിൽക്കെയും, ചൊവ്വാഴ്ച അന്തിമ കോടതി വിധി പറയാനിരിക്കെയും നിർമ്മാണ പ്രവർത്തനങ്ങൾ ദ്രുതഗതിയിൽ പുരോഗമിക്കുന്നതിൽ ആക്ഷൻ കമ്മിറ്റി ഭാരവാഹികൾ അസ്വാഭാവികത കാണുന്നുണ്ട്.

ഏകദേശം 90 ശതമാനം ജോലികൾ ഇതിനകം പൂർത്തിയായിക്കഴിഞ്ഞു. ബോർഡുകളും സ്ഥാപിച്ചു കഴിഞ്ഞ ടോൾ പ്ലാസയിൽ ഇനി കേന്ദ്രസർക്കാറിന്റെ അനുമതി കൂടി ലഭിച്ചാൽ ടോൾ പിരിവ് ആരംഭിക്കാവുന്ന അവസ്ഥയിലാണ്. നിർമ്മാണ സ്ഥലത്ത് ഇപ്പോൾ തന്നെ വലിയ തോതിലുള്ള ഗതാഗതക്കുരുക്ക് അനുഭവപ്പെട്ടു തുടങ്ങിയത് യാത്രക്കാരെയും നാട്ടുകാരെയും ചൊടിപ്പിച്ചിട്ടുണ്ട്. ഇപ്പോഴത്തെ അവസ്ഥ ഇതാണെങ്കിൽ ടോൾ പ്ലാസ തുടങ്ങിക്കഴിഞ്ഞാലുള്ള സ്ഥിതി എന്തായിരിക്കുമെന്ന ആശങ്കയിലാണ് യാത്രക്കാർ.

തലപ്പാടി ടോൾ പ്ലാസക്കും ആരിക്കാടിയിൽ നിർമ്മിക്കുന്ന ടോൾ പ്ലാസക്കുമിടയിൽ കേവലം 22 കിലോമീറ്റർ മാത്രം ദൂരമേ നിലനിൽക്കുന്നുള്ളൂ. ഇത് ചോദ്യം ചെയ്തുകൊണ്ടാണ് ടോൾ പ്ലാസ വിരുദ്ധ ആക്ഷൻ കമ്മിറ്റി ഭാരവാഹികൾ കോടതിയെ സമീപിച്ചത്. കേന്ദ്രസർക്കാറിന്റെ അനുമതിയില്ലാതെയാണ് ദേശീയപാത അതോറിറ്റി ടോൾ ഗേറ്റ് പണിയാൻ നിർമ്മാണ കമ്പനിക്ക് നിർദ്ദേശം നൽകിയതെന്ന കാര്യം ദേശീയപാത അതോറിറ്റി തന്നെ കോടതിയിൽ സ്ഥിരീകരിച്ചിട്ടുണ്ട്. തങ്ങൾക്ക് അനുകൂലമാകും കോടതി വിധി എന്ന പ്രതീക്ഷയിലാണ് ആക്ഷൻ കമ്മിറ്റി ഭാരവാഹികൾ.

ആരിക്കാടിയിലെ ടോൾ പ്ലാസ താൽക്കാലികമായിട്ടാണ് എന്നാണ് ദേശീയപാത അതോറിറ്റി അധികൃതർ പറയുന്നത്. ദേശീയപാതയുടെ രണ്ടാം റീച്ചിലെ ടോൾ പ്ലാസയുടെ നിർമ്മാണ പ്രവർത്തി പൂർത്തിയാകുന്നത് വരെ ആരിക്കാടിയിലെ ടോൾ പ്ലാസ വഴി ടോൾ പിരിച്ചെടുക്കാനാണ് അതോറിറ്റിയുടെ നീക്കം. രണ്ടാം റീച്ചിലെ നിർമ്മാണ പ്രവർത്തി പൂർത്തിയാക്കാൻ ഇനിയും മാസങ്ങളും, വർഷങ്ങളും വേണ്ടി വന്നേക്കാം. അതുവരെ കുമ്പള, മംഗൽപാടി, മഞ്ചേശ്വരം, മൊഗ്രാൽപുത്തൂർ ഉൾപ്പെടെയുള്ള പഞ്ചായത്തുകളിലെ വ്യാപാരികൾ ഉൾപ്പടെയുള്ളവർ രണ്ട് ടോൾ പ്ലാസ വഴി കടന്നുപോകുമ്പോൾ വൻ തുക നൽകേണ്ടി വരും. ഇതിനെതിരെ ആക്ഷൻ കമ്മിറ്റിയുടെ നേതൃത്വത്തിൽ വൻ പ്രക്ഷോഭ പരിപാടികൾ സംഘടിപ്പിച്ചിരുന്നു.

അതിനിടെ രാജ്യത്തെ 128 ദേശീയപാതകളിൽ ടോൾ പിരിവ് തുടരുന്നതിനെതിരെ ഡൽഹി സ്വദേശിയായ അബ്ദുൽ കരീം അൻസാരി എന്നയാൾ നൽകിയ പൊതു താൽപര്യ ഹർജിയിൽ ഡൽഹി ഹൈക്കോടതി ദേശീയപാത അതോറിറ്റിക്ക് നോട്ടീസ് അയച്ചിട്ടുണ്ട്. തലപ്പാടി അടക്കം ദേശീയപാതകളുടെ നിർമ്മാണത്തുക പൂർണ്ണമായും തിരിച്ചു പിരിച്ചിട്ടും ടോൾ പിരിക്കുന്നത് ചോദ്യം ചെയ്തുകൊണ്ടാണ് ഈ പൊതു താൽപര്യ ഹർജി നൽകിയിരിക്കുന്നത്. ഈ കേസ് 2026 ജനുവരി 20-ന് കോടതി വീണ്ടും പരിഗണിക്കും.

ആരിക്കാടി ടോൾ പ്ലാസയുടെ നിർമ്മാണത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Arikkady Toll Gate construction nearing completion, causing daily traffic jams and public concern.

#ArikkadyTollGate #NH66 #TrafficJam #KasargodNews #TollPlaza #KeralaNews