ആരിക്കാടിയിലെ അന്യായ ടോൾ വിരുദ്ധ സമരത്തിനിടെ ഗതാഗതം തടസ്സപ്പെട്ടു: 500 പേർക്കെതിരെ കേസ്; പ്രതിഷേധം തുടരുമെന്ന് ആക്ഷൻ കമ്മിറ്റി

ആരിക്കാടി: (KasargodVartha) ടോൾ ബൂത്ത് സമരം അക്രമാസക്തമായതിനെത്തുടർന്ന് ബുധനാഴ്ച രാത്രി താത്കാലികമായി നിർത്തിവെച്ചെങ്കിലും, സമരം വ്യാഴാഴ്ച പുനരാരംഭിക്കുമെന്ന് സമരസമിതി അറിയിച്ചു. ഇക്കാര്യത്തിൽ അന്തിമ തീരുമാനമെടുക്കാൻ സമരസമിതിയുടെ അടിയന്തര യോഗം ചേരും. സമരത്തിൽ നിന്ന് പിന്തിരിയേണ്ടതില്ലെന്നാണ് പൊതുവികാരം.

ടോൾ ബൂത്തിലെ ക്യാമറകൾ, ജനൽ ചില്ലുകൾ, ഗേറ്റ് എന്നിവ അടിച്ചുതകർത്ത സംഭവത്തിൽ ദേശീയപാത അധികൃതരുടെ പരാതി ലഭിച്ചാൽ പൊതുമുതൽ നശിപ്പിച്ചതടക്കമുള്ള വകുപ്പുകൾ ചേർത്ത് കേസെടുക്കുമെന്ന് പോലീസ് അറിയിച്ചു. നിലവിൽ ദേശീയപാതയിൽ ഗതാഗതം തടസ്സപ്പെടുത്തിയതിന് കണ്ടാലറിയാവുന്ന അഞ്ഞൂറോളം പേർക്കെതിരെ കുമ്പള പോലീസ് കേസെടുത്തിട്ടുണ്ട്. പോലീസ് നോക്കിനിൽക്കെയായിരുന്നു അക്രമ സംഭവങ്ങൾ അരങ്ങേറിയത്.

അനിശ്ചിതകാല സമരം

അന്യായമായ ടോൾ പിരിവിനെതിരെ മഞ്ചേശ്വരം എം എൽ എ എ കെ എം അഷ്റഫിന്റെ നേതൃത്വത്തിൽ നടക്കുന്ന അനിശ്ചിതകാല സമരത്തിന്റെ രണ്ടാം ദിവസമാണ് അക്രമ സംഭവങ്ങൾ ഉണ്ടായത്. ബി ജെ പി ഒഴികെയുള്ള വിവിധ രാഷ്ട്രീയ പാർട്ടികളും സംഘടനകളും ഐക്യദാർഢ്യം അറിയിച്ച് എത്തിയത് വൻ ജനക്കൂട്ടത്തിന് കാരണമായി. നൂറോളം വരുന്ന പോലീസിന് സ്ഥിതിഗതികൾ നിയന്ത്രിക്കാൻ സാധിച്ചില്ല.

സാമൂഹിക വിരുദ്ധർ നുഴഞ്ഞുകയറിയെന്ന്

ഐക്യദാർഢ്യ ജാഥകളിൽ സാമൂഹിക വിരുദ്ധർ നുഴഞ്ഞുകയറി മനപ്പൂർവം സംഘർഷം ഉണ്ടാക്കുകയായിരുന്നുവെന്നാണ് സമരസമിതിയുടെ ആരോപണം. എന്നാൽ, പോലീസ് ഈ വാദം പൂർണമായും മുഖവിലയ്ക്കെടുത്തിട്ടില്ല. 

181(2), 189(3), 191(2) തുടങ്ങിയ വകുപ്പുകൾ ചേർത്താണ് കുമ്പള പോലീസ് ഇൻസ്പെക്ടർ മുകുന്ദൻ ടി കെ കേസെടുത്തിരിക്കുന്നത്. എല്ലാ വശങ്ങളും പരിശോധിച്ചും ചർച്ച ചെയ്തുമായിരിക്കും തുടർ സമരത്തിന്റെ കാര്യത്തിൽ തീരുമാനമെടുക്കുകയെന്ന് എം എൽ എയും സമരസമിതി അംഗങ്ങളും അറിയിച്ചു.

ഈ വാർത്ത ഷെയർ ചെയ്യൂ, നിങ്ങളുടെ അഭിപ്രായങ്ങൾ രേഖപ്പെടുത്തൂ

Article Summary: Police book 500 people following violent protests at Arikkadi toll plaza; Action Committee decides to continue the strike.

#ArikkadiToll #Kasaragod #Protest #AKMAshraf #Kumbala #KeralaNews