ഹൃദയം തൊട്ട നന്മ; അജ്ഞാതൻ താലിമാല തിരികെ നൽകി, ഒപ്പം ക്ഷമാപണ കുറിപ്പും

കാസർകോട്: (KasargodVartha) പൊയിനാച്ചിയിൽനിന്ന് പറമ്പയിലേക്ക് ബസ്സിൽ യാത്രചെയ്യവേ നഷ്ടപ്പെട്ട നാലര പവൻ തൂക്കമുള്ള താലിമാല ഒൻപത് ദിവസത്തിന് ശേഷം ഉടമയുടെ വീട്ടിൽ തിരിച്ചെത്തി. ഹൃദയസ്പർശിയായ കുറിപ്പിനൊപ്പമാണ് അജ്ഞാതനായ ഒരാൾ മാല തിരികെ എത്തിച്ചത്.

കാസർകോട് കുണ്ടംകുഴി സ്വദേശി ദാമോദരന്റെ ഭാര്യയുടെ താലിമാലയാണ് അവിചാരിതമായി നഷ്ടപ്പെട്ടത്. മാല നഷ്ടപ്പെട്ട വിവരം ദാമോദരൻ സമൂഹമാധ്യമങ്ങളിലും വാട്ട്‌സ്ആപ്പ് ഗ്രൂപ്പുകളിലും ചിത്രങ്ങളടക്കം പങ്കുവെച്ചിരുന്നു. മാല കൈവശം വെച്ച അജ്ഞാതൻ, അതൊരു മംഗല്യസൂത്രമാണെന്ന് മനസ്സിലാക്കിയപ്പോൾ 'നെഗറ്റീവ് ഫീലിങ്' തോന്നി എന്നും, മാല കൈവശം വെക്കാൻ മനസ്സ് വന്നില്ല എന്നും കുറിപ്പിൽ പറയുന്നു.

കുറിപ്പിലെ വാചകങ്ങൾ ഇങ്ങനെ:

‘ഈ മാല എനിക്ക് കിട്ടിയിട്ട് ഒമ്പത് ദിവസമായി. ആദ്യം സന്തോഷിച്ചു, പക്ഷേ കയ്യിലെടുക്കുന്തോറും ഒരു വിറയലും നെഗറ്റീവ് ഫീലിങ്ങും. വാട്ട്‌സ്ആപ്പിൽ മാല തിരികെ തരണമെന്ന അഭ്യർത്ഥന കണ്ടപ്പോഴാണ് ഇത് കെട്ടുതാലിയാണെന്ന് മനസ്സിലായത്.

വേണ്ട, ആരുടെതാണോ അവർക്കുതന്നെ കൊടുക്കണം എന്ന് തീരുമാനിച്ചു. വിലാസം കണ്ടെത്തി. ഞാൻ പരിചയപ്പെടുത്തുന്നില്ല. ഇത്രയും ദിവസം കൈവശം വെച്ചതിനും വേദനിച്ചതിനും മാപ്പ്…’

രാവിലെ പത്ത് മണിയോടെ ദാമോദരൻ വീട്ടിൽ നിന്ന് പുറപ്പെടാൻ ഇറങ്ങിയപ്പോഴാണ് സിറ്റൗട്ടിലെ ചാരുപടിയിൽ മാലയും കത്തും കണ്ടത്. ‘ദൈവത്തിന് നന്ദി. നഷ്ടപ്പെട്ട വിവരം പങ്കുവെച്ച എല്ലാ നല്ല മനസ്സുകളോടും കടപ്പാടുണ്ട്. മാല തിരികെ കൊണ്ടുവന്ന ആ സുഹൃത്തിന് സർവ്വേശ്വരൻ നല്ലത് വരുത്തട്ടെ,’ എന്ന് ദാമോദരൻ സമൂഹമാധ്യമത്തിൽ നന്ദി രേഖപ്പെടുത്തി.

ദാമോദരൻ്റെ വാക്കുകളിൽ, ‘മാല നഷ്ടപ്പെട്ടപ്പോൾ ഞാൻ പ്രാർത്ഥിച്ചത്, അത് കിട്ടുന്നയാളുടെ കഷ്ടപ്പാടുകൾ മാറി അവർ നല്ലൊരു ജീവിതം നയിക്കട്ടെ എന്നായിരുന്നു. ആ പ്രാർത്ഥനയ്ക്ക് ദൈവം നൽകിയ പ്രതിഫലമാണിത്.’

ഈ ഹൃദയസ്പർശിയായ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: An anonymous person returns a lost thali chain with a note.

#Kasaragod, #Humanity, #GoodSamaritan, #Kerala, #LostAndFound, #ThaliChain