അനന്തപുരം വ്യവസായ കേന്ദ്രത്തിൽ വൻ അപകടം: പ്ലൈവുഡ് ഫാക്ടറിയിലെ ബോയിലർ പൊട്ടിത്തെറിച്ച് തൊഴിലാളി മരിച്ചു; നിരവധി പേർക്ക് ഗുരുതര പരിക്ക്

കുമ്പള: (KasargodVartha) കാസർകോട് ജില്ലയിലെ കുമ്പള അനന്തപുരം വ്യവസായ കേന്ദ്രത്തിൽ പ്രവർത്തിക്കുന്ന ഫാക്ടറിയിൽ ബോയിലർ പൊട്ടിത്തെറിച്ച് വൻ അപകടം. തിങ്കളാഴ്ച വൈകീട്ട് 7.30 മണിയോടെയാണ് സംഭവം. ഉഗ്ര സ്ഫോടനത്തിൽ തൊഴിലാളി മരിച്ചു  10 തൊഴിലാളികൾക്ക് ഗുരുതരമായി പരിക്കേൽക്കുകയും ചെയ്തു.

എറണാകുളം പെരുമ്പാവൂർ സ്വദേശി പോളിയുടെ ഉടമസ്ഥതയിലുള്ള 'ഡെക്കോർ പാനൽ ഇൻഡസ്ട്രീസ്’ ഫാക്ടറിയിലാണ് വൻ ദുരന്തമുണ്ടായത്.

നിരവധി പേർ ഗുരുതരാവസ്ഥയിൽ

സ്ഫോടനത്തിൻ്റെ തീവ്രത ഫാക്ടറി കെട്ടിടത്തിന്റെ ഭാഗങ്ങൾ തകർത്തു. മരിച്ചത് അസം സ്വദേശിയായ നജീറുൽ അലി (19) ആണ്..

അപകടം നടക്കുമ്പോൾ ഫാക്ടറിക്കുള്ളിൽ ജോലിയിലുണ്ടായിരുന്ന തൊഴിലാളികൾക്കാണ് പരിക്കേറ്റത്. ഇവരിൽ പലരുടെയും നില അതീവ ഗുരുതരമായതിനാൽ, പതിനഞ്ചോളം ആംബുലൻസുകൾ എത്തിച്ച് ഉടൻതന്നെ കുമ്പളയിലെയും മംഗളൂരുവിലെയും ആശുപത്രികളിലേക്ക് മാറ്റി. ഗുരുതരമായി പരിക്കേറ്റവരെ വിദഗ്ധ ചികിത്സയ്ക്കായി പ്രധാനമായും മംഗളൂരുവിലെ ആശുപത്രികളിലേക്കാണ് കൊണ്ടുപോയത്.

ഉഗ്രശബ്ദത്തിൽ നാടു നടുങ്ങി; പ്രകമ്പനം ദൂരെയെത്തി

സ്ഫോടനത്തിൻ്റെ ശബ്ദം വളരെ ഉച്ചത്തിലായിരുന്നെന്നും, ശക്തമായ പ്രകമ്പനം അനുഭവപ്പെട്ടതായും ഒരു ദൃക്സാക്ഷി കാസർകോട് വാർത്തയോട് പറഞ്ഞു. സമീപ പ്രദേശങ്ങളിലെ വീടുകളിലടക്കം ഈ പ്രകമ്പനം അനുഭവപ്പെട്ടതിനാൽ നാട്ടുകാർ വലിയ ഭീതിയിലായി. സ്ഫോടനത്തിൻ്റെ കാരണം എന്താണെന്ന് ഇതുവരെ വ്യക്തമായിട്ടില്ലെന്ന് ഉന്നത പോലീസ് ഉദ്യോഗസ്ഥർ അറിയിച്ചു.

അപകടവിവരം ലഭിച്ച ഉടൻതന്നെ ഉന്നത പോലീസ് ഉദ്യോഗസ്ഥരും കുമ്പള പോലീസും സ്ഥലത്തെത്തി രക്ഷാപ്രവർത്തനങ്ങൾക്ക് നേതൃത്വം നൽകി. കാസർകോട്, ഉപ്പള എന്നിവിടങ്ങളിൽ നിന്നുള്ള അഗ്നിശമന സേനാ യൂണിറ്റുകളും ഉടൻ സംഭവസ്ഥലത്തെത്തി രക്ഷാപ്രവർത്തനം ഏകോപിപ്പിച്ചു.

കൂടുതൽ ആളുകൾ കെട്ടിടാവശിഷ്ടങ്ങൾക്കിടയിൽ കുടുങ്ങിക്കിടക്കുന്നുണ്ടോ എന്ന് അഗ്നിശമന സേന പരിശോധിച്ചുവരികയാണ്. ഫാക്ടറി പരിസരത്ത് വൻ ജനക്കൂട്ടം തടിച്ചുകൂടിയത് രക്ഷാപ്രവർത്തനത്തിന് ചെറിയ തടസ്സങ്ങൾ സൃഷ്ടിച്ചു. ബോയിലർ പൊട്ടിത്തെറിക്കാൻ കാരണം നിലവാരമില്ലായ്മയോ, സാങ്കേതിക തകരാറാണോ അതോ സുരക്ഷാ വീഴ്ചയാണോ എന്നതിനെക്കുറിച്ച് വിശദമായ അന്വേഷണം ആരംഭിച്ചതായി അധികൃതർ വ്യക്തമാക്കി.

ഈ വാർത്തയെക്കുറിച്ച് നിങ്ങൾക്കെന്താണ് പറയാനുള്ളത്? നിങ്ങളുടെ അഭിപ്രായങ്ങൾ കമൻ്റ് ചെയ്യുക. 

Updated..

Article Summary: Boiler blast at a plywood factory in Ananthapuram Industrial Centre kills two and injures over 20.

#BoilerExplosion #KasaragodAccident #Ananthapuram #FactoryAccident #IndustrialSafety #KeralaNews