മലയാളികൾ ഇന്നും ഏറ്റവും കൂടുതൽ വായിക്കുന്നത് ബഷീർ കൃതികൾ: അംബികാസുതൻ മാങ്ങാട്

കാസർകോട്: (KasargodVartha) മലയാളികൾ ഇന്നും ഏറ്റവും കൂടുതൽ വായിക്കുന്നത് വൈക്കം മുഹമ്മദ് ബഷീറിൻ്റെ കൃതികളാണെന്ന് പ്രശസ്ത എഴുത്തുകാരൻ അംബികാസുതൻ മാങ്ങാട് പറഞ്ഞു. ബഷീർ കൃതികൾ പരത്തിയ വെളിച്ചം കാലം കഴിയുന്തോറും മങ്ങുന്നതിന് പകരം കൂടുതൽ പ്രകാശമുള്ളതായി മാറിക്കൊണ്ടിരിക്കുകയാണെന്നും അദ്ദേഹം കൂട്ടിച്ചേർത്തു. വിവര പൊതുജന സമ്പർക്ക വകുപ്പ് കാസർകോട് ജില്ലാ ഇൻഫർമേഷൻ ഓഫീസും കലക്ടറേറ്റ് അക്ഷര ലൈബ്രറിയും ചേർന്ന് വായന പക്ഷാചരണത്തിന്റെ ഭാഗമായി സംഘടിപ്പിച്ച വൈക്കം മുഹമ്മദ് ബഷീർ അനുസ്മരണവും ബഷീർ ചെറുകഥാ പുരസ്കാര ദാനവും ഉദ്ഘാടനം ചെയ്ത് സംസാരിക്കുകയായിരുന്നു അംബികാസുതൻ മാങ്ങാട്.

ബഷീർ സാഹിത്യത്തിൻ്റെ പ്രസക്തി

ബഷീറിൻ്റെ കലയിലാകെ നിറഞ്ഞുതുളുമ്പുന്ന ഭൂതകാരുണ്യമാണ് അദ്ദേഹത്തിൻ്റെ കൃതികളെ കാലാതീതമാക്കുന്നതെന്ന് അംബികാസുതൻ ചൂണ്ടിക്കാട്ടി. 'നല്ല ഒരു മനുഷ്യന് മാത്രമേ നല്ല ഒരു എഴുത്തുകാരനാകാൻ കഴിയൂ' എന്ന് ബഷീർ പലപ്പോഴും പറയാറുണ്ടായിരുന്നു. 'ശബ്ദങ്ങൾ' എന്ന കൃതിയിൽ ബഷീർ ചോദിക്കുന്നു: 'നിങ്ങൾ എന്തെങ്കിലും സ്വന്തമായി ചെയ്ത് അതിൻ്റെ സുഖം അനുഭവിച്ചിട്ടുണ്ടോ?' ഒരു ചെടിയെങ്കിലും നട്ടുപിടിപ്പിച്ച് അതിൻ്റെ പൂവും കായും കാണുക, ഏതെങ്കിലും ഒരു പുതിയ സാധനം ഉണ്ടാക്കുക, ദാഹിച്ചുവരുന്ന ജീവിക്ക് വെള്ളം കൊടുക്കുക, വിശന്നുവരുന്ന മനുഷ്യന് ആഹാരം കൊടുക്കുക എന്നിങ്ങനെയുള്ള കാര്യങ്ങളിലൂടെയാണ് ബഷീർ മാനവികതയെ വിളംബരം ചെയ്തത്. ബഷീറിന് സാഹിത്യ രചന കേവലാനന്ദം ആയിരുന്നില്ല, അതൊരു സൽപ്രവർത്തിയായിരുന്നു. വെളിച്ചത്തിൻ്റെ വെളിച്ചം പ്രസരിപ്പിക്കുന്ന കലകളിൽ ഏറ്റവും മേന്മയുള്ളതാണ് അദ്ദേഹത്തിൻ്റെ രചനകൾ.

ബഷീറിൻ്റെ സ്ഥാനം മലയാള സാഹിത്യത്തിൽ

വലിയ പുരസ്കാരങ്ങളൊന്നും ബഷീറിന് ലഭിച്ചിട്ടില്ലെങ്കിലും, കാലം കഴിയുന്തോറും പുതുമയോടെ അനുഭവപ്പെടുന്ന ഗദ്യവും ആഖ്യാനവുമാണ് അദ്ദേഹം നിർമ്മിച്ചത്. സർവ്വലോകത്തിനും സർവ്വകാലത്തിനും വേണ്ടപ്പെട്ടവനും പ്രിയപ്പെട്ടവനുമാണ് ബഷീർ എന്ന് അംബികാസുതൻ മാങ്ങാട് അടിവരയിട്ടു പറഞ്ഞു. മനുഷ്യരെ മാത്രമല്ല, മരങ്ങളെയും പക്ഷികളെയും പൂക്കളെയും പാമ്പുകളെയും സകല ചരാചരങ്ങളെയും അദ്ദേഹം സ്നേഹിച്ചു. ചുരുങ്ങി ചെറുതാവുന്നതിനു പകരം കാലം കഴിയുന്തോറും ബഷീർ വലുതായിക്കൊണ്ടിരിക്കുകയാണ്. കവിതയിൽ മഹാകവി പി.യും കഥയിൽ വൈക്കം മുഹമ്മദ് ബഷീറും ഇരട്ട സഹോദരങ്ങളാണെന്നും അദ്ദേഹം അഭിപ്രായപ്പെട്ടു.

പുരസ്കാര ദാനവും അനുസ്മരണ ചടങ്ങും

ജില്ലാ ഇൻഫർമേഷൻ ഓഫീസർ എം. മധുസൂദനൻ അധ്യക്ഷത വഹിച്ച ചടങ്ങിൽ ഡെപ്യൂട്ടി കലക്ടർ (ആർ.ആർ) കെ. അജേഷ്, അംബികാസുതൻ മാങ്ങാടിനെ ആദരിച്ചു. അസിസ്റ്റൻ്റ് എഡിറ്റർ എ.പി. ദിൽന അവാർഡ് ജേതാക്കളെ പരിചയപ്പെടുത്തി. കളക്ടറേറ്റ് സീനിയർ ക്ലർക്ക് എം. ഉദയപ്രകാശ് സംസാരിച്ചു. അക്ഷര ലൈബ്രറി സെക്രട്ടറി കെ. മുകുന്ദൻ സ്വാഗതവും പ്രസിഡൻ്റ് എ. ആശാലത നന്ദിയും പറഞ്ഞു.

വൈക്കം മുഹമ്മദ് ബഷീർ ചെറുകഥാ പുരസ്കാരം ഇ.കെ. നിധീഷിനും ജൂറിയുടെ പ്രത്യേക പരാമർശനത്തിനുള്ള പുരസ്കാരം സുധീഷ് ചട്ടഞ്ചാലിനും അംബികാസുതൻ മാങ്ങാട് സമ്മാനിച്ചു. ഹൈസ്കൂൾ, യു.പി. വിദ്യാർത്ഥികളുടെ മലയാളം, കന്നഡ വിഭാഗങ്ങളിൽ സാഹിത്യ ആസ്വാദനക്കുറിപ്പ് മത്സരത്തിൽ വിജയികളായവർക്കും ചടങ്ങിൽ സമ്മാനങ്ങൾ നൽകി.

ബഷീർ കൃതികളെക്കുറിച്ചുള്ള നിങ്ങളുടെ അഭിപ്രായങ്ങൾ കമൻ്റ് ബോക്സിൽ രേഖപ്പെടുത്തുക.

Article Summary: Ambikasuthan Mangad praises Vaikom Muhammad Basheer's timeless works.

#Basheer #MalayalamLiterature #AmbikasuthanMangad #KeralaNews #Kasargod #Reading