എയിംസ് വിഷയത്തിൽ ബിജെപിയിൽ ഭിന്നത; സുരേഷ് ഗോപിയെ തള്ളി ശ്രീകാന്ത്

കാസർകോട്: (KasargodVartha) കേരളത്തിന് അനുവദിക്കുമെന്ന് പ്രഖ്യാപിച്ച ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് (എയിംസ്) സ്ഥാപിക്കുന്ന കാര്യത്തിൽ ബിജെപിക്കുള്ളിൽ കടുത്ത അഭിപ്രായ ഭിന്നത പുറത്തുവരുന്നു.

കേന്ദ്രമന്ത്രി സുരേഷ് ഗോപി എയിംസ് ആലപ്പുഴയിലാണ് വരേണ്ടതെന്ന് ആവർത്തിച്ച് പറഞ്ഞതിന് പിന്നാലെയാണ് പാർട്ടിയിൽ തന്നെ വ്യത്യസ്തമായ നിലപാടുമായി ബിജെപി കോഴിക്കോട് മേഖലാ പ്രസിഡന്റായ അഡ്വ. ശ്രീകാന്ത് പ്രതികരിച്ചത്. കാസർകോടിന്റെ ആരോഗ്യമേഖലയിലെ പിന്നാക്കാവസ്ഥ കണക്കിലെടുത്ത് എയിംസ് അനുവദിക്കുമ്പോൾ മുൻഗണന കാസർകോടിനായിരിക്കണം എന്നതാണ് അദ്ദേഹത്തിന്റെ വാദം.

കേരളത്തിൽ എയിംസ് സ്ഥാപിക്കണമെന്ന ആവശ്യവുമായി കാസർകോട് ജില്ലയിൽ 2017 മുതൽ ജനകീയ കൂട്ടായ്മകളും സമരങ്ങളും നടക്കുന്നുണ്ട്. ഇതോടെ പാർട്ടിയിലെ പ്രമുഖ നേതാക്കൾക്കിടയിലും അഭിപ്രായഭിന്നത തുറന്നുകാട്ടപ്പെടുകയാണ്.

സുരേഷ് ഗോപി കഴിഞ്ഞ ദിവസം ആലപ്പുഴയിൽ നടത്തിയ പ്രസംഗത്തിൽ, ‘വികസനത്തിൽ പിന്നാക്കമാണ് ആലപ്പുഴ. അതുകൊണ്ട് എയിംസ് അവിടെ സ്ഥാപിക്കണം. അത് രാഷ്ട്രീയമായി ആരെങ്കിലും എതിർക്കുന്നുവെങ്കിൽ, എനിക്ക് അത് തൃശൂരിലേക്ക് കൊണ്ടുവരാൻ മടി ഇല്ല’ എന്ന് പറഞ്ഞിരുന്നു. അതും നടന്നില്ലെങ്കിൽ തമിഴ്നാട്ടിലേക്ക് കൊണ്ടുപോകുമെന്നും മന്ത്രി പറഞ്ഞിരുന്നു.

എന്നാൽ, കാസർകോടിന്റെ ആരോഗ്യപ്രശ്നങ്ങൾ പ്രത്യേകിച്ച് എൻഡോസൾഫാൻ ദുരന്തം മൂലമുള്ള ആരോഗ്യ പ്രതിസന്ധികൾ പരിഗണിക്കാതിരിക്കുന്നത് ശരിയായ തീരുമാനമല്ലെന്ന് അഡ്വ. ശ്രീകാന്ത് വ്യക്തമാക്കി. എയിംസ് പോലുള്ള സൂപ്പർ സ്പെഷ്യാലിറ്റി ഗവേഷണ ആശുപത്രി കാസർകോടിന് അത്യാവശ്യമാണെന്നും, ഇത് രോഗികൾക്ക് ദീർഘയാത്ര ഒഴിവാക്കാനും മികച്ച ചികിത്സ ഉറപ്പാക്കാനും സഹായകമാകുമെന്നും അദ്ദേഹം പറഞ്ഞു.

എയിംസ് സ്ഥാപിക്കുന്നതുമായി ബന്ധപ്പെട്ട് സംസ്ഥാന സർക്കാർ സ്ഥലം കണ്ടെത്തുന്നതിൽ കാലതാമസം വരുത്തുന്നുവെന്ന് നേരത്തേയും ബിജെപി നേതാക്കൾ ആരോപണം ഉന്നയിച്ചിരുന്നു. പുതിയ അഭിപ്രായഭിന്നതകളോടെ വിഷയം പാർട്ടിയിലും സംസ്ഥാന രാഷ്ട്രീയത്തിലും കൂടുതൽ ചർച്ചകൾക്ക് വഴിയൊരുക്കുകയാണ്.

സുരേഷ് ഗോപിയുടെ ആലപ്പുഴയിലെ പ്രസ്താവനയെ സ്വാഗതം ചെയ്തുകൊണ്ട് രംഗത്തെത്തിയ കോൺഗ്രസ് നേതാവും ആലപ്പുഴ ജില്ലയിൽ നിന്നുള്ള എംഎൽഎയുമായ രമേശ് ചെന്നിത്തലയുടെ നടപടിയെയും ശ്രീകാന്ത് വിമർശിച്ചു. കാസർകോടിന്റെ പിന്നോക്കാവസ്ഥ പരിഹരിക്കാൻ ഒരു കമ്മീഷനെ വെച്ച് പദ്ധതികൾ പ്രഖ്യാപിച്ചിട്ടും ആലപ്പുഴയിൽ എയിംസ് സ്ഥാപിക്കണമെന്ന് വാദിക്കുന്നത് ഇരട്ടത്താപ്പാണെന്നും രാഷ്ട്രീയ മുതലെടുപ്പാണെന്നും ശ്രീകാന്ത് കുറ്റപ്പെടുത്തി.
 

എയിംസ് കേരളത്തിൽ എവിടെ സ്ഥാപിക്കണം? നിങ്ങളുടെ അഭിപ്രായം രേഖപ്പെടുത്തുക.

Article Summary: BJP split over AIIMS location in Kerala, with leaders supporting different districts.

#AIIMS #SureshGopi #BJP #KeralaPolitics #Kasaragod #Alappuzha