Retirement | സേവനവഴിയിൽ കാൽ നൂറ്റാണ്ട്; ജനകീയ ഡോക്ടർ എ എ അബ്ദുൽ സത്താർ കാസർകോട് ജനറൽ ആശുപത്രിയിൽ നിന്ന് പടിയിറങ്ങി; നന്മയുടെ ഓർമകൾ ബാക്കി

കാസർകോട്: (KasargodVartha) കാൽനൂറ്റാണ്ട് കാലം കാസർകോട് ജനറൽ ആശുപത്രിയിൽ സേവനമനുഷ്ഠിച്ച ശ്വാസകോശ രോഗ വിദഗ്ദൻ ഡോക്ടർ എ എ അബ്ദുൽ സത്താർ തന്റെ ഔദ്യോഗിക ജീവിതത്തിൽ നിന്നും പടിയിറങ്ങി. സാധാരണക്കാരായ ജനങ്ങളുടെ ആരോഗ്യ പരിപാലനത്തിനായി ജീവിതം ഉഴിഞ്ഞുവെച്ച ഈ ജനകീയ ഡോക്ടർക്ക് സ്നേഹനിർഭരമായ യാത്രയയപ്പാണ് നാട് നൽകിയത്.

പൊതുവിദ്യാലയങ്ങളിൽ പഠിച്ച അബ്ദുൽ സത്താർ മെറിറ്റിൽ കോഴിക്കോട് മെഡികൽ കോളജിൽ നിന്നാണ്  ബിരുദം കരസ്ഥമാക്കിയത്. ശ്വാസകോശ രോഗ വിഭാഗത്തിൽ ബിരുദാനന്തര ബിരുദവും അദ്ദേഹം സ്വന്തമാക്കി. തുടർന്ന് യുകെയിലെ റോയൽ കോളജ് ഓഫ് ഫിസിഷ്യൻസിൽ നിന്നും എം.ആർ.സി.പി, ഗ്ലാസ്ഗോ റോയൽ കോളജ് ഓഫ് ഫിസിഷ്യൻസിൽ നിന്ന് എഫ്.ആർ.സി.പി എന്നിവയും കരസ്ഥമാക്കി. ഇതിനുപുറമെ ത്രിപുരയിലെ ഐ.സി.എഫ്.എ.ഐ യൂണിവേഴ്സിറ്റിയിൽ നിന്ന് ഹോസ്പിറ്റൽ അഡ്മിനിസ്ട്രേഷനിൽ ഡിപ്ലോമയും എം.ബി.എയും നേടി.

കാസർകോട് ജനറൽ ആശുപത്രിയിൽ 25 വർഷക്കാലം സേവനമനുഷ്ഠിച്ച ഡോക്ടർ അബ്ദുൽ സത്താർ, സാധാരണക്കാരായ രോഗികൾക്ക് എന്നും ഒരു കൈത്താങ്ങായിരുന്നു. രോഗികളുടെ വേദനകളിൽ അലിഞ്ഞുചേർന്ന്, അവരുടെ ദുരിതങ്ങൾക്ക് സാന്ത്വനമേകിയ അദ്ദേഹം ആരോഗ്യരംഗത്ത് മായാത്ത ഒരടയാളം സൃഷ്ടിച്ചു. ആശുപത്രിയിലെ സഹപ്രവർത്തകർക്കും, ജീവനക്കാർക്കും അദ്ദേഹം ഒരുപോലെ പ്രിയങ്കരനായിരുന്നു. സഹപ്രവർത്തകരുമായി നല്ല ബന്ധം പുലർത്തിയിരുന്ന അദ്ദേഹം, ആശുപത്രിയുടെ വളർച്ചയ്ക്കും വികസനത്തിനും വേണ്ടി അക്ഷീണം പ്രയത്നിച്ചു.

തിരക്കേറിയ ഔദ്യോഗിക ജീവിതത്തിനിടയിലും നല്ലൊരു വായനക്കാരനും എഴുത്തുകാരനും കൂടിയായിരുന്നു അദ്ദേഹം. പുലർകാല കാഴ്ചകൾ, ആരോഗ്യത്തിലേക്ക് തുറക്കുന്ന വാതിൽ, യാത്രകൾ അനുഭവങ്ങൾ, ഓർമ്മകൾ പെയ്യുന്ന ഇടവഴികൾ എന്നിവയാണ് അദ്ദേഹത്തിൻ്റെ പ്രധാന കൃതികൾ. കാസർകോടിന്റെ സാമൂഹിക സാംസ്കാരിക രംഗങ്ങളിലും ഡോക്ടർ അബ്ദുൽ സത്താർ സജീവമായിരുന്നു. നാടിന്റെ നന്മയ്ക്കായി പ്രവർത്തിക്കുന്നതിൽ അദ്ദേഹം എപ്പോഴും മുന്നിലുണ്ടായിരുന്നു.

സ്നേഹനിർഭരമായ യാത്രയയപ്പ്

ആശുപത്രി സ്റ്റാഫ് കൗൺസിൽ സംഘടിപ്പിച്ച യാത്രയയപ്പ് ചടങ്ങിൽ ഡോക്ടർ അബ്ദുൽ സത്താറിനെ സ്നേഹത്തോടെയും ആദരവോടെയുമാണ് യാത്രയാക്കിയത്. അബ്ദുൽ സത്താറിലെ ഡോക്ടറെയും, എഴുത്തുകാരനെയും, വോളിബോൾ കളിക്കാരനെയും സഹപ്രവർത്തകർ അനുസ്മരിച്ചു. എഫ്.ആർ.സി.പി, എം.ആർ.സി.പി ഉൾപ്പെടെയുള്ള വിദേശ ബിരുദങ്ങൾ ഉണ്ടായിരുന്നിട്ടും സ്വകാര്യ മേഖലയിലേക്ക് പോകാതെ വിരമിക്കുന്നത് വരെ സർകാർ ആശുപത്രിയിൽ സേവനം ചെയ്തത് അദ്ദേഹത്തിൻ്റെ പാവപ്പെട്ട രോഗികളോടുള്ള പ്രതിബദ്ധതയാണ് കാണിക്കുന്നതെന്ന് സഹപ്രവർത്തകർ പറഞ്ഞു. 

ആശുപത്രി സൂപ്രണ്ട് ഡോ. ശ്രീകുമാർ മുകുന്ദ് യാത്രയയപ്പ് യോഗം ഉദ്ഘാടനം ചെയ്തു. ഡെപ്യൂട്ടി സൂപ്രണ്ട് ഡോ. ജമാൽ അഹ്‌മദ്‌ എ മുഖ്യ പ്രഭാഷണം നടത്തി. സ്റ്റാഫ് കൗൺസിൽ പ്രസിഡൻ്റ് ഡോ. ഷെരീന പി.എ അധ്യക്ഷത വഹിച്ചു. ഡോ. സുനിൽ ചന്ദ്രൻ ഡോ. സത്താറിനെ സദസ്സിന് പരിചയപ്പെടുത്തി സംസാരിച്ചു. സ്റ്റാഫ് കൗൺസിൽ സെക്രട്ടറി സതീശൻ ടി, ഡോ. ജനാർദ്ദന നായിക്, ഡോ. അഹ്‌മദ്‌ സാഹിർ, ഡോ. വാസന്തി, ഡേവിസ്, ചന്ദ്രാവതി, ലത, ഷെൽജി, ഹരീന്ദ്രനാഥ്, ഷാജി തുടങ്ങിയവർ സംസാരിച്ചു. വൈകുന്നേരം മരച്ചുവട്ടിൽ ജനറൽ ആശുപത്രി റീഡേഴ്സ് ഫോറത്തിൻ്റെ ആഭിമുഖ്യത്തിൽ നടന്ന യാത്രയയപ്പ് ചടങ്ങിന് അശ്റഫ് എടനീർ, ഖലീൽ ഷെയ്ഖ്, ശ്രീധരൻ, മാഹിൻ കുന്നിൽ തുടങ്ങിയവർ നേതൃത്വം നൽകി

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Dr. A A Abdul Sattar bids farewell after 25 years of dedicated service to Kasargod General Hospital, leaving behind cherished memories and a legacy of public service.

#Kasaragod #HealthcareHeroes #DrAAAbdulSattar #MedicalLegacy #PublicService #Farewell