Reunion | അരനൂറ്റാണ്ടിന് ശേഷം ഗുരുവിനെ തേടിയെത്തി ശിഷ്യർ; കരിവെള്ളൂർ സ്കൂളിലെ പൂർവ വിദ്യാർഥിനികളുടെ സ്നേഹോഷ്മളമായ കൂടിക്കാഴ്ച

കരിവെള്ളൂർ: (KasargodVartha) അൻപത് വർഷം മുൻപ് കരിവെള്ളൂർ നോർത്ത് എൽ പി സ്കൂളിൽ തങ്ങളുടെ പ്രിയപ്പെട്ട അധ്യാപകന്റെ മുന്നിലിരുന്ന അതേ മനസ്സുമായി മൂന്ന് പൂർവ വിദ്യാർഥിനികൾ വീണ്ടുമെത്തി. 1974-75 കാലഘട്ടത്തിൽ അഞ്ചാം ക്ലാസ്സിൽ പഠിച്ചിരുന്ന ശകുന്തള, പ്രേമലത, രമണി എന്നിവരാണ് തങ്ങളുടെ ഗുരു കൂക്കാനം റഹ്‌മാൻ മാസ്റ്ററെ കാണുവാനായി എത്തിയത്. വർഷങ്ങൾക്കിപ്പുറം തങ്ങളുടെ പ്രിയപ്പെട്ട ‘പാക്കത്തോറ് മാഷി’നെ കണ്ടപ്പോൾ അവർക്ക് നൂറ് നാവായിരുന്നു.

അന്നത്തെ ക്ലാസ് മുറിയും കളികളും സസ്യങ്ങളെയും ജീവജാലങ്ങളെയും കുറിച്ച് മാഷ് പഠിപ്പിച്ചു തന്ന കാര്യങ്ങളും അവർ ഓർത്തെടുത്തു. ശകുന്തളയുടെ മനോഹരമായ പാട്ടിനെക്കുറിച്ചും കൂട്ടുകാരികൾ വാതോരാതെ സംസാരിച്ചു. മാഷിന് വേണ്ടി ശകുന്തള ഒരു സിനിമാഗാനം ആലപിച്ചപ്പോൾ ആ കൂടിക്കാഴ്ച കൂടുതൽ ഹൃദ്യമായി. മാഷിന്റെ വേഷവിധാനത്തെക്കുറിച്ചും കുട്ടിക്കാലത്തെ കൗതുകകരമായ ഓർമ്മകൾ അവർ പങ്കുവെച്ചു. അഞ്ചാം ക്ലാസ്സിലെ ഗ്രൂപ്പ് ഫോട്ടോയും അവർ മാഷിനെ കാണിച്ചു. അന്ന് മാഷിന്റെ അടുത്ത് നിന്ന് ഒരു ഫോട്ടോ എടുക്കാൻ കഴിഞ്ഞില്ലെന്ന വിഷമം അവർ പങ്കുവെച്ചപ്പോൾ, ആ ആഗ്രഹം ഇന്ന് സഫലീകരിക്കണമെന്ന അവരുടെ വാക്കുകൾക്ക് മാഷ് സന്തോഷത്തോടെ സമ്മതം മൂളി.

വർഷങ്ങൾക്കിപ്പുറം വീട്ടമ്മമാരായി കഴിയുന്ന ഇവർ, തങ്ങളുടെ കുട്ടിക്കാലത്തെ ഓർമ്മകളും വിദ്യാലയത്തെയും അധ്യാപകരെയും കുറിച്ചുള്ള സ്നേഹവും ഇന്നും മനസ്സിൽ സൂക്ഷിക്കുന്നു എന്നത് ശ്രദ്ധേയമാണ്. മക്കളും കൊച്ചുമക്കളുമായി സന്തോഷകരമായ ജീവിതം നയിക്കുന്ന ഇവർ, തങ്ങളുടെ പ്രാഥമിക വിദ്യാഭ്യാസം നേടിയ വിദ്യാലയത്തെയും അധ്യാപകരെയും ഓർക്കുന്നത് അഭിനന്ദനാർഹമാണ് എന്ന് കൂക്കാനം റഹ്‌മാൻ അഭിപ്രായപ്പെട്ടു. സ്നേഹോഷ്മളമായ ഈ കൂടിക്കാഴ്ചയുടെ ഓർമ്മയ്ക്കായി മാഷ് തന്റെ പുസ്തകങ്ങൾ അവർക്ക് സമ്മാനിച്ചു.

#TeacherReunion #SchoolMemories #OldStudents #Heartwarming #TeacherLove #Nostalgia