കേരള–കർണാടക അതിർത്തിയിൽ പാതയോരം കയ്യേറി പെട്രോൾ പമ്പ് ഉടമ പാകിയ ഇൻറർലോക്ക് നിലം പിഡബ്ല്യുഡി ഉദ്യോഗസ്ഥർ ഇടപെട്ട് പൊളിച്ചുനീക്കി

ആദൂർ: (KasargodVartha) കേരള–കർണാടക അതിർത്തിയിലെ കൊട്ടിയാടിയിൽ പാതയോരം കയ്യേറി പെട്രോൾ പമ്പ് ഉടമ നിർമ്മിച്ച ഇൻറർലോക്ക് നിലം പിഡബ്ല്യുഡി ഉദ്യോഗസ്ഥർ ഇടപെട്ട് പൊളിച്ചുനീക്കി. സുരക്ഷാ മാനദണ്ഡങ്ങളും നിയമ-നിബന്ധനകളും ലംഘിച്ചുവെന്നാരോപിച്ച് പ്രദേശവാസികൾ ഉയർത്തിയ ശക്തമായ പ്രതിഷേധത്തെ തുടർന്നാണ് ഈ കർശന നടപടി.

നെട്ടണിഗെ മുദ്‌നൂർ കൊട്ടിയാടി മേഖലയിൽ പുതുതായി പ്രവർത്തനം തുടങ്ങിയ 'അടൂർ ഫിയാൻസ്' (നയന എനർജി) പെട്രോൾ പമ്പിനെതിരെയാണ് വ്യാപകമായ പരാതി ഉയർന്നിരുന്നത്. ജനവിരുദ്ധ പ്രവർത്തനങ്ങളാണ് പമ്പുടമയുടെ ഭാഗത്ത് നിന്നും ഉണ്ടായതെന്ന് ആരോപിച്ചാണ് നാട്ടുകാർ പ്രതിഷേധവുമായി രംഗത്തെത്തിയത്. പമ്പ് ഒരു റിട്ട. കളക്ടറുടെ ഉടമസ്ഥതയിലാണെന്നും, ഈ സ്വാധീനം ഉപയോഗിച്ചാണ് പമ്പിന് പെർമിറ്റ് അനധികൃതമായി എളുപ്പത്തിൽ ലഭിച്ചതെന്നുമാണ് നാട്ടുകാരുടെ പ്രധാന ആരോപണം.

സുരക്ഷാ മാനദണ്ഡങ്ങൾ ലംഘിച്ചു

പത്തൂർ വില്ലേജിലെ പൊതുജനങ്ങൾ നേരത്തെ തന്നെ പമ്പ് സുരക്ഷാ മാനദണ്ഡങ്ങൾക്ക് വിരുദ്ധമായാണ് സ്ഥാപിച്ചതെന്ന് ബന്ധപ്പെട്ട അധികാരികൾക്ക് നിവേദനം നൽകിയിരുന്നു. പമ്പിൽ സ്ഥാപിച്ച പെട്രോൾ സ്റ്റോക്ക് ടാങ്കിൽ ചോർച്ചയുണ്ടെന്നും, ഇതിലൂടെ വലിയ അപകട സാധ്യത നിലനിൽക്കുന്നുണ്ടെന്നുമായിരുന്നു മറ്റൊരു പരാതി.

മഴവെള്ളം ഒഴുകി പോകേണ്ട ഓവുചാൽ തടസ്സപ്പെടുത്തി റോഡ് കയ്യേറി ഇൻറർലോക്ക് പാകിയതോടെ ജലം സമീപത്തെ  കൃഷിയിടങ്ങളിലേക്ക് ചെന്ന് വ്യാപക കൃഷിനാശമുണ്ടാക്കി. ഇത് കൂടാതെ, പമ്പ് പരിസരത്ത് കൂട്ടിയിട്ടിരിക്കുന്ന പ്ലാസ്റ്റിക് മാലിന്യങ്ങളും പ്രദേശത്ത് ഭീഷണി സൃഷ്ടിച്ചിരുന്നു.

പിഡബ്ല്യുഡി നിബന്ധന അനുസരിച്ച് പമ്പ് റോഡിൽ നിന്ന് 40 മീറ്റർ അകലത്തിൽ സ്ഥാപിക്കണമെങ്കിലും, ഇവിടെ വെറും 20 മീറ്റർ മാത്രം അകലമാണ് സ്ഥാപിച്ചത്. ഇതേ തുടർന്ന് പിഡബ്ല്യുഡി പമ്പുടമയ്ക്ക് നോട്ടീസ് നൽകിയിരുന്നു.

പിഡബ്ല്യുഡി നടപടി

കാസർകോട് ബദിയടുക്ക പിഡബ്ല്യുഡി അസിസ്റ്റൻ്റ് എൻജിനീയർ ആണ് പെട്രോൾ പമ്പ് ഉടമയ്ക്കു നോട്ടീസ് നൽകിയത്. റോഡിലെ വെള്ളമൊഴുക്ക് തടസ്സപ്പെടുത്തുന്ന രീതിയിൽ ഓവുചാലിൻ്റെ മുകളിൽ ഇൻറർലോക്ക് പപാകിയിട്ടുണ്ടെന്ന് പരിശോധനയിൽ കണ്ടെത്തി. ഇത് റോഡിൽ വെള്ളക്കെട്ടുണ്ടാക്കി അപകടങ്ങൾക്ക് കാരണമാകുന്നു.

പമ്പ് ഉടമ തന്നെ സ്വന്തം ചിലവിൽ ഇൻ്റർലോക്ക് പൊളിച്ച് പ്രശ്നങ്ങൾ പരിഹരിക്കണമെന്നും, ഇല്ലെങ്കിൽ ഉണ്ടാകുന്ന എല്ലാത്തരം നഷ്ടങ്ങൾക്കും ഉടമ തന്നെയായിരിക്കും ഉത്തരവാദിയെന്നുമായിരുന്നു നോട്ടീസിൽ പറഞ്ഞിരുന്നത്. നടപടി ഉണ്ടായില്ലെങ്കിൽ ലോകായുക്തയെ  സമീപിക്കുമെന്ന് നാട്ടുകാരനായ ഉമർ ഫാറൂഖ് നേരത്തെ വ്യക്തമാക്കിയിരുന്നു. ജില്ലാ കളക്ടർ, എ.ഡി.എം., ഡി.വൈ.എസ്.പി., തഹസിൽദാർ, പഞ്ചായത്ത് പ്രസിഡൻ്റ്, സെക്രട്ടറി തുടങ്ങി ബന്ധപ്പെട്ട എല്ലാ അധികാരികളും അടിയന്തരമായി ഇടപെടണമെന്ന് ആവശ്യപ്പെട്ട് നിവേദനവും നൽകിയിരുന്നു.

റോഡ് കയ്യേറ്റത്തെക്കുറിച്ച് കാസർകോട് വാർത്ത റിപ്പോർട്ട് ചെയ്തതിൻ്റെ ഇംപാക്ട് ആയാണ് അധികൃതർ ഉണർന്ന് പ്രവർത്തിച്ചത്. പമ്പുടമ ഇപ്പോൾ സ്വന്തം ചെലവിൽ, കയ്യേറി നിർമ്മിച്ച ഇൻ്റർലോക്ക് ജെസിബി ഉപയോഗിച്ച് പൊളിച്ചുനീക്കിയിരിക്കുകയാണ്.

റോഡ് കയ്യേറ്റങ്ങൾക്കെതിരെ കർശന നടപടി വേണമെന്ന് നിങ്ങൾ കരുതുന്നുണ്ടോ? കമൻ്റ് ചെയ്യുക.

Article Summary: Roadside encroachment by Adoor petrol pump owner demolished after PWD action.

#RoadEncroachment #PWDAction #KasaragodVarthaImpact #PetrolPump #Adoor #KeralaNews