ജില്ലാകലക്ടറുടെ ഉത്തരവ് ലംഘിച്ച് കുഴല്‍ക്കിണര്‍ നിര്‍മാണം; ലോറികളും നിര്‍മാണസാമഗ്രികളും പിടിച്ചെടുത്തു

By kvarthakgd1Mar 5, 2017, 10:00 IST

കാസര്‍കോട്: (www.kasargodvartha.com 05/03/2017) ജില്ലാകലക്ടറുടെ ഉത്തരവ് ലംഘിച്ച് കുഴല്‍ക്കിണര്‍ നിര്‍മാണം നടത്തുന്ന വിവരമറിഞ്ഞെത്തിയ റവന്യൂ ഉദ്യോഗസ്ഥര്‍ രണ്ട് ലോറികളും നിര്‍മാണ സാമഗ്രികളും പിടികൂടി. തെക്കന്‍ ബങ്കളത്ത് അനധികൃതമായി കുഴല്‍ക്കിണര്‍ നിര്‍മിക്കുകയാണെന്നറിഞ്ഞ് ശനിയാഴ്ച വൈകുന്നേരത്തോടെ എത്തിയ വില്ലേജ് ഓഫീസര്‍ എസ് സേവിയുടെ നേതൃത്വത്തിലുള്ള റവന്യൂ ഉദ്യോഗസ്ഥര്‍ വാഹനങ്ങളും അനുബന്ധ ഉപകരണങ്ങളും പിടികൂടുകയായിരുന്നു.

വരള്‍ച്ചയുള്ള സമയമായതിനാല്‍ ഭൂഗര്‍ഭനിരപ്പ് താഴുന്നത് തടയാന്‍ മെയ് 31 വരെ ജില്ലയില്‍ കുഴല്‍ക്കിണര്‍ നിര്‍മിക്കുന്നത് നിരോധിച്ച് സര്‍ക്കാര്‍ നിര്‍ദേശപ്രകാരം ജില്ലാകലക്ടര്‍ കെ ജീവന്‍ബാബു ഉത്തരവിറക്കിയിരുന്നു. ഇതിന്റെ അടിസ്ഥാനത്തിലാണ് നടപടിയുണ്ടായത്. ജില്ലാ കലക്ടര്‍ക്ക് റവന്യൂ ഉദ്യോഗസ്ഥര്‍ റിപ്പോര്‍ട്ട് നല്‍കിയ ശേഷം വാഹനങ്ങള്‍ നീലേശ്വരം പോലീസിന് കൈമാറി. അതേ സമയം കലക്ടറുടെ ഉത്തരവ് ലംഘിച്ച് ജില്ലയിലെ പല ഭാഗങ്ങളിലും ഇപ്പോഴും കുഴല്‍ക്കിണര്‍ നിര്‍മാണം നടക്കുന്നുണ്ട്.