തീരദേശ പോലീസിന്റെ ബോട്ട് അപകടത്തില്‍പ്പെട്ടത് സ്രാങ്കിന്റെ പരിചയക്കുറവുമൂലം
Jul 30, 2012, 16:07 IST
ശക്തമായ തിരമാലയില്‍പ്പെട്ട് ബോട്ട് ആടിയുലഞ്ഞപ്പോള്‍ അതിനകത്തുണ്ടായിരുന്ന എ.എസ്.ഐ ഉള്‍പ്പടെയുള്ള പോലീസുകാരും സ്രാങ്കും നിസഹായകരായി കൂട്ടനിലവിളി മുഴക്കുകയായിരുന്നു. വയര്‍ലെസ് സെറ്റ് ഉണ്ടായിരുന്നുവെങ്കിലും സ്‌റ്റേഷനില്‍ വിവരമറിയിക്കാന്‍ സാധിച്ചില്ല. മൊബൈല്‍ ഫോണിലൂടെയാണ് വിവരം തളങ്കര കടവത്തുള്ള തീരദേശ പോലീസ് സ്‌റ്റേഷനില്‍ അറിയിച്ചത്. ഇവരെ രക്ഷിക്കാനായി എസ്.ഐ ശേഖരനടക്കമുള്ളവര്‍ മറ്റൊരു ബോട്ടില്‍ ചെന്നെങ്കിലും കെട്ടിവലിച്ചുകൊണ്ടുവരുന്നതിനിടയില്‍ രണ്ട് ബോട്ടും തിരമാലയില്‍പ്പെട്ട് നെല്ലിക്കുന്ന് കടപ്പുറത്ത് മണല്‍ത്തിട്ടയില്‍ ഇടിക്കുകയായിരുന്നു. ഇതിനിടയില്‍ പോലീസുകാരില്‍ ചിലര്‍ കടലിലേക്ക് ചാടി നീന്തിരക്ഷപ്പെട്ടു. അരമണിക്കൂറിലധികം മരണത്തെ മുഖാമുഖം കണ്ടാണ് തങ്ങള്‍ ബോട്ടില്‍ കഴിഞ്ഞതെന്ന് പോലീസുകാര്‍ ഭീതി വിട്ട് മാറാതെ പറഞ്ഞു.
ബോട്ടിന്റെ ഗിയറിനടുത്തുള്ള കേബിള്‍പൊട്ടിയതു മൂലമാണ് ബോട്ട് നടുക്കടലില്‍ കുടുങ്ങിയതെന്നാണ് അധികൃതര്‍ പറയുന്നത്. വിദഗ്ദ്ധനായ സ്രാങ്കാണ് ബോട്ടോടിച്ചിരുന്നെതെങ്കില്‍ ഇത്തരം സന്ദര്‍ഭങ്ങളില്‍ ബോട്ടിനെ എങ്ങനെയെങ്കിലും കരയ്‌ക്കെത്തിക്കുമായിരുന്നു. 1000 രൂപ ദിവസ വേതനത്തിനാണ് സ്രാങ്കിനെ നിയമിച്ചിട്ടുള്ളത്. സ്രാങ്ക് എല്ലാ ദിവസവും ഡ്യൂട്ടിക്ക് തീരദേശ പോലീസ് സ്‌റ്റേഷനിലെത്തേണ്ടതുണ്ട്. എന്നാല്‍ പട്രോളിംഗിന് കടലില്‍ പോകുന്ന ദിവസം മാത്രമേ ഇദ്ദേഹത്തിന് വേതനത്തിന് അര്‍ഹതയുള്ളൂ. ചുരുങ്ങിയ വേതനം മാത്രം ലഭിക്കുന്നത് കൊണ്ട് വിദഗ്ദ്ധരായ പല സ്രാങ്കുമാരും ജോലിക്കെത്താത്തതുമൂലമാണ് പരിചയ കുറവുള്ള സ്രാങ്കിനെ ജോലിക്ക് നിയോഗിക്കേണ്ടി വന്നതെന്ന് അധികൃതര്‍ പറഞ്ഞു.
തീരദേശ പോലീസ് സ്‌റ്റേഷനിലെ പോലീസുകാര്‍ക്കൊന്നും തന്നെ കടലില്‍ ആവശ്യമായ പരിശീലനം കിട്ടിയിട്ടില്ല. അതുകൊണ്ടുതന്നെ അതുകൊണ്ട് തന്നെ മരണ ഭയത്തോടെയാണ് ജോലി നിര്‍വ്വഹിക്കേണ്ടി വരുന്നത്. രക്ഷാബോട്ട് എത്തിയപ്പോള്‍ കുടുങ്ങിയ ബോട്ടിനടുത്തെത്താന്‍ പോലും സാധിച്ചിരുന്നില്ല. നീളമുള്ള കയര്‍ എറിഞ്ഞു കൊടുത്ത് കെട്ടിവലിക്കുകയായിരുന്നു. അപകടത്തില്‍പ്പെട്ട ബോട്ടില്‍ നിന്നും രക്ഷാ ബോട്ടിലേക്ക് പോലീസുകാരെ മാറ്റാനും ഇതുമൂലം കഴിഞ്ഞില്ല.
കാഞ്ഞങ്ങാട്ടുള്ള ഫിഷറീസ് വകുപ്പില്‍ വിവരമറിയിച്ചെങ്കിലും നാലു മണിക്കൂര്‍ കഴിഞ്ഞാണ് ഇവരുടെ ബോട്ട് കാസര്‍കോട്ടെത്തിയത്. അപകടത്തില്‍പ്പെട്ട് ബോട്ടിന്റെ പിറകുവശത്തെ ആവരണചട്ട ഇളകിയിട്ടുണ്ട്. ബോട്ട് പരിശോധിക്കാനായി ഗോവ ഷിപ്പിയാര്‍ഡില്‍ നിന്നും വിദഗ്ദ്ധര്‍ കാസര്‍കോട്ടെത്തും.
ശക്തമായ കാറ്റിലും തിരമാലയിലും ബോട്ട് മറിഞ്ഞിരുന്നെങ്കില്‍ ജീവപായം തന്നെ സംഭവിക്കുമെന്ന് ബോട്ടിലുണ്ടായിരുന്ന പോലീസുകാര്‍ വെളിപ്പെടുത്തി.ലക്ഷങ്ങള്‍ വിലമതിക്കുന്ന മൂന്നുബോട്ടുകളാണ് തീരദേശ പോലീസിന് അനുവദിച്ചിട്ടുള്ളത്. ഇതില്‍ ചെറിയ ബോട്ടാണ് ഞായറാഴ്ച അപകടത്തില്‍പ്പെട്ടത്. അപകടത്തില്‍പ്പെട്ട ബോട്ടുകള്‍ മത്സ്യതൊഴിലാളികളുടെയും റസ്‌ക്യു ബോട്ടുകളുടെയും സഹായത്തോടെയാണ് തളങ്കര കടവത്തെ ഹാര്‍ബറില്‍ എത്തിച്ചത്.
Keywords: Kasaragod, Boat accident, Coastal Police, Boat lasker
Tags
Share this story
