ബൈക്ക് യാത്രക്കാരനെ തുറിച്ചു നോക്കിയതിന്റെ പേരില്‍ സംഘട്ടനം; 7 പേര്‍ക്ക് പരിക്ക്

Girish

കാസര്‍കോട്: ബൈക്ക് യാത്രക്കാരനെ തുറിച്ചു നോക്കിയതിന്റെ പേരിലുണ്ടായ സംഘട്ടനത്തില്‍ ഏഴു പേര്‍ക്ക് പരിക്കേറ്റു. കുമ്പള സി.എച്ച്.സി റോഡില്‍ തിങ്കളാഴ്ച രാത്രി 8.45 മണിയോടെയാണ് സംഘട്ടനം നടന്നത്. ഇവിടെ ഇലക്ടിക് പോസ്റ്റില്‍ സ്ഥിരമായി ചിലര്‍ ഇരിക്കാറുണ്ട്. റോഡിലൂടെ ബൈക്കുമായി പോവുകായായിരുന്ന ജുനൈദ് ഫൈസല്‍ എന്ന യുവാവിനെ ഇവിടെ ഇരിക്കുകയായിരുന്ന യുവാക്കള്‍ തുറിച്ചു നോക്കിയപ്പോള്‍ യുവാവ് ഇതിനെ ചോദ്യം ചെയ്തതോടെയാണ് കൈയ്യാംങ്കളിയും വാക്കേറ്റവും ഉണ്ടായത്. പിന്നീട് കൂടുതല്‍ പേരെത്തി പരസ്പരം ഏറ്റു മുട്ടുകയായിരുന്നു.

Dhananjay

സംഘട്ടനത്തില്‍ പരിക്കേറ്റ ബി.ജെ.പി പഞ്ചായത്തംഗം രമേശ് ഭട്ടിന്റെ സഹോദരന്‍ ഗിരീഷ് (36), സുഹൃത്ത് ധനഞ്ജയന്‍ (32) എന്നിവരെ കാസര്‍കോട് സ്വകാര്യ ആശുപത്രിയിലും ഫൈസല്‍ (20), ജാഫര്‍ (19), ഹസന്‍ (21), മുനാഫിര്‍ (22), ജുനൈദ് ഫൈസല്‍ (20) എന്നിവരെ കുമ്പള ഗവ. ആശുപത്രിയിലും പ്രവേശിപ്പിച്ചു.

ഫൈസലിനെയും മറ്റുള്ളവരെയും അക്രമിച്ചതിന് ഗിരീഷ്, പഞ്ചായത്തംഗം രമേശ് ഭട്ട്, സതീശന്‍, സന്തു, സതീശന്‍ കണ്ടാലറിയാവുന്ന പത്തു പേര്‍ എന്നിവര്‍ക്കെതിരെ കുമ്പള പോലീസ് കേസെടുത്തു. സ്ഥലത്ത് പോലീസ് കാവലേര്‍പെടുത്തിയിട്ടുണ്ട്.

ബൈക്കില്‍ പോകുമ്പോള്‍ തങ്ങളെ ഒരു സംഘം മര്‍ദിക്കുകയായിരുന്നുവെന്നാണ് കുമ്പള ആശുപത്രിയില്‍ കഴിയുന്നവര്‍ പറയുന്നത്. അതേസമയം ഗിരീഷിന് ബൈക്ക് തട്ടിയപ്പോള്‍ ചോദ്യം ചെയ്തതിനെതുടര്‍ന്ന് തങ്ങളെ അക്രമിക്കുകയായിരുന്നുവെന്നാണ് കാസര്‍കോട് ആശുപത്രിയില്‍ കഴിയുന്നവര്‍ പറയുന്നത്.