17കാരിയുടെ കൊലപാതകം: ആരോപണം കെട്ടിച്ചമച്ചതെന്ന് വ്യവസായി വിദ്യാധരൻ

കാസർകോട്: (KasargodVartha) അമ്പലത്തറ പോലീസ് സ്റ്റേഷൻ പരിധിയിലെ 17 വയസ്സുകാരിയുടെ മരണവുമായി ബന്ധപ്പെട്ട് തനിക്കെതിരെ ഉയർന്ന ആരോപണങ്ങൾ അടിസ്ഥാനരഹിതമാണെന്നും കെട്ടിച്ചമച്ചതാണെന്നും പാണത്തൂരിലെ വ്യവസായിയും കാഞ്ഞങ്ങാട്ടെ താമസക്കാരനുമായ വിദ്യാധരൻ കാട്ടൂർ വാർത്താസമ്മേളനത്തിൽ അറിയിച്ചു.

പെൺകുട്ടിയുമായോ, മരണവുമായി ബന്ധമുണ്ടെന്ന് പ്രചരിപ്പിക്കപ്പെടുന്ന വ്യക്തികളുമായോ തനിക്ക് യാതൊരു ബന്ധവുമില്ല. താൻ വിദേശത്തേക്ക് കടന്നുവെന്നും ക്രൈംബ്രാഞ്ച് ചോദ്യം ചെയ്യാൻ വിളിച്ചുവെന്നുമുള്ള വാർത്തകൾ ചില മാധ്യമങ്ങൾ പ്രചരിപ്പിച്ചു. എന്നാൽ ഈ കേസിൽ തന്നെ ഇതുവരെ ചോദ്യം ചെയ്യുകയോ പ്രതി ചേർക്കുകയോ ചെയ്തിട്ടില്ല. 

ആരോപണം ഉന്നയിച്ച കേരള പട്ടികജാതി സമാജം ഭാരവാഹികൾക്കും, തന്റെ പേര് പരാമർശിച്ച് വാർത്ത നൽകിയ മാധ്യമങ്ങൾക്കുമെതിരെ നിയമനടപടി സ്വീകരിക്കുമെന്നും വിദ്യാധരൻ കാട്ടൂർ വ്യക്തമാക്കി.

കേസിൽ അറസ്റ്റിലായ ബിജു പൗലോസ് തന്റെ നാട്ടുകാരനാണ്. കാഞ്ഞങ്ങാട്ടെ ഒരു മാധ്യമപ്രവർത്തകനുമായി പരിചയമുണ്ട്. തന്റെ ബസ് എല്ലാ മാസവും ഒന്നാം തീയതി കാരുണ്യ യാത്ര നടത്താറുണ്ട്. ഇതിൽ കൃത്രിമം ആരോപിച്ച് പലതവണ അദ്ദേഹത്തിന്റെ പത്രത്തിൽ വാർത്ത വന്നിട്ടുണ്ട്. അങ്ങനെയുള്ള ഒരാളുമായി തനിക്ക് ബന്ധമുണ്ടെന്ന് പറയുന്നത് തെറ്റാണ്.

തനിക്കെതിരെ ഉയർന്ന ആരോപണങ്ങൾ കാരണം കുടുംബം ദുഃഖിതരാണ്. എന്തിനാണ് ഈ കേസിൽ തന്നെ വലിച്ചിഴയ്ക്കുന്നതെന്ന് മനസ്സിലാകുന്നില്ല. ഇതിന്റെ സത്യാവസ്ഥ പുറത്തുകൊണ്ടുവരാൻ ഏതറ്റം വരെയും നിയമപരമായി പോരാടുമെന്നും ഏത് അന്വേഷണവുമായും സഹകരിക്കുമെന്നും അദ്ദേഹം കൂട്ടിച്ചേർത്തു.

ബേളൂർ തങ്കരാജ്, എം കെ ഭാസ്കരൻ അട്ടേങ്ങാനം, ബാലഗോപാലൻ കക്കാണത്ത് എന്നിവരും വാർത്താസമ്മേളനത്തിൽ പങ്കെടുത്തു.

കാസർകോട്ടെ 17കാരിയുടെ മരണവുമായി ബന്ധപ്പെട്ട് വ്യവസായി വിദ്യാധരൻ നടത്തിയ വെളിപ്പെടുത്തലുകൾ വായിക്കുക. നിങ്ങളുടെ അഭിപ്രായങ്ങൾ പങ്കുവെക്കുക.

Summary: Industrialist Vidyadharan Kattur, residing in Kanhangad, denied allegations linking him to the death of a 17-year-old girl in Ambalathara police station limits, stating they are baseless and fabricated.

#Kasaragod #MurderCase #VidyadharanKattur #KeralaCrime #Ambalathara #NewsUpdate