കാസര്‍കോട്ട് വന്‍ കഞ്ചാവു വേട്ട; 110 കിലോ കഞ്ചാവുമായി ഒരാള്‍ അറസ്റ്റില്‍

കാസര്‍കോട്: (www.kasargodvartha.com 04.02.2019) കാസര്‍കോട് ചിറ്റാരിക്കാലില്‍ വന്‍ കഞ്ചാവു വേട്ട. 110 കിലോ കഞ്ചാവുമായി ഒരാളെ പോലീസ് അറസ്റ്റുചെയ്തു. കുന്നുംകൈ സ്വദേശി നൗഫലിനെ (35)യാണ് വെസ്റ്റ് എളേരി പൂങ്ങോടു വെച്ച് പോലീസ് പിടികൂടിയത്. ഞായറാഴ്ച വൈകിട്ട് 6.30 മണിയോടെയാണ് സംഭവം. നൗഫലിനൊപ്പമുണ്ടായിരുന്ന മറ്റൊരാള്‍ പോലീസിനെ കണ്ട് ഓടിരക്ഷപ്പെട്ടു.

ജില്ലാ പോലീസ് ചീഫിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ ചിറ്റാരിക്കാല്‍ പോലീസ് നടത്തിയ പരിശോധനയിലാണ് ഇന്നോവ കാറില്‍ കടത്താന്‍ ശ്രമിച്ച 110 കിലോ കഞ്ചാവുമായി യുവാവിനെ പിടികൂടിയത്. കാറിന്റെ പിറകിലെ ഡിക്കിയില്‍ കിലോ കണക്കാക്കി ചെറിയ നിരവധി പൊതിയുണ്ടാക്കി അടുക്കിവെച്ച നിലയിലായിരുന്നു കഞ്ചാവ്. കര്‍ണാടകയില്‍ നിന്നാണ് കഞ്ചാവ് കടത്തി കൊണ്ടുവന്നതെന്നാണ് വിവരം.

നൗഫലിനെ വിശദമായി ചോദ്യം ചെയ്ത് വരികയാണെന്ന് പോലീസ് അറിയിച്ചു. അടുത്തൊന്നും കാസര്‍കോട് ജില്ലയില്‍ ഇത്രയും വലിയ കഞ്ചാവ് വേട്ട നടന്നിട്ടില്ല.