ട്രാഫിക് കുരുക്കിൽ പിടഞ്ഞകന്നൊരു കുഞ്ഞുമരണം: മൂന്നര വയസ്സുകാരന്റെ ജീവൻ നഷ്ടമായി

കണ്ണൂർ: (KasargodVartha) ഗതാഗതക്കുരുക്കിൽ ആംബുലൻസ് കുടുങ്ങിയതിനെത്തുടർന്ന് ചികിത്സ ലഭിക്കാൻ വൈകിയ മൂന്നര വയസ്സുകാരൻ മരിച്ച സംഭവത്തിൽ അധികൃതർക്കെതിരെ ആരോപണവുമായി കുടുംബം. കൊട്ടിയൂരിൽ മരിച്ച പ്രജുൽ എന്ന കുട്ടിയുടെ പിതാവ് പ്രദോഷ് മാധ്യമങ്ങളോട് സംസാരിക്കുകയായിരുന്നു. ‘ചികിത്സ നേരത്തെ കിട്ടിയിരുന്നെങ്കിൽ എൻ്റെ മകൻ രക്ഷപ്പെടുമായിരുന്നു,’ വേദനയോടെ അദ്ദേഹം പറഞ്ഞു.

മാനന്തവാടി ജനറൽ ആശുപത്രിയിലെ ഡോക്ടർമാർ തന്നെ പറഞ്ഞത്, സമയത്തിനെത്തിച്ചിരുന്നെങ്കിൽ കുട്ടിയെ രക്ഷിക്കാമായിരുന്നു എന്നാണ് പ്രദോഷ് ചൂണ്ടിക്കാട്ടി. ആശുപത്രിയിലെത്താൻ പല വാഹനങ്ങളും ശ്രമിച്ചെങ്കിലും ഒടുവിൽ കൊട്ടിയൂർ പ്രാഥമികാരോഗ്യ കേന്ദ്രത്തിലെ 108 ആംബുലൻസാണ് ലഭിച്ചത്. 

എന്നാൽ, അമ്പായത്തോട്ടിലെ വീട്ടിൽ നിന്ന് കുട്ടിയുമായി മാനന്തവാടി ജനറൽ ആശുപത്രിയിലേക്ക് സൈറൺ മുഴക്കി പോകുമ്പോൾ, കൊട്ടിയൂർ തീർത്ഥാടകരുടെ വാഹനങ്ങൾ റോഡിൽ നിരനിരയായി നിർത്തിയിട്ട ക്യൂവിൽ ആംബുലൻസ് കുടുങ്ങുകയായിരുന്നു.

ഗതാഗതക്കുരുക്ക് കാരണം ആംബുലൻസ് ആശുപത്രിയിലെത്താൻ ഏറെ വൈകി. വെറും പത്ത് മിനിറ്റ് കൊണ്ട് എത്തേണ്ട ദൂരത്തിന് അൻപത് മിനിറ്റോളം കുരുക്കിൽപ്പെട്ട് നഷ്ടമായി. ഈ കാര്യത്തിൽ ആർക്ക് പരാതി നൽകിയാലും മരിച്ച കുട്ടിയെ തിരിച്ചുകിട്ടില്ലല്ലോ എന്നും പിതാവ് വേദനയോടെ ചോദിച്ചു. 

കൊട്ടിയൂരിലെ ഗതാഗതക്കുരുക്കിലാണ് കുട്ടിയെ ആശുപത്രിയിൽ എത്തിക്കാൻ വൈകിയത്. പാൽചുരം ഉന്നതിയിലെ പ്രദോഷ്-ബിന്ദു ദമ്പതികളുടെ മകനായ പ്രജുലാണ് ദാരുണമായി മരണപ്പെട്ടത്. ഞായറാഴ്ച ഉച്ചയ്ക്ക് പന്ത്രണ്ട് മണിയോടെയായിരുന്നു സംഭവം.

കൊട്ടിയൂരിലെ സാമൂഹികാരോഗ്യ കേന്ദ്രത്തിൽ പ്രവർത്തിക്കുന്ന 108 ആംബുലൻസിന് വിവരം ലഭിച്ചതിനെത്തുടർന്ന് കുട്ടിയുടെ വീട്ടിലേക്ക് പുറപ്പെട്ടെങ്കിലും റോഡിലുണ്ടായ ഗതാഗതക്കുരുക്കിൽ ആംബുലൻസ് കുടുങ്ങുകയായിരുന്നു. പനി ബാധിച്ച് ആശുപത്രിയിലേക്ക് കൊണ്ടുപോവുകയായിരുന്ന കുട്ടിയുണ്ടായിരുന്ന സ്ഥലം പത്ത് മിനിറ്റ് കൊണ്ട് എത്തേണ്ടതായിരുന്നുവെന്ന് ആംബുലൻസ് ഡ്രൈവറും പറഞ്ഞു. 

നിരന്തരമായി ആരോഗ്യപ്രശ്‌നങ്ങൾ നേരിട്ടിരുന്ന പ്രജുലിന് ജന്മനാ തലച്ചോറിലും പ്രശ്നങ്ങളുണ്ടായിരുന്നു. കഴിഞ്ഞ ദിവസങ്ങളിൽ കൊട്ടിയൂർ തീർത്ഥാടന നഗരിയിൽ അഭൂതപൂർവമായ തിരക്കും റോഡിൽ അതികഠിനമായ ഗതാഗതക്കുരുക്കും അനുഭവപ്പെട്ടിരുന്നു. അമ്പായത്തോട്ടിലെ ആദിവാസി പിന്നോക്ക വിഭാഗത്തിൽപ്പെട്ട കുടുംബത്തിലെ കുട്ടിയാണ് ചികിത്സ ലഭിക്കാതെ മരിച്ചത്.

കണ്ണൂരിലെ ഈ ദാരുണ സംഭവം നിങ്ങളുടെ സുഹൃത്തുക്കളുമായി പങ്കുവെച്ച് അഭിപ്രായങ്ങൾ രേഖപ്പെടുത്തുക.

Article Summary: 3.5-year-old dies in Kannur due to ambulance delay in traffic jam.

#Kannur, #TrafficJam, #AmbulanceDelay, #ChildDeath, #Kottiyoor, #KeralaNews