ലക്ഷ്യം വിഷൻ 2041: നീലേശ്വരത്തിൻ്റെ വികസനത്തിന് മാസ്റ്റർ പ്ലാൻ; കമ്മിറ്റിയും സ്പെഷ്യൽ ഇൻ്റഗ്രേഷൻ വർക്കിംഗ് ഗ്രൂപ്പും രൂപീകരിച്ചു

നീലേശ്വരം: (KasargodVartha) നഗരത്തിൻ്റെ സമഗ്ര വികസനം ലക്ഷ്യമിട്ട് മാസ്റ്റർ പ്ലാൻ തയ്യാറാക്കുന്നതിനായി നഗരസഭ മാസ്റ്റർ പ്ലാൻ കമ്മിറ്റിയും സ്പെഷ്യൽ ഇൻ്റഗ്രേഷൻ വർക്കിംഗ് ഗ്രൂപ്പും രൂപീകരിച്ചു. വിവിധ മേഖലകളിലെ വിവരങ്ങൾ ശേഖരിച്ച് ക്രോഡീകരിക്കുകയും വിശകലനം ചെയ്യുകയും ബന്ധപ്പെട്ടവരുമായി ചർച്ച നടത്തി വസ്തുതകൾ രേഖപ്പെടുത്തുകയും ചെയ്ത് മാസ്റ്റർ പ്ലാൻ തയ്യാറാക്കുകയാണ് കമ്മിറ്റികളുടെ പ്രധാന ചുമതല.

ഭാരവാഹികളും കമ്മിറ്റി അംഗങ്ങളും

മാസ്റ്റർ പ്ലാൻ കമ്മിറ്റിയുടെ ചെയർമാനായി നഗരസഭാ ചെയർമാൻ പി പി മുഹമ്മദ് റാഫിയെയും, സ്പെഷ്യൽ ഇൻ്റഗ്രേഷൻ വർക്കിംഗ് ഗ്രൂപ്പ് ചെയർപേഴ്സണായി പൊതുമരാമത്ത് സ്റ്റാൻഡിംഗ് കമ്മിറ്റി ചെയർപേഴ്സൺ ഇ ചന്ദ്രമതിയെയും തെരഞ്ഞെടുത്തു. നഗരസഭാ സെക്രട്ടറി അനുപമ സദാനന്ദൻ കൺവീനറും ജില്ലാ ടൗൺ പ്ലാനർ എസ് നിധിൻ കുമാർ മെമ്പർ സെക്രട്ടറിയുമാണ്.

വൈസ് ചെയർപേഴ്സൺ പി എം സന്ധ്യ, സ്ഥിരം സമിതി അധ്യക്ഷന്മാരായ ഇ കെ ചന്ദ്രൻ, എ വി സുരേന്ദ്രൻ, കെ സതീശൻ, ഷമീന മുഹമ്മദ്, കൗൺസിലർമാരായ പി വി സതീശൻ, ഇ ഷജീർ, പി യു രാമകൃഷ്ണൻ, പി വി സുനിത, വി കെ റഷീദ എന്നിവരും കമ്മിറ്റി അംഗങ്ങളാണ്.

മുൻ നഗരസഭാ ചെയർമാൻ പ്രൊഫ. കെ പി ജയരാജൻ, ഡോ. വി സുരേശൻ, വാട്ടർ അതോറിറ്റി അസിസ്റ്റൻ്റ് എക്സിക്യൂട്ടീവ് എൻജിനീയർ പി ആർ ഉഷ, പിഡബ്ല്യുഡി അസിസ്റ്റൻ്റ് എക്സിക്യൂട്ടീവ് എൻജിനീയർ ടി വി ദാമോദരൻ, ആർക്കിടെക്റ്റ് ഹരീഷ് ബാബു എന്നിവരും സമിതിയിൽ അംഗങ്ങളാണ്.

വിഷൻ 2041

‘വിഷൻ 2041’ എന്ന കാഴ്ചപ്പാടിൽ ഗതാഗതം, ടൂറിസം, പാർപ്പിടം, വാണിജ്യം, പരിസ്ഥിതി, അടിസ്ഥാന സൗകര്യങ്ങൾ തുടങ്ങിയ മേഖലകളുടെ സമഗ്ര വികസനമാണ് ഈ പ്ലാനിലൂടെ ലക്ഷ്യമിടുന്നത്. കമ്മിറ്റിയുടെ ആദ്യ യോഗം ചേർന്ന് പ്രാരംഭ ചർച്ചകൾ ഇതിനകം ആരംഭിച്ചു.

കരട് മാസ്റ്റർ പ്ലാൻ തയ്യാറാക്കിയ ശേഷം പൊതുജനങ്ങളുടെ അഭിപ്രായം കൂടി പരിഗണിച്ചായിരിക്കും രേഖ അന്തിമമാക്കുക. നഗരസഭാ കൗൺസിൽ അംഗീകരിക്കുന്ന അന്തിമ രേഖ സംസ്ഥാന സർക്കാർ ഗസറ്റ് വിജ്ഞാപനം വഴി പ്രസിദ്ധപ്പെടുത്തുന്നതോടു കൂടി നീലേശ്വരം നഗരസഭയിൽ മാസ്റ്റർ പ്ലാൻ നിലവിൽ വരും.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: Nileshwaram municipality forms master plan committee for Vision 2041.

#KasargodVartha #NileshwaramMunicipality #MasterPlan2041 #Vision2041 #KasaragodNews #KeralaDevelopment #RenuNews