പടന്നക്കാട്ടെ ടോള്‍ പിരിവ് ഗതാഗത കുരുക്കിന് വഴിതുറക്കുന്നു

പടന്നക്കാട്: പാളം കുരുക്കിട്ട പാതയില്‍ മണിക്കൂറുകളോളം കുടുങ്ങി കിടക്കുന്ന പൊതുജനത്തിന് ആശ്വാസമായി പടന്നക്കാട് മേല്‍­പാലം തുറന്നുകൊടുത്തുവെങ്കിലും മേല്‍­പാലത്തിന് തൊട്ടുരുമ്മി സ്ഥാപിച്ച ടോള്‍ ബൂത്ത് മറ്റൊരു വന്‍ ഗതാഗത കുരുക്കിന് വഴിതുറക്കുമെന്ന് ഏതാണ്ട് ഉറപ്പായി.

ദേശീയപാതയില്‍ കാഞ്ഞങ്ങാട്-നീലേശ്വരം റൂട്ടില്‍ പടന്നക്കാട്ടെ മേല്‍­പാലം തുടങ്ങുന്നതിന് 50 മീറ്റര്‍ തൊട്ടുമുമ്പാണ് ടോള്‍ ബൂത്ത് സ്ഥാപിച്ചിട്ടുള്ളത്. നീലേശ്വരം വഴി പാലം കടന്നുവരുന്ന വാഹനങ്ങള്‍ ടോള്‍ ബൂത്തിന്റെ നടപടിക്രമങ്ങള്‍ പൂര്‍ത്തിയാക്കാന്‍ നിര്‍ത്തിയിട്ടാല്‍ മേല്‍­പാലം മുഴുക്കെ വാഹനങ്ങള്‍ നിശ്ചലമാകുമെന്നാണ് പ്രധാന ആക്ഷേപം. മറുഭാഗത്ത് മേല്‍­പാലം കയറുന്നിടത്ത് തെക്കുഭാഗത്തേക്ക് വാഹനങ്ങള്‍ക്ക് നിലവിലുള്ള അവസ്ഥയില്‍ കടന്നുപോകാന്‍ കഴിയില്ല. രണ്ട് വാഹനങ്ങള്‍ ഒരുപോലെ അങ്ങോട്ടുമിങ്ങോട്ടും കടന്നുപോകാന്‍ പറ്റാത്ത വിധത്തിലാണ്  മേല്‍­പാലത്തിന്റെ ഉള്‍ഭാഗം പണികഴിച്ചിട്ടുള്ളത്. ഉള്‍ഭാഗത്ത് രണ്ടുഭാഗത്തായി നടപ്പാത നിര്‍­മിച്ചതിനാല്‍  മേല്‍­പാലത്തിന്റെ ഉള്‍ഭാഗത്തിന്റെ വിസ്തൃതി തീരെ കുറഞ്ഞുപോയതായി നേരത്തെ തന്നെ പരാതിയുണ്ടായിരുന്നു.

നീലേശ്വരം ഭാഗത്തുനിന്ന്  മേല്‍­പാലം കഴിഞ്ഞ ഉടന്‍ ടോള്‍ ബൂത്ത് സ്ഥാപിച്ചതിനാല്‍ വാഹന ഗതാഗതം ഏറെ തടസ്സപ്പെടുമെന്നാണ് ഡ്രൈവര്‍മാരുടെ പ്രധാന ആശങ്ക. സാധാരണഗതിയില്‍  മേല്‍­പാലത്തില്‍ നിന്നും ടോള്‍ ബൂത്ത് സ്ഥാപിക്കേണ്ടത് നിശ്ചിത അകലത്തിലാണ്. ഇത് പാലിക്കാതെയാണ് ഇവിടെ ബൂത്ത് സ്ഥാപിച്ചതെന്നാണ് നാട്ടുകാരുടെ ആക്ഷേപം.

അതിനിടെ പടന്നക്കാട് റെയില്‍വെ  മേല്‍­പാലത്തില്‍ വ്യാഴാഴ്ച രാവിലെ 11 മണി­യോടെ ടോള്‍ പിരിവ് തുടങ്ങി. പരിസരവാസികളെ ടോള്‍ പിരിവില്‍ നിന്ന് ഒഴിവാക്കാനുള്ള നിര്‍ദേശം സര്‍ക്കാര്‍ അംഗീകരിക്കാത്തതിനാല്‍ അവര്‍ക്കും പണം നല്‍കി വേണം വാഹനം  മേല്‍­പാലത്തിലൂടെ കടന്നുപോകാന്‍.

ടോള്‍ പിരിവ് നടത്തുന്നതിന് തദ്ദേശീയരായ യുവതീയുവാക്കള്‍ക്ക് മുന്‍ഗണന നല്‍കിയിട്ടുണ്ട്. നഗരസഭ കൗണ്‍സിലര്‍മാരുടെയും മറ്റ് പൊതുപ്രവര്‍ത്തകരുടെയും നിര്‍ദേശമനുസരിച്ച് തദ്ദേശിയരായ 17 യുവാക്കളും 18 യുവതികളും ഇതിന് വേണ്ടി വ്യാഴാഴ്ച ദേശീയപാത വിഭാഗം അധികൃതര്‍ക്ക് അപേക്ഷ സ­മര്‍­പി­ച്ചി­രുന്നു. ഇവരില്‍ കഴിവുള്ളവരെ നിയമിച്ച് കഴിഞ്ഞാല്‍ ബാക്കി ഈ രംഗത്ത് ഇതിനകം മുന്‍പരിചയമുള്ളവരെ നിയമിക്കാനാണ് തീരുമാനം. മൊത്തം 42 പേരെയാണ് ടോള്‍ പിരിവിന് നിയമിക്കുന്നത്. ഒരു ഷിഫ്റ്റില്‍ 14 പേര്‍ വീതം.