എസ്.പി.യുടെ ക്രൈം സ്ക്വാഡ് അംഗത്തിനെതിരെ കൂടുതല്‍ അന്വേഷണത്തിനു സാധ്യത
Sep 29, 2012, 16:00 IST
കാഞ്ഞങ്ങാട്: കാസര്‍കോട് ജില്ലാ പോലീസ് സൂപ്രണ്ടിന്റെ കീഴിലുള്ള ക്രൈം സ്ക്വാഡ് പിരിച്ചുവിട്ട് പുതിയ സ്ക്വാഡ് രൂപീകരിക്കും. ഇതോടൊപ്പം രാജധാനി-പെരിയ ബാങ്ക് അടക്കമുള്ള പ്രമാദമായ കവര്‍ചാക്കേസുകളിലെ തൊണ്ടി മുതലുകളെ സംബന്ധിച്ചും പുനരന്വേഷണം നടത്താനും സാധ്യതയേറി.
കുപ്രസിദ്ധ കവര്‍ചക്കാരന്‍ ആക്രി ബഷീറുമായി അടുത്ത ബന്ധമുണ്ടെന്ന് പുറത്തുവന്ന പോലീസുകാരന്‍ ഫിറോസ് അടക്കമുള്ളവരാണ് ഈ കേസുകളിലെ തൊണ്ടിമുതലുകള്‍ കണ്ടെടുത്തത്. പോലീസ് കണ്ടെടുത്ത തൊണ്ടിമുതലുകളെ സംബന്ധിച്ച് നേരത്തെ തന്നെ പല കോണുകളില്‍ നിന്നും ആക്ഷേപമുയര്‍ന്നിരുന്നു.
ജില്ലാ പോലീസ് ചീഫിന്റെ കീഴില്‍ നിലവില്‍ ക്രൈം സ്ക്വാഡിലുള്ള ചിലരെ അതാത് പോലീസ് സ്റ്റേഷനിലേക്ക് തിരിച്ചയക്കാനും നീക്കം നടക്കുന്നുണ്ട്. ജില്ലാ പോലീസ് മേധാവിയുടെ കീഴില്‍ ഒരു ഗ്രേഡ് എസ്‌ഐ അടക്കം ആറോളം പേരടങ്ങുന്ന ക്രൈം സ്ക്വാഡ് നിലവിലുണ്ട്.
പ്രമാദമായ കേസുകളില്‍ തുമ്പുണ്ടാക്കുന്നതിന് ഈ ക്രൈം സ്ക്വാഡിന്റെ സേവനം ഉപയോഗപ്പെടുത്താറുണ്ട്. ജില്ലാ പോലീസ് സൂപ്രണ്ടിന് ലഭിക്കുന്ന രഹസ്യ വിവരങ്ങളെക്കുറിച്ച് അന്വേഷിക്കാന്‍ എസ് പി നേരിട്ട് ഈ ക്രൈം സ്ക്വാഡിനെ വിശ്വസ്തതയോടെ ഏല്‍പിക്കാറുണ്ട്. ഡിവൈഎസ്പി, സിഐ, എസ്‌ഐമാരെ സഹായിക്കുന്നതിനും ക്രൈം സ്ക്വാഡ് അംഗങ്ങളെ എസ് പി വിട്ടുകൊടുക്കാറുമുണ്ട്.
നിലവിലുള്ള ക്രൈം സ്ക്വാഡിലെ ചിലരുമായി ബന്ധപ്പെട്ട് വിവാദങ്ങള്‍ തലപൊക്കിയതോടെയാണ് ക്രൈം സ്ക്വാഡ് പിരിച്ചുവിടാനോ പൊളിച്ചെഴുതാനോ പുന:സംഘടിപ്പിക്കാനോ പോലീസ് ഉന്നത തലത്തില്‍ ആലോചന തുടങ്ങിയത്. അന്തര്‍സംസ്ഥാന ബന്ധമുള്ള കുപ്രസിദ്ധ കവര്‍ചക്കാരന്‍ തൃക്കരിപ്പൂരിലെ കെ പി ബഷീര്‍ എന്ന ആക്രി ബഷീറുമായി രഹസ്യ ബന്ധമുള്ള എസ്പിയുടെ ക്രൈം സ്ക്വാഡില്‍പ്പെട്ട കാസര്‍കോട് ടൗണ്‍ പോലീസ് സ്റ്റേഷനിലെ സീനിയര്‍ സിവില്‍ പോലീസ് ഓഫീസര്‍ കരിവെള്ളൂര്‍ സ്വദേശി എം ടി ഫിറോസിനെ ചുറ്റിപ്പറ്റി ഞെട്ടിപ്പിക്കുന്ന ചില വിവരങ്ങള്‍ പുറത്ത് വന്ന സാഹചര്യത്തിലാണ് ക്രൈം സ്ക്വാഡ് പൊളിച്ചെഴുതാന്‍ ഉദ്യോഗസ്ഥരെ പ്രേരിപ്പിക്കുന്നത്.
തൃക്കരിപ്പൂരിലും ചെറുവത്തൂരിലും കര്‍ണ്ണാടകയിലെ ഉപ്പിനങ്ങാടിയിലും ജ്വല്ലറികള്‍ കവര്‍ച്ച ചെയ്യാനും ചെറുവത്തൂരിലെ ജ്വല്ലറി വ്യാപാരിയെ കടയടച്ച് വീട്ടിലേക്ക് പോകുമ്പോള്‍ അടിച്ചു വീഴ്ത്തി കൊള്ളയടിക്കാനും ആക്രി ബഷീറിന് പോലീസുകാരന്‍ ഫിറോസ് നിര്‍ദ്ദേശം നല്‍കിയതായുള്ള മൊബൈല്‍ ഫോണ്‍ സംഭാഷണം പുറത്ത് വന്നിരുന്നു. ഈ സംഭാഷണത്തിന്റെ റിക്കാര്‍ഡ് ചെയ്ത സിഡി ഉത്തരമേഖല ഡി ഐജി.യുടെയും കണ്ണൂര്‍- കാസര്‍കോട് ജില്ലാ പോലീസ് സൂപ്രണ്ടുമാരുടെയും മുന്നിലുണ്ട്.
ഫിറോസിനെതിരെ അന്വേഷണത്തിന് ജില്ലാ പോലീസ് മേധാവി എസ് സുരേന്ദ്രന്‍ ഉത്തരവിട്ടിട്ടുണ്ട്. കവര്‍ചക്കാരുമായി ഫിറോസിനുള്ള അടുത്ത ബന്ധത്തെക്കുറിച്ചുള്ള വിശദമായ വിവരങ്ങള്‍ ഒന്നൊന്നായി പുറത്ത് വന്നുകൊണ്ടിരിക്കുകയാണ്. പ്രമാദമായ ഒട്ടനവധി കേസുകള്‍ അന്വേഷിക്കുന്ന സംഘത്തില്‍ ഫിറോസ് അംഗമാണ്.
കാഞ്ഞങ്ങാട് രാജധാനി ജ്വല്ലറി കവര്‍ചയുടെ പുനരന്വേഷണത്തിനും കാഞ്ഞങ്ങാട്ടെ ജ്വല്ലറിയില്‍ നിന്ന് സ്വര്‍ണം വാങ്ങി കള്ളനോട്ട് നല്‍കിയ കേസിന്റെയും രേഷ്മ തിരോധാന കേസിന്റെയും മറ്റും അന്വേഷണം നടത്തിവരുന്ന സംഘത്തിലെ പ്രധാന സഹായിയാണ് ആരോപണ വിധേയനായ പോലീസുകാരന്‍ ഫിറോസ്.
Keywords: Kasaragod, Kanhangad, Robbery, Police, Bank, Kerala
Tags
Share this story
