ട്രെയിന്‍ യാത്രക്കിടെ കാണാതായ ഗള്‍ഫുകാരന്റെ ഭാര്യയേയും മകളേയും കാമുകനൊപ്പം ഹൈദരാബാദില്‍ കണ്ടെത്തി

കാഞ്ഞങ്ങാട്: (www.kasargodvartha.com 18/06/2015) ട്രെയിന്‍ യാത്രക്കിടെ കാണാതായ ഗള്‍ഫുകാരന്റെ ഭാര്യയേയും മകളേയും ഹൈദരാബാദില്‍ കാമുകനൊപ്പം കണ്ടെത്തി. തലശ്ശേരി സ്വദേശി സഞ്ജയന്റെ ഭാര്യയും ഹൊസ്ദുര്‍ഗ് എല്‍.വി. ടെമ്പിള്‍ സ്വദേശിയുമായ ഋഷ്ണ(34), മകള്‍ ആര്യ (എട്ട്) എന്നിവരെയാണ് ഹൊസ്ദുര്‍ഗ് പോലീസ് കണ്ടെത്തിയത്. ഹൈദരാബാദ് സ്വദേശിയായ കാമുകനോടൊപ്പം ഇവിടെ താമസിച്ച് വരികയായിരുന്നു ഋഷ്ണയും മകളും.


മാര്‍ച്ച് 23 ന് രാവിലെ ട്രെയിന്‍ യാത്രക്കിടെയാണ് ഇരുവരെയും കാണാതായത്. മാര്‍ച്ച് 13 ന് ഗള്‍ഫില്‍ നിന്ന് അവധിക്ക് ഭര്‍ത്താവിനോടൊപ്പം നാട്ടിലെത്തിയതാണ് ഋഷ്ണ. തലശ്ശേരിയിലെ ഭര്‍തൃ ഗൃഹത്തില്‍ എത്തിയതിന് ശേഷം 16 ന് ഭര്‍ത്താവ് സഞ്ജയും ഋഷ്ണയും മകള്‍ ആര്യയും ഹൊസ്ദുര്‍ഗിലെ വീട്ടിലേക്ക് വന്നിരുന്നു. പിറ്റേ ദിവസം സഞ്ജയ് തലശ്ശേരിയിലേക്ക് മടങ്ങി.

മാര്‍ച്ച് 23 ന് രാവിലെ എട്ട് മണിയോടെ എഗ്മൂര്‍ എക്‌സ്പ്രസില്‍ ഋഷ്ണയേയും മകളേയും പിതാവ് തലശ്ശേരിയിലെ ഭര്‍തൃവീട്ടിലേക്ക് യാത്രയയക്കുകയായിരുന്നു. ഭര്‍ത്താവ് തലശ്ശേരി റെയില്‍വെ സ്‌റ്റേഷനില്‍ ഇവരെ കാത്ത് നിന്നെങ്കിലും ഇവര്‍ എത്തിയില്ല. റെയില്‍വെ സ്‌റ്റേഷനില്‍ തിരച്ചില്‍ നടത്തിയെങ്കിലും കണ്ടെത്താന്‍ കഴിഞ്ഞില്ല. തുടര്‍ന്ന് ഹൊസ്ദുര്‍ഗ് പോലീസില്‍ പിതാവ് പരാതി നല്‍കുകയായിരുന്നു.