യുവാവ് തൂങ്ങിമരിച്ച നിലയില്‍; ഭാര്യ പിണങ്ങിപോയതില്‍ മനംനൊന്ത് ജീവനൊടുക്കിയതെന്ന് സംശയം

കാഞ്ഞങ്ങാട്: യുവാവിനെ തൂങ്ങിമരിച്ചനിലയില്‍ കണ്ടെത്തി. തോയമ്മല്‍ ലക്ഷം വീട് കോളനിയിലെ കൃഷ്ണന്‍ കുട്ടി-ശശികല ദമ്പതികളുടെ മകന്‍ സന്ദീപിനെ(28)യാണ് വെള്ളിയാഴ്ച രാവിലെ കോളനിയിലെ ഷെഡ്ഡില്‍ തൂങ്ങി മരിച്ച നിലയില്‍ കണ്ടെത്തിയത്.


കുടുംബകലഹത്തെ തുടര്‍ന്ന് സന്ദീപിന്റെ ഭാര്യ പിണങ്ങി സ്വന്തം വീട്ടിലേക്ക് പോയിരുന്നു. ഇതിന് ശേഷം യുവാവ് കടുത്ത മനോവിഷമത്തിലായിരുന്നുവെന്ന് ബന്ധുക്കള്‍ പറയുന്നു. ഭാര്യ പിണങ്ങിയതിലുള്ള മനോവിഷമം മൂലം സന്ദീപ് ആത്മഹത്യ ചെയ്തതാണെന്ന് സംശയിക്കുന്നു.

കുറച്ച് ദിവസങ്ങളായി സന്ദീപ് സ്വന്തം വീട്ടില്‍ താമസിക്കാതെ ഷെഡ്ഡിലാണ് കഴിഞ്ഞിരുന്നത്. പ്രീതിയാണ് ഭാര്യ. മക്കളില്ല. സഹോദരങ്ങള്‍: സന്തോഷ്, സന്ധ്യ. ഹൊസ്ദുര്‍ഗ് പോലീസ് ഇന്‍ക്വസ്റ്റ് നടത്തിയ മൃതദേഹം പോസ്റ്റുമോര്‍ട്ടത്തിനായി ജില്ലാ ആശുപത്രി മോര്‍ച്ചറിയിലേക്ക് മാറ്റി.