വാഹനമോഷണക്കേസ് പ്രതിയെ വാടക വീട് വളഞ്ഞ് അറസ്റ്റുചെയ്തു

കാഞ്ഞങ്ങാട്: നിരവധി വാഹനക്കേസുകളില്‍ പ്രതിയായ കാഞ്ഞങ്ങാട് സ്വദേശിയെ പോലീസ് അറസ്റ്റുചെയ്തു. പടന്നക്കാട് കരിവളത്തെ കുന്നില്‍ മുനീര്‍ എന്ന ക്വിന്റല്‍ മുനീര്‍ (40) ആണ് അറസ്റ്റിലായത്.

കരിവളത്തെ വാടക വീട് വളഞ്ഞ് തളിപ്പറമ്പ് ഡി.വൈ.എസ്.പി. കെ.എസ്. സുദര്‍ശന്റെ നേതൃത്വത്തിലുള്ള പ്രത്യേക സ്‌ക്വാഡാണ് മുനീറിനെ പിടികൂടിയത്. 2001 - 2003 കാലയളവില്‍ പയ്യന്നൂര്‍, പഴയങ്ങാടി, വളപട്ടണം, ഹൊസ്ദുര്‍ഗ് പോലീസ് സ്‌റ്റേഷന്‍ പരിധികളില്‍ നടന്ന നിരവധി വാഹനമോഷണ കേസിലെ പ്രതിയാണ് മുനീര്‍

പയ്യന്നൂരില്‍ നാലും ഹൊസ്ദുര്‍ഗില്‍ മൂന്നും, വളപട്ടണം, പഴയങ്ങാടി എന്നിവിടങ്ങളില്‍ ഓരോകേസും മുനീറിനെതിരെ ഉണ്ടെന്ന് പോലീസ് പറഞ്ഞു. സഹോദരന്‍ മുഹമ്മദും പല കേസുകളില്‍ കൂട്ടുപ്രതിയാണ്. ചില കര്‍ണാടക സ്വദേശികളും മുനീറും സഹോദരനും ഉള്‍പെടുന്ന വാഹനമോഷണ സംഘത്തിലുള്ളതായി പോലീസ് വ്യക്തമാക്കി.

അവരെ കൂടി അറസ്റ്റുചെയ്യാനുള്ള നീക്കം നടക്കുന്നതായി പോലീസ് കൂട്ടിച്ചേര്‍ത്തു. മോഷ്ടിക്കുന്ന വാഹനങ്ങള്‍ തമിഴ്‌നാട്, കര്‍ണാടക സംസ്ഥാനങ്ങളിലെ വിവിധ സ്ഥലങ്ങളില്‍ എത്തിച്ച് വില്‍പന നടത്തുകയാണ് സംഘത്തിന്റെ രീതി. വിവിധ സ്ഥലങ്ങളില്‍ വാടകയ്ക്ക് താമസിച്ചാണ് കവര്‍ച ആസൂത്രണം ചെയ്യുന്നത്.

മുനീറിനെ അറസ്റ്റുചെയ്ത സംഘത്തില്‍ പോലീസുകാരായ കെ.ഡി. ഫ്രാന്‍സിസ്, സി.എച്ച് സിദ്ദിഖ്, എ. ജയരാജ് എന്നിവരും ഉണ്ടായിരുന്നു. പ്രതിയെ വ്യാഴാഴ്ച കോടതിയില്‍ ഹാജരാക്കും.