കാഞ്ഞങ്ങാട് ബസ്സ്റ്റാന്‍ഡ് കെട്ടിടം തകര്‍ച്ചാ ഭീഷണിയില്‍

തടിച്ചുവളര്‍ന്ന അടിവേരുകള്‍ കെട്ടിടത്തിന്റെ അടിത്തറയിലൂടെ തഴച്ചുകയറി കെട്ടിടത്തിന്റെ മുകള്‍ നിലയിലേക്കുവരെ പടര്‍ന്നിട്ടുണ്ട്. കെട്ടിടത്തിന് വിള്ളലുണ്ടാകാനുള്ള കാരണമിതാണ്. ഈ കെട്ടിടത്തില്‍ പട്ടികജാതി-പട്ടികവര്‍ഗ്ഗ വകുപ്പ് കോഴിക്കോട് മേഖലാ ഓഫീസും കാഞ്ഞങ്ങാട് പ്രസ്‌ഫോറവും ഉള്‍പ്പെടെ ചെറുതും വലുതുമായ 17 ഓളം സ്ഥാപനങ്ങള്‍ ഇപ്പോള്‍ പ്രവര്‍ത്തിക്കുന്നുണ്ട്. ദിനംപ്രതി നൂറുകണക്കിനാളുകളാണ് ഈ കെട്ടിടത്തില്‍ കയറിയിറങ്ങുന്നത്. കെട്ടിടത്തിന്റെ അടിത്തട്ടില്‍ ആയിരക്കണക്കിനാളുകള്‍ ബസുകള്‍ കാത്തുനില്‍ക്കാറുണ്ട്.

കാലപ്പഴക്കം കൊണ്ട് കെട്ടിടത്തിന്റെ കോണ്‍ക്രീറ്റ് സ്ലാബുകളും സിമന്റ് മിശ്രിതങ്ങളും അടര്‍ന്നുവീഴുന്നത് പതിവായിട്ടുണ്ട്. സിമന്റ് മിശ്രിതമടങ്ങിയ കട്ടകള്‍ അടര്‍ന്ന് തലയില്‍ പതിച്ച് ഞായറാഴ്ച രാവിലെ ബസ് യാത്രക്കാരിയായ മാവുങ്കാല്‍ പുതിയ കണ്ടത്തെ ബാബുവിന്റെ ഭാര്യ വി ശാരദ(32)ക്ക് പരിക്കേറ്റിരുന്നു. ബസ് കാത്തുനില്‍ക്കുന്നതിന് സ്ത്രീകള്‍ക്കു വേണ്ടി സ്ഥലമൊരുക്കിയ സ്ഥലത്താണ് സിമന്റ് കട്ടകള്‍ പതിച്ചത്. ശാരദയെ കാഞ്ഞങ്ങാട്ടെ സ്വകാര്യാശുപത്രിയില്‍ പ്രവേശിപ്പിച്ചു. ബസ്സ്റ്റാന്‍ഡ് കെട്ടിടത്തിന് പൊതുമരാമത്ത് വകുപ്പിന്റെ ഫിറ്റ്‌നസ് സര്‍ട്ടിഫിക്കറ്റില്ലെന്നാണ് സൂചന. കെട്ടിടം പെയിന്റടിച്ച് എപ്പോഴെങ്കിലും മിനുങ്ങുന്നതല്ലാതെ കെട്ടിടത്തിന്റെ കാലപ്പഴക്കത്തെക്കുറിച്ചുള്ള യാതൊരു പരിശോധനയും നടക്കാറില്ല. നഗരസഭാധികൃതര്‍ ഒരു ദുരന്തം പ്രതീക്ഷിച്ചിരിക്കുന്നുണ്ടാകുമെന്നാണ് നാട്ടുകാരുടെ വിശ്വാസം.

Keywords: Kanhangad, Busstand, Building