ജ­യില്‍ ചാടി­യ പ്ര­തി­കള്‍ ഇ­രിയ­ണ്ണി വ­ന­ത്തില്‍ ഒ­ളി­ച്ചു; പോ­ലീ­സ് വ­ല­വി­രിച്ചു

Rajan

Mohammed Rasheed

കാസര്‍കോട്: കാസര്‍കോട് സബ് ജയിലില്‍ നിന്നും തടവു ചാടിയ മൂന്നു പ്രതികള്‍ക്കായി മുളിയാര്‍ വനത്തില്‍ വ്യാപകമായ തിരച്ചില്‍. പോലീസും വനം വകുപ്പ് ഉദ്യോഗസ്ഥരും നാട്ടുകാരും സംയുക്തമായാണ് കാട് അരിച്ചു പെറുക്കി തിരച്ചില്‍ നടത്തുന്നത്.

ബുധനാഴ്ച രാവിലെ കാസര്‍കോട് ഭാഗത്ത് നിന്ന് ഒരു റിക്ഷയില്‍ വന്ന് മൂന്നു പേരും ബോവിക്കാനത്തിനടുത്ത ബാവിക്കര റോഡരികില്‍ ഇറങ്ങുന്നത് കണ്ടുവെന്ന് ഒരു നാട്ടുകാരന്‍ അറിയിച്ചതിനെതുടര്‍ന്നാണ് പോലീസ് സ്ഥലത്തെത്തിയത്. ഇവിടെ അടുത്ത് എവിടെയാണ് പുഴയുള്ളത് എന്നും ഒന്നു കുളിക്കണമായിരുന്നുവെന്നും റിക്ഷയില്‍ വന്നിറങ്ങിയവര്‍ നാട്ടുകാരനോട് അന്വേഷിച്ചതായാണ് വിവരം.

പത്രങ്ങളില്‍ വന്ന ഫോട്ടോ കണ്ടാണ് തന്നോട് സംസാരിച്ച ആളുകള്‍ ജയില്‍ചാടിയ പുള്ളികളാണെന്ന് നാട്ടുകാരന് മനസിലായത്. പിന്നീട് മൂന്നു പേരും വനത്തിന്റെ ഉള്‍ഭാഗത്തേക്ക് പോകുന്നതും കണ്ടിരുന്നുവത്രെ. സംഭവം അറിഞ്ഞ് ആദൂര്‍ എസ്.ഐ. ദാമോദരന്‍, സി.ഐ, എസ്.പി. ഓഫീസില്‍ നിന്നുള്ള പോലീസുകാര്‍ എന്നിവരും ഇരിയണ്ണി ഫോറസ്റ്റ് ഡിവിഷനിലെ ഗാര്‍ഡുമാരും നാട്ടുകാരും സ്ഥലത്തെത്തി.

Rajesh

പ്രതികള്‍ക്കായി ബാവിക്കര, മഞ്ചക്കല്‍, ബേപ്പ്, ഓമ്പ, ചിപ്ലിക്കയ തുടങ്ങിയ ഭാഗങ്ങളിലും വനത്തിന്റെ ഉള്‍പ്രദേശങ്ങളിലും തിരച്ചില്‍ നടത്തി വരികയാണ്. പോലീസ് ഇറക്കിയ ലുക്ക് ഔട്ട് നോട്ടീസും ഈ ഭാഗങ്ങളില്‍ വിതരണം ചെയ്യുന്നുണ്ട്.

കോട്ടയം മുണ്ടക്കൈ സ്വദേശിയും കാറഡുക്ക എട്ടാംമൈല്‍ ക്വാര്‍ട്ടേഴ്‌സില്‍ താമസക്കാരനുമായ രാജന്‍ എന്ന തെക്കന്‍ രാജന്‍ (62), കാറഡുക്ക കര്‍മന്തോടി കാവുങ്കാലിലെ രാജേഷ് (34), മഞ്ചേശ്വരം ഹൊസബെട്ടു ജാറം ഹൗസിലെ മുഹമ്മദ് റഷീദ് (32) എന്നിവര്‍ക്കായാണ് തിരച്ചില്‍ നടത്തുന്നത്. ഇവരുടെ കൂടെ ജയില്‍ ചാടിയ മഞ്ചേശ്വരം മീഞ്ച കൊടലമുഗറിലെ മുഹമ്മദ് ഇഖ്ബാലിനെ (34) ചൊവ്വാഴ്ച ഉച്ചയോടെ സുങ്കത കട്ടയില്‍ വെച്ച് പിടികൂടിയിരുന്നു.

ചൊവ്വാഴ്ച പുലര്‍ചെയാണ് നാലു പേരും ജയില്‍ വാര്‍ഡന്‍ കാഞ്ഞങ്ങാട് ചെമ്മട്ടംവയല്‍ സ്വദേശി പവിത്രനെ (32) കുത്തി പരിക്കേല്‍പിച്ച ശേഷം തടവു ചാടിയത്. തലയ്ക്കും കാലിനും മാരകമായി പരിക്കേറ്റ പവിത്രന്‍ ജനറല്‍ ആശുപത്രിയില്‍ ചികിത്സയിലാണ്.