സി.പി.എം നേതാവ് ടി.കെ ശ്രീധരന്‍ നിര്യാതനായി

അട്ടേങ്ങാനം: മുതിര്‍ന്ന സി.പി.എം നേതാവ് അയ്യങ്കാവ് കാലിച്ചാന്‍പാറ തോണിക്കല്ലിലെ ടി.കെ ശ്രീധരന്‍(79) നിര്യാതനായി. വൃക്ക സംബന്ധമായ അസുഖത്തെ തുടര്‍ന്ന് മംഗലാപുരത്തെ ആശുപത്രിയില്‍ ചികിത്സയിലായിരുന്നു. ബുധനാഴ്ച രാത്രിയായിരുന്നു അന്ത്യം.

സി.പി.എം ജില്ലാ കമ്മിറ്റിയംഗം, പനത്തടി ഏരിയാ കമ്മിറ്റിയംഗം, കാഞ്ഞങ്ങാട് ഏരിയാ കമ്മിറ്റിയംഗം, കര്‍ഷക സംഘം ജില്ലാ ജോയിന്റ് സെക്രട്ടറി, കോടോം ബേളൂര്‍ ഗ്രാമ പഞ്ചായത്ത് പ്രസിഡണ്ട്, തായന്നൂര്‍ സര്‍വീസ് സഹകരണ ബാങ്ക് പ്രസിഡണ്ട്, ബേളൂര്‍ ശ്രീശങ്കര എ.യു.പി സ്‌കൂള്‍ മാനേജര്‍, കാഞ്ഞങ്ങാട് ബ്ലോക്ക് പഞ്ചായത്ത് സ്ഥിരം സമിതി ചെയര്‍മാന്‍ തുടങ്ങിയ പദവികള്‍ വഹിച്ചിട്ടുണ്ട്.

കോടോംബേളൂര്‍ പഞ്ചായത്ത് അംഗമായിരുന്ന അദ്ദേഹം 13 വര്‍ഷം പഞ്ചായത്ത് പ്രസിഡണ്ടായി പ്രവര്‍ത്തിച്ചിരുന്നു. മാവുങ്കാലിലെ സ്വകാര്യാശുപത്രിയില്‍ സൂക്ഷിച്ച മൃതദേഹം വ്യാഴാഴ്ച രാവിലെ 10 മണിയോടെ അട്ടേങ്ങാനത്തേക്ക് കൊണ്ടുപോയി. പാര്‍ട്ടി ഓഫീസില്‍ പൊതുദര്‍ശനത്തിന് ശേഷം ഉച്ചയോടെ വീട്ടിലേക്ക് കൊണ്ടുപോയി വൈകിട്ട് മൂന്ന് മണിയോടെ വീട്ടുവളപ്പില്‍ സംസ്‌കരിച്ചു.

ഭാര്യ: ജഗദമ്മ ടീച്ചര്‍. മക്കള്‍: ശോഭ, മിനി, സജീവന്‍. മരുമക്കള്‍: മോഹനന്‍ (കാലിച്ചാംപാറ), ജയന്‍ (മായാജ്യോതി ട്രാവല്‍സ് കാഞ്ഞങ്ങാട്). സഹോദരങ്ങള്‍: മാധവന്‍, സുരേന്ദ്രന്‍, ലക്ഷ്മി, പരേതരായ ടി.കെ രാഘവന്‍, കുഞ്ഞിരാമന്‍.