അനിതയുടെ ആത്മഹത്യ: ബിസിനസ് പാട്ണര്‍ അറസ്റ്റില്‍

Siju

കാഞ്ഞങ്ങാട്: ഹൊസ്ദുര്‍ഗ് ലിറ്റില്‍ ഫ്ലവര്‍ ഗേള്‍സ് ഹൈസ്‌കൂളിനടുത്ത് സ്വകാര്യ കെട്ടിടത്തില്‍ പൂങ്കാവനം ബിസിനസ് ഗ്രൂപ്പ് എന്ന പേരില്‍ സ്ഥാപനം നടത്തിവരികയായിരുന്ന ഡിടിപി-കമ്പ്യൂട്ടര്‍-ടൈലറിംഗ് സ്ഥാപനത്തിലെ പാര്‍ട്ണര്‍ പുല്ലൂര്‍ മീങ്ങോത്ത് സ്വദേശിനിയും കളനാട്ടെ ഗള്‍ഫുകാരന്‍ രാജന്റെ ഭാര്യയുമായ അനിത(28)ജീവനൊടുക്കിയ സംഭവത്തില്‍ ബിസിനസ് പാട്ണര്‍ അറസ്റ്റിലായി.

കൊന്നക്കാട് മുട്ടോംകടവ് നെല്ലിക്കാശേരിയിലെ സിജു(30)വാണ് അറസ്റ്റിലായത്. യുവതിയുടെ വാനിറ്റി ബാഗില്‍ നിന്ന് ആത്മഹത്യാ കുറിപ്പ് കണ്ടെത്തിയ ഉടന്‍ തന്നെ സിജുവിനെ പോലീസ് വലയിലാക്കിയിരുന്നു. കാഞ്ഞങ്ങാട് ഡി.വൈ.എസ്.പി മാത്യു എക്‌സെല്‍, ഹൊസ്ദുര്‍ഗ് എസ്.ഐ. ഇ. വി. സുധാകരന്‍ തുടങ്ങിയവരടങ്ങുന്ന സംഘമാണ് യുവാവിനെ അറസ്റ്റ് ചെയ്തത്.

ഒരു വര്‍ഷം മുമ്പാണ് അനിത സിജുവിന്റെ കച്ചവട പങ്കാളിയായത്. ഹൊസ്ദുര്‍ഗിലെ സ്വകാര്യ കെട്ടിടത്തില്‍ ഒരു വര്‍ഷം മുമ്പ് പ്രൈവറ്റ് എംപ്ലോയ്‌മെന്റ് സ്ഥാപനമാണ് സിജു നടത്തിയിരുന്നത്. ഇവിടെ യാദൃശ്ചികമായി ജോലി അന്വേഷിച്ചെത്തിയ അനിത സിജുവുമായി പരിചയപ്പെടുകയും പുതിയ ബിസിനസ് തുടങ്ങാന്‍ ധാരണയിലെത്തുകയുമായിരുന്നു. നേരത്തെ ടൗണിലെ ബി.എസ്.എന്‍.എല്‍ ഫ്രാഞ്ചസിയിലെ ജീവനക്കാരിയായിരുന്നു അനിത.

സിജു തന്നോട് ചെയ്ത ചതിയെ കുറിച്ച് അനിതയുടെ ആത്മഹത്യാകുറിപ്പില്‍ വിശദവിവരങ്ങളുണ്ട്.
ബിസിനസ് തുടങ്ങുമ്പോള്‍ ഒരു ലക്ഷം രൂപ അനിത സിജുവിന് കൈമാറിയിരുന്നു. പിന്നീട് സ്വയം തൊഴില്‍ പദ്ധതിയനുസരിച്ച് സിജു അനിതയെ കൊണ്ട് നാല് ലക്ഷം രൂപയുടെ വായ്പ എടുപ്പിച്ചു. സിജുവിന്റെ തന്നെ പേരിലുള്ള ക്വട്ടേഷനാണ് വായ്പ കിട്ടുന്നതിന് ബാങ്കില്‍ സമര്‍പിച്ചിരുന്നത്. ഇതുകൊണ്ട് തന്നെ ബാങ്ക് വായ്പ പൂര്‍ണമായും സിജുവിന് കൈക്കലാക്കാന്‍ എളുപ്പത്തില്‍ കഴിഞ്ഞു.