'കണ്ണിന് കുത്തിവെപ്പെടുത്തതിന് പിന്നാലെ വൃക്കകൾ തകരാറിലായി'; ചികിത്സാച്ചെലവിനായി 'ലക്ഷ്മി വിളക്ക്' വിൽക്കാനൊരുങ്ങി ശിൽപി

- കുഞ്ഞികണ്ണൻ  മുട്ടത്ത്

പെരിയ: (KasargodVartha) കണ്ണിന് നടത്തിയ കുത്തിവെപ്പിനെ തുടർന്ന് രണ്ട് വൃക്കകളും തകരാറിലായ യുവ വാസ്തുശിൽപി തൻ്റെ ജീവൻ രക്ഷിക്കാൻ സഹായം തേടുന്നു. പുല്ലൂർ കേളോത്ത് 'സൗപർണിക'യിലെ ലോഹിതാക്ഷൻ (43) ആണ് ചികിത്സയ്ക്കാവശ്യമായ പണം കണ്ടെത്താൻ മരത്തടിയിൽ തീർത്ത 'ലക്ഷ്മി വിളക്ക്' ഉൾപ്പെടെയുള്ള കലാരൂപങ്ങൾ വിൽക്കാനൊരുങ്ങുന്നത്. മംഗ്ളൂരിലെ ആശുപത്രിയിലെ ചികിത്സാ പിഴവാണ് വൃക്കകൾ തകരാറിലാകാൻ കാരണമെന്ന് കുടുംബാംഗങ്ങൾ ആരോപിക്കുന്നു.

ചികിത്സാ പിഴവ്

രണ്ട് വർഷം മുൻപ് ജോലിക്കിടെ കാഴ്ച തകരാർ വന്നത് കൊണ്ടാണ് ലോഹിതാക്ഷൻ മംഗ്ളൂരിലെ ആശുപത്രിയെ സമീപിച്ചത്. കണ്ണിലെ ഞരമ്പ് പൊട്ടിയിരിക്കുകയാണെന്നും ഒന്നുകിൽ ശസ്ത്രക്രിയ ചെയ്യണമെന്നും അല്ലെങ്കിൽ കണ്ണിന് ഇഞ്ചക്ഷൻ എടുക്കണമെന്നും ഡോക്ടർമാർ നിർദേശിച്ചു. ശസ്‌ത്രക്രിയയോടുള്ള ഭയം കാരണം ഇഞ്ചക്ഷൻ എടുക്കാൻ സമ്മതിച്ചു. കുത്തിവെപ്പ് എടുത്ത് ഒരു മാസം കഴിഞ്ഞപ്പോൾ കാഴ്ച തിരിച്ചു കിട്ടിയെങ്കിലും പിന്നീട് ശരീരം മുഴുവൻ നീരുവെച്ചു. തുടർന്ന് നടത്തിയ പരിശോധനയിലാണ് കുത്തിവെപ്പിൻ്റെ അമിത ഡോസ് കാരണം ഇരു വൃക്കകളും നശിച്ചതായി വ്യക്തമായത്. ആശുപത്രിക്കെതിരെ നിയമനടപടി സ്വീകരിക്കാൻ സാമ്പത്തിക ബുദ്ധിമുട്ടുള്ളതുകൊണ്ട് അതിന് തയ്യാറായില്ലെന്ന് ലോഹിതാക്ഷൻ പറഞ്ഞു.

ലക്ഷ്മി വിളക്ക് വിൽപ്പനയ്ക്ക്

പരേതനായ വാസ്തുവിദഗ്ധൻ കുഞ്ഞിരാമൻ ആചാരിയുടെ മകനായ ലോഹിതാക്ഷൻ ഒരു വർഷത്തിലേറെയായി വൃക്കരോഗത്തിന് ചികിത്സയിലാണ്. ആഴ്ചയിൽ മൂന്ന് ദിവസം ഡയാലിസിസിന് വിധേയനാകേണ്ടിവരുന്നുണ്ട്. ഇതിനിടയിലെ ഒഴിവുസമയങ്ങളിലായി ഏകദേശം പത്ത് മാസം കൊണ്ട് പ്ലാവിൻ്റെ ഒറ്റത്തടിയിൽ സൂക്ഷ്മമായി അദ്ദേഹം കൊത്തിയൊരുക്കിയതാണ് ലക്ഷ്മി വിളക്ക്. വിളക്കിൻ്റെ ഏറ്റവും വലിയ പ്രത്യേകത അതിലെ ചങ്ങലകൾ ഉൾപ്പെടെ മുഴുവൻ ഭാഗങ്ങളും ഒരൊറ്റ മരത്തടിയിൽ നിന്നുതന്നെ രൂപപ്പെടുത്തിയതാണ് എന്നതാണ്. ഇത്തരം ശിൽപനിർമാണം ശ്രമകരമാണ്. കൊല്ലൂർ മൂകാംബിക ക്ഷേത്രത്തിലെ സരസ്വതി മണ്ഡപം ഉൾപ്പെടെ സംസ്ഥാനത്തിനകത്തും പുറത്തുമുള്ള നിരവധി ക്ഷേത്രങ്ങളിലെ ശിൽപനിർമാണങ്ങളിൽ ലോഹിതാക്ഷൻ പങ്കാളിയായിട്ടുണ്ട്.

'ഈ ലക്ഷ്മി വിളക്കിൻ്റെ മൂല്യം മനസിലാക്കി മതിയായ തുക നൽകി ആരെങ്കിലും വാങ്ങിയാൽ ആ തുക ചികിത്സയ്ക്ക് വലിയ സഹായമാകും' എന്ന് ലോഹിതാക്ഷൻ്റെ കുടുംബം പ്രതീക്ഷിക്കുന്നു. ഭാര്യയും രണ്ട് മക്കളുമടങ്ങുന്നതാണ് ലോഹിതാക്ഷൻ്റെ കുടുംബം.

സഹായം തേടി കുടുംബം

കുടുംബത്തിൻ്റെ അത്താണിയായിരുന്ന ലോഹിതാക്ഷൻ രോഗബാധിതനായതോടെ ഇവരുടെ ജീവിതം പ്രതിസന്ധിയിലായി. കോഴിക്കോട്ടെ സ്വകാര്യ ആശുപത്രിയിൽ നടത്തിയ ചികിത്സയ്ക്കായി ഇതിനകം വലിയ തുക ചെലവായിട്ടുണ്ട്. വൃക്ക മാറ്റിവെക്കാൻ 50 ലക്ഷം രൂപയാണ് ആവശ്യമായി വരുന്നത്. വൃക്ക നൽകാൻ കുടുംബാംഗങ്ങൾ സന്നദ്ധരായി മുന്നോട്ട് വന്നിട്ടുണ്ടെങ്കിലും പലവിധ കാരണങ്ങൾ കൊണ്ട് അതൊന്നും യോജിക്കുന്നില്ല. ഇപ്പോൾ പെരിയ സാമൂഹികാരോഗ്യ കേന്ദ്രത്തിലാണ് ഡയാലിസിസ് നടത്തുന്നത്. വൃക്കമാറ്റ ശസ്ത്രക്രിയയ്ക്കും തുടർചികിത്സയ്ക്കുമായി ഇനിയും ലക്ഷങ്ങൾ കണ്ടെത്തേണ്ടതുണ്ട്.

ചികിത്സാസഹായ കമ്മിറ്റി

ലോഹിതാക്ഷൻ്റെ ചികിത്സയ്ക്കായി ധനസമാഹരണം നടത്തുന്നതിന് കേളോത്ത് യുവശക്തി ക്ലബ്ബിൻ്റെ നേതൃത്വത്തിൽ ചികിത്സാസഹായ കമ്മിറ്റി രൂപീകരിച്ചു. പുല്ലൂർ–പെരിയ പഞ്ചായത്ത് പ്രസിഡൻ്റ് സി കെ അരവിന്ദൻ ചെയർമാനായും, വാർഡ് അംഗം പി പ്രീതി വൈസ് ചെയർപേഴ്സണായും, ടി വി കരിയൻ ജനറൽ കൺവീനറായും, യുവശക്തി ക്ലബ് രക്ഷാധികാരി പി ശശി ട്രഷററായും കമ്മിറ്റി പ്രവർത്തിക്കുന്നു.

ചികിത്സാ സഹായത്തിനായി കേരള ഗ്രാമീൺ ബാങ്ക്, പെരിയ ബസാർ ശാഖയിൽ കമ്മിറ്റിയുടെ പേരിൽ അക്കൗണ്ട് ആരംഭിച്ചിട്ടുണ്ട്.

• അക്കൗണ്ട് നമ്പർ: 40442101061929

• ഐഎഫ്എസ്സി (IFSC): KLGB0040442

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. പ്രാദേശിക വാർത്തകളും മറ്റ് വിവരങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Sculptor Lohithakshan sells his art to fund his 50 lakh kidney transplant.

#PeriaNews #KasaragodNews #MedicalNegligence #CharityAppeal #KeralaNews #HelpLohithakshan #LocalNewsKerala #RenuNews