നീലേശ്വരത്ത് സ്വകാര്യ ചടങ്ങിൽ ഭക്ഷണം കഴിച്ച 5 പേർക്ക് ഷിഗെല്ല സ്ഥിരീകരിച്ചു, ആരോഗ്യവകുപ്പ് പ്രതിരോധ നടപടികൾ ശക്തമാക്കി
● ഷിഗെല്ല സ്ഥിരീകരിച്ചവരിൽ നാല് പേർ കുട്ടികളാണ്
● രോഗബാധ റിപ്പോർട്ട് ചെയ്ത 74 പേരുടെ വീടുകളിൽ നിരീക്ഷണം തുടരും
● നഗരസഭയിലെ വിവിധ വാർഡുകളിലെ കിണറുകളിൽ സൂപ്പർ ക്ലോറിനേഷൻ നടത്തും
● ആശങ്കപ്പെടേണ്ട സാഹചര്യമില്ലെന്ന് ആരോഗ്യവകുപ്പ് അധികൃതർ വ്യക്തമാക്കി
നീലേശ്വരം: (KasargodVartha) സ്വകാര്യ ചടങ്ങിൽ ഭക്ഷണം കഴിച്ചവർക്കിടയിൽ ഉണ്ടായ ഭക്ഷ്യവിഷബാധയുമായി ബന്ധപ്പെട്ട് പരിശോധനയ്ക്കയച്ച സാമ്പിളുകളിൽ അഞ്ച് പേർക്ക് ഷിഗെല്ല ബാക്ടീരിയ ബാധ സ്ഥിരീകരിച്ചു. കണ്ണൂരിലെ റീജണൽ പബ്ലിക് ഹെൽത്ത് ലബോറട്ടറിയിൽ നടത്തിയ പരിശോധനയിലാണ് ഫലം ലഭിച്ചത്. സ്ഥിരീകരിച്ചവരിൽ നാല് പേർ കുട്ടികളാണ്.
ആരോഗ്യവകുപ്പിന്റെ ഇടപെടൽ
സംഭവത്തെ തുടർന്ന് ജില്ലാ മെഡിക്കൽ ഓഫീസർ ഡോ. രേഖ കെ ടി നീലേശ്വരം താലൂക്ക് ആശുപത്രിയിൽ അടിയന്തര സന്ദർശനം നടത്തി സ്ഥിതിഗതികൾ വിലയിരുത്തി. റാപ്പിഡ് റെസ്പോൺസ് ടീം (ആർആർടി) ഉൾപ്പെടെയുള്ള ആരോഗ്യവകുപ്പ് ഉദ്യോഗസ്ഥർ ജൂലൈ 22 ബുധനാഴ്ച പ്രദേശത്തെത്തി വിശദമായ പരിശോധനയും പ്രതിരോധ നടപടികളും ആരംഭിച്ചു.
ജൂലൈ 15 ബുധനാഴ്ച ചാത്തമത്ത് പ്രദേശത്തെ ഒരു സ്വകാര്യ ചടങ്ങിൽ പങ്കെടുത്ത് ഭക്ഷണം കഴിച്ചവർക്കാണ് വയറിളക്കവും ഛർദിയും ഉൾപ്പെടെയുള്ള ശാരീരിക അസ്വസ്ഥതകൾ അനുഭവപ്പെട്ടത്. ആകെ 74 പേരാണ് വിവിധ ആശുപത്രികളിൽ ചികിത്സ തേടിയത്. ഇവരിൽ നിന്ന് ശേഖരിച്ച സാമ്പിളുകളിൽ അഞ്ചെണ്ണത്തിലാണ് ഷിഗെല്ല സ്ഥിരീകരിച്ചത്.
ആരോഗ്യവകുപ്പിന്റെ അറിയിപ്പുപ്രകാരം നിലവിൽ രോഗം സ്ഥിരീകരിച്ചവരടക്കം 74 പേരും പൂർണമായും സുഖം പ്രാപിച്ചിട്ടുണ്ട്. പുതിയ രോഗബാധകൾ റിപ്പോർട്ട് ചെയ്തിട്ടില്ലെന്നും പൊതുജനങ്ങൾ ആശങ്കപ്പെടേണ്ട സാഹചര്യമില്ലെന്നും അധികൃതർ വ്യക്തമാക്കി. രോഗം മറ്റുള്ളവരിലേക്ക് പകരുന്നത് തടയുന്നതിനായാണ് ശക്തമായ പ്രതിരോധ നടപടികൾ സ്വീകരിക്കുന്നതെന്നും അവർ അറിയിച്ചു.
പ്രതിരോധ പ്രവർത്തനങ്ങൾ ശക്തമാക്കി
ഷിഗെല്ല സ്ഥിരീകരിച്ചതിനെ തുടർന്ന് നഗരസഭയിൽ അടിയന്തര റാപ്പിഡ് റെസ്പോൺസ് ടീം യോഗം ചേർന്ന് സമഗ്ര ആക്ഷൻ പ്ലാൻ തയ്യാറാക്കി. നഗരസഭയിലെ 12, 13, 14, 15 വാർഡുകളിലെ മുഴുവൻ കിണറുകളിലും സൂപ്പർ ക്ലോറിനേഷൻ നടത്തും. ചാത്തമത്ത് എയുപി സ്കൂളിൽ രക്ഷിതാക്കൾക്കായി പ്രത്യേക ബോധവൽക്കരണ യോഗം സംഘടിപ്പിക്കും.
വിവിധ സന്നദ്ധസംഘടനകൾ, ക്ലബ്ബുകൾ, രാഷ്ട്രീയ പാർട്ടികൾ എന്നിവരെ ഉൾപ്പെടുത്തി പ്രദേശതല ബോധവൽക്കരണ പരിപാടി നടത്തും. ജെഎച്ച്ഐ, ജെപിഎച്ച്എൻ, എംഎൽഎസ്പി, ആശാ പ്രവർത്തകർ എന്നിവരുടെ നേതൃത്വത്തിൽ വീടുതോറും സർവൈലൻസ് നടത്തും.
രോഗബാധ റിപ്പോർട്ട് ചെയ്ത 74 പേരുടെ വീടുകളിൽ അടുത്ത രണ്ടാഴ്ചക്കാലം ദിവസേന ആരോഗ്യനിരീക്ഷണം തുടരും. കുടുംബത്തിലെ മറ്റാർക്കെങ്കിലും രോഗലക്ഷണങ്ങൾ പ്രകടമാകുന്നുണ്ടോ എന്ന് പരിശോധിക്കും.
ഉന്നതതല യോഗം
റാപ്പിഡ് റെസ്പോൺസ് ടീം യോഗത്തിൽ നീലേശ്വരം നഗരസഭ ചെയർമാൻ പി പി മുഹമ്മദ് റാഫി, വൈസ് ചെയർപേഴ്സൺ പി എം സന്ധ്യ, ആരോഗ്യ സ്ഥിരംസമിതി അധ്യക്ഷൻ എ വി സുരേന്ദ്രൻ, സ്ഥിരംസമിതി അധ്യക്ഷർ, വാർഡ് കൗൺസിലർമാർ, താലൂക്ക് ആശുപത്രി സൂപ്രണ്ട് ഡോ. സോനു ബി നായർ, ജില്ലാ ടെക്നിക്കൽ അസിസ്റ്റന്റ് എം ചന്ദ്രൻ, ജില്ലാ എപ്പിഡെമിയോളജിസ്റ്റ് ഫ്ലോറി ജോസഫ്, ഫുഡ് സേഫ്റ്റി ഓഫീസർ കെ എ ലനീഷ്, ആരോഗ്യവകുപ്പിലെയും നഗരസഭയിലെയും വിവിധ ഉദ്യോഗസ്ഥരും ആരോഗ്യപ്രവർത്തകരും പങ്കെടുത്തു.
ആരോഗ്യവകുപ്പ് അധികൃതർ പൊതുജനങ്ങളോട് തിളപ്പിച്ചാറിയ വെള്ളം മാത്രം കുടിക്കാനും, കൈകൾ സോപ്പുപയോഗിച്ച് ഇടയ്ക്കിടെ കഴുകാനും, വയറിളക്കം, ഛർദി, പനി തുടങ്ങിയ ലക്ഷണങ്ങൾ ഉണ്ടായാൽ സ്വയം ചികിത്സയ്ക്ക് ശ്രമിക്കാതെ ഉടൻ സമീപത്തെ ആരോഗ്യകേന്ദ്രത്തിൽ ചികിത്സ തേടാനും നിർദേശം നൽകി.
ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.
Article Summary: Five individuals contracted Shigella after food poisoning in Nileshwaram.
#Nileshwaram #ShigellaOutbreak #FoodPoisoning #KasaragodNews #KeralaHealth #LocalNews #AparnaNews
