Innovation | ഇനി റീഡിങ് ഗ്ലാസുകൾ വേണ്ട! പ്രായമാകുമ്പോൾ അനുഭവപ്പെടുന്ന കാഴ്ച പ്രശ്‌നത്തിന് പരിഹാരമായി കണ്ണിലൊഴിക്കുന്ന മരുന്ന് എത്തി; ഡിസിജിഐയുടെ അനുമതിയായി

ന്യൂഡൽഹി: (KasargodVartha) പ്രായമാകുന്നതോടെ പലർക്കും അനുഭവപ്പെടുന്ന ഒരു പ്രശ്‌നമാണ് അടുത്തുള്ള കാര്യങ്ങൾ വായിക്കാൻ ഗ്ലാസ് വേണ്ടി വരുന്നത്. ഇതിനെയാണ് പ്രസ്ബയോപിയ എന്നു പറയുന്നത്. എന്നാൽ ഇനി ഈ പ്രശ്‌നത്തിന് ഒരു പരിഹാരമുണ്ട്. മുംബൈ ആസ്ഥാനമായുള്ള എൻ്റോഡ് ഫാർമസ്യൂട്ടിക്കൽസ് കമ്പനി വികസിപ്പിച്ചെടുത്ത പ്രെസ് വു (PresVu Eye Drops) എന്ന കണ്ണിലൊഴിക്കുന്ന പുതിയ മരുന്നിന് (Eye Drops) ഡ്രഗ് കൺട്രോളർ ജനറൽ ഓഫ് ഇന്ത്യ (ഡിസിജിഐ) അംഗീകാരം നൽകി.

ഈ ഐ ഡ്രോപ്‌സ് ഉപയോഗിച്ചാൽ റീഡിംഗ് ഗ്ലാസ് ഇല്ലാതെ തന്നെ വായിക്കാൻ സാധിക്കും. അതായത്, 40 വയസ്സിന് മുകളിലുള്ളവർക്ക് വളരെ ഉപകാരപ്രദമാകും. ഇവ  കണ്ണുകളെ നനയാനും സംരക്ഷിക്കാനും സഹായിക്കും. പ്രെസ്ബയോപിയ സ്വാഭാവികമായും പ്രായമാകുമ്പോൾ സംഭവിക്കുന്നു. ഇത് അടുത്തുള്ള വസ്തുക്കളിൽ ശ്രദ്ധ കേന്ദ്രീകരിക്കുന്നതിൽ ബുദ്ധിമുട്ടുണ്ടാക്കുന്നു. ഇത് സാധാരണയായി 40-കളുടെ മധ്യത്തിൽ ആരംഭിച്ച് ഏകദേശം 60-കളുടെ അവസാനം വഷളാകുന്നു.

മരുന്നിന് ഡ്രഗ് കൺട്രോളർ ജനറൽ ഓഫ് ഇന്ത്യ (ഡിസിജിഐ) ഇപ്പോൾ അന്തിമ അനുമതിയാണ് നൽകിയിരിക്കുന്നത്. സെൻട്രൽ ഡ്രഗ്‌സ് സ്റ്റാൻഡേർഡ് കൺട്രോൾ ഓർഗനൈസേഷന്റെ (സിഡിഎസ്‌സിഒ) സബ്‌ജക്‌റ്റ് എക്‌സ്‌പർട്ട് കമ്മിറ്റി (എസ്ഇസി) ഈ ഉൽപ്പന്നം നേരത്തെ ശുപാർശ ചെയ്തിരുന്നു. ഇന്ത്യയിൽ ആദ്യമായാണ് പ്രസ്ബയോപിയയുള്ളവരിൽ റീഡിംഗ് ഗ്ലാസുകളുടെ ആവശ്യകത കുറയ്ക്കുന്നതിന് ഇത്തരത്തിലുള്ള ഒരു ഐ ഡ്രോപ്‌സ് ലഭ്യമാകുന്നത്. 40 വയസ്സിനു മുകളിലുള്ളവരിൽ പ്രത്യേകിച്ചും ഈ തുള്ളികൾ ഉപകാരപ്രദമാകും.

വളരെ പ്രത്യേകതയുള്ള ഈ പുതിയതരം ഉൽപ്പന്നത്തിന്റെ പേറ്റൻ്റിനായി നിർമ്മാതാക്കൾ അപേക്ഷിച്ചിട്ടുണ്ട്. ഈ മരുന്ന് റീഡിങ് ഗ്ലാസിന്റെ ആവശ്യമില്ലാതാക്കുന്നതിനൊപ്പം കണ്ണുകൾക്ക് നനവും കൂടുതൽ സുഖവും നൽകുന്നു. ഈ ഐ ഡ്രോപ്‌സിൽ ഡൈനാമിക് ബഫർ സാങ്കേതികവിദ്യ ഉപയോഗിച്ചിട്ടുണ്ട്. ഇത് കണ്ണിന്റെ പി എച്ച് മൂല്യത്തിന് അനുസരിച്ച് വേഗത്തിൽ പൊരുത്തപ്പെടാൻ സഹായിക്കുന്നു. അതായത്, ദീർഘകാലം ഉപയോഗിച്ചാലും ഇവയുടെ ഫലപ്രാപ്തിയും സുരക്ഷയും നിലനിർത്താൻ സാധിക്കും. വർഷങ്ങളോളം ഉപയോഗിക്കാവുന്നതിനാൽ, ഈ സവിശേഷത വളരെ പ്രധാനപ്പെട്ടതാണ്.

'നേത്ര ചികിത്സയിൽ ഒരു പുതിയ അധ്യായം എഴുതുകയാണ് പ്രെസ് വു. പ്രായമാകുന്നതോടെ ഉണ്ടാകുന്ന കാഴ്ചക്കുറവ് അഥവാ പ്രെസ്ബയോപിയ ബാധിച്ചവർക്ക് ഏറെ ആശ്വാസമാണ് ഈ ഐ ഡ്രോപ്പ്. വളരെ ലളിതമായ ഈ ചികിത്സയിലൂടെ കണ്ണിലൊന്നും ചെയ്യേണ്ട ആവശ്യമില്ലാതെ, റീഡിങ് ഗ്ലാസ് ഇല്ലാതെ തന്നെ അടുത്തുള്ള വസ്തുക്കൾ വ്യക്തമായി കാണാൻ സാധിക്കും', ഡോ. ധനഞ്ജയ് ബഖ്‌ലെ പറഞ്ഞു.

'നമ്മുടെ ദിനചര്യകളെയും ജോലികളെയും പ്രെസ്ബയോപിയ  വളരെയധികം ബാധിക്കും. പ്രായമാകുന്നതോടെ പലർക്കും അടുത്തുള്ള കാര്യങ്ങൾ വ്യക്തമായി കാണാൻ ബുദ്ധിമുട്ട് അനുഭവപ്പെടാറുണ്ട്. ഒരു പുസ്തകം വായിക്കാൻ അടുത്ത് പിടിക്കേണ്ടി വരുമ്പോൾ ഈ പ്രശ്‌നം കൂടുതലായി അനുഭവപ്പെടാം. ഇത്തരം പ്രശ്‌നങ്ങൾക്കുള്ള ഒരു ലളിതവും സുരക്ഷിതവുമായ പരിഹാരമാണ് പ്രെസ് വു. 40 വയസ്സിന് മുകളിലുള്ളവർക്ക് അടുത്തുള്ള കാഴ്ച വർദ്ധിപ്പിക്കാൻ ഇത് സഹായിക്കും', അധികൃതർ വ്യക്തമാക്കി.

'നിരവധി വർഷത്തെ കഠിനാധ്വാനത്തിന്റെ ഫലമായി, ഞങ്ങൾ മികച്ച ഉൽപ്പന്നം നിങ്ങളുടെ മുന്നിൽ അവതരിപ്പിക്കുന്നു. ഇത് ഒരു പുതിയ തുടക്കമാണ്. ലക്ഷക്കണക്കിന് ആളുകളുടെ ജീവിതം മെച്ചപ്പെടുത്തുക എന്നതാണ് ഞങ്ങളുടെ ലക്ഷ്യം. പ്രെസ് വു വഴി, ആളുകൾക്ക് കൂടുതൽ സ്വാതന്ത്ര്യത്തോടെ ജീവിക്കാൻ കഴിയും',  ഫാർമസ്യൂട്ടിക്കൽസിൻ്റെ സിഇഒ നിഖിൽ കെ മസുർക്ക പറഞ്ഞു.

വെറും 15 മിനിറ്റിനുള്ളിൽ കാഴ്ചശക്തി വർദ്ധിപ്പിക്കാൻ പ്രെസ് വു സഹായിക്കുമെന്ന് ഡോ. ആദിത്യ സേഥി അഭിപ്രായപ്പെടുന്നു. ഒക്ടോബർ ആദ്യം മുതൽ, 350 രൂപയ്ക്ക് ഈ മരുന്ന് ഫാർമസികളിൽ ലഭ്യമാകും. 40 മുതൽ 55 വയസ്സുവരെയുള്ളവരിൽ സാധാരണയായി കാണപ്പെടുന്ന കാഴ്ചക്കുറവ് മിതമായ നിരക്കിൽ പരിഹരിക്കുക എന്നതാണ്  പ്രധാനമായും ലക്ഷ്യമിടുന്നത്.