'കോഴിക്കറിയിൽ തൂവലും ചോരയും, ചോറിൽ പാറ്റ'; മൈസൂരിൽ പഠിക്കുന്ന മലയാളി നഴ്സിംഗ് വിദ്യാർഥികൾക്ക് ദുരിതം, പരാതിപ്പെട്ടാൽ ഭീഷണിപ്പെടുത്തുന്നുവെന്ന് പരാതി

മൈസൂരു: (KasargodVartha) മലയാളി നഴ്സിംഗ് വിദ്യാർഥികൾക്ക് ദുരിതം. നഗരത്തിലെ അഞ്ച് കോളേജുകളിൽ പഠിക്കുന്ന വിദ്യാർഥികൾക്കാണ് തികച്ചും വൃത്തിഹീനമായ ഭക്ഷണം നൽകുന്നതെന്ന ഗുരുതര പരാതി ഉയർന്നിരിക്കുന്നത്. ഇതിനെ തുടർന്ന് വിദ്യാർഥികൾക്കിടയിൽ ഭക്ഷ്യവിഷബാധ പതിവാണെന്നും ആരോപണമുണ്ട്.

കോഴിക്കറിയിൽ തൂവലും ചോരയും

എല്ലാ വിദ്യാർഥികൾക്കും ഒരു കോമൺ മെസ്സിൽ നിന്നാണ് ഭക്ഷണം എത്തിക്കുന്നത്. ഇവിടെ നിന്നും നൽകുന്ന കോഴിക്കറിയിൽ തൂവലും ചോരയും അടക്കം കണ്ടെത്തിയിട്ടുണ്ട്. ഇതിന് പുറമെ ചോറിൽ നിന്നും പാറ്റയെയും, കഴിഞ്ഞ ദിവസം നൽകിയ ചപ്പാത്തിയിൽ നിന്നും പ്ലാസ്റ്റിക് അവശിഷ്ടങ്ങളും ലഭിച്ചതായി വിദ്യാർഥികൾ പരാതിപ്പെടുന്നു. കോമൺ മെസ്സിലെ നിലവിലെ സാഹചര്യം അതിദയനീയമാണ്. തികച്ചും വൃത്തിഹീനമായ അന്തരീക്ഷത്തിലാണ് ഇവിടെ ഭക്ഷണം പാകം ചെയ്യുന്നതെന്ന് വിദ്യാർഥികൾ പറയുന്നു. ഇതിന്റെ ഞെട്ടിക്കുന്ന ദൃശ്യങ്ങൾ വിദ്യാർഥികൾ പകർത്തി പുറത്തുവിട്ടിട്ടുണ്ട്.

ഭീഷണിപ്പെടുത്തി അധികൃതർ

ഭക്ഷണത്തിനായി മെസ് ഫീസായി പ്രതിവർഷം 80,000 രൂപയാണ് ഓരോ വിദ്യാർഥിയിൽ നിന്നും ഈടാക്കുന്നത്. ഇത്രയും വലിയ തുക വാങ്ങിയിട്ടും പുറത്തുനിന്നുള്ള ഭക്ഷണം കൊണ്ടുവരാൻ വിദ്യാർഥികൾക്ക് യാതൊരു അനുവാദവുമില്ല. മോശം ഭക്ഷണത്തിനെതിരെ ചോദ്യം ചെയ്താൽ കടുത്ത ശിക്ഷാനടപടികൾ സ്വീകരിക്കുമെന്നാണ് അധികൃതരുടെ ഭീഷണി. ഇന്റേണൽ മാർക്ക് കട്ട് ചെയ്യുമെന്നും പഠനം പൂർത്തിയാകുമ്പോൾ സർട്ടിഫിക്കറ്റുകൾ നൽകില്ലെന്നും അധികൃതർ ഭീഷണിപ്പെടുത്തുന്നതായി വിദ്യാർഥികൾ വ്യക്തമാക്കുന്നു.

ഒത്തുകളിച്ച് ഏജൻസിയും കോളേജുകളും

നിലവിൽ ഒരു ഏജന്‍സി വഴിയാണ് കോമൺ മെസ്സ് വഴി വിദ്യാർഥികൾക്ക് ഭക്ഷണം എത്തിക്കുന്നത്. അഡ്മിഷൻ സമയത്ത് വിദ്യാർഥികളെ സംഘടിപ്പിച്ചു നൽകുന്നതിന് പ്രതിഫലമായാണ് കോളേജുകൾ ഈ ഏജൻസിയിൽ നിന്നുതന്നെ ഭക്ഷണം വാങ്ങാൻ നിർബന്ധിതരാകുന്നതെന്നാണ് വിവരം. ഏജൻസിയും കോളേജുകളും തമ്മിൽ ഈ വിഷയത്തിൽ വൻ ഒത്തുകളിയാണ് നടക്കുന്നതെന്ന് വിദ്യാർഥികൾ ആരോപിക്കുന്നു. ഈ ഏജന്‍സി ആകെ അഞ്ച് കോളേജുകൾക്കാണ് നിലവിൽ ഭക്ഷണം നൽകുന്നത്.

പരാതിപ്പെട്ടാലും യാതൊരു നടപടിയുമുണ്ടാകില്ലെന്നും എല്ലാം വീണ്ടും പഴയ പടി തന്നെ തുടരുകയാണെന്നും അവർ പറയുന്നു. അതേസമയം, മലയാളികളായ വിദ്യാർഥികളെ ചൂഷണം ചെയ്യുന്ന ഈ ഏജന്‍സി നടത്തുന്നതും മലയാളികൾ തന്നെയാണെന്നതാണ് മറ്റൊരു വസ്തുത.

വിദ്യാർഥികളുടെ സുരക്ഷയുമായി ബന്ധപ്പെട്ട ഈ സുപ്രധാന വാർത്ത നിങ്ങളുടെ സുഹൃത്തുക്കൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. പ്രാദേശിക വാർത്തകളും മറ്റ് വിവരങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഞങ്ങളുടെ ഫേസ്ബുക്ക് പേജില്‍ വാർത്തയ്ക്ക് താഴെ കമന്റായി രേഖപ്പെടുത്താൻ മറക്കരുത്.

Article Summary: Malayali nursing students in five colleges in Mysuru alleged that the agency, which is run by Malayalis, provides extremely unhygienic food including chicken curry with feathers and blood, and authorities threaten to cut internal marks or withhold certificates if they complain about the mandatory Rs 80,000 annual mess system.

#MysuruNews #NursingStudents #FoodSafety #MalayaliStudents #KeralaNewsMalayalam