മലിനീകരണം രൂക്ഷം; മുട്ടത്തൊടിയിലെ അഭയം ഡയാലിസിസ് സെൻ്റർ അടച്ചുപൂട്ടാൻ ഹൈകോടതി ഉത്തരവ്

കാസർകോട്: (KasargodVartha) മുട്ടത്തൊടിയിൽ പ്രവർത്തിക്കുന്ന അഭയം ഡയാലിസിസ് സെൻ്റർ അടച്ചുപൂട്ടാൻ ഹൈകോടതി ഉത്തരവിട്ടു. 2026 നവംബർ 11-നാണ് ചീഫ് ജസ്റ്റിസ് സൗമെൻ സെൻ, ജസ്റ്റിസ് വി എം ശ്യാം കുമാർ എന്നിവരടങ്ങിയ ഡിവിഷൻ ബെഞ്ച് ഉത്തരവ് പുറപ്പെടുവിച്ചത്. മുട്ടത്തൊടി സ്വദേശികളായ അബ്ദുൽ സലാം (64), എ എ ശംസീർ (39) എന്നിവർ നൽകിയ റിട്ട് ഹർജിയിലാണ് (ഡബ്ല്യുപി സി നമ്പർ 9865 ഓഫ് 2025) കോടതിയുടെ നടപടി.

മലിനീകരണം ചൂണ്ടിക്കാട്ടി ഹൈകോടതി

സ്ഥാപനത്തിൻ്റെ പ്രവർത്തനവുമായി ബന്ധപ്പെട്ട് പരിസ്ഥിതി പ്രശ്നങ്ങൾ ഉയർത്തി പരാതികൾ നാട്ടുകാർ നൽകിയിരുന്നു. ഇതിന് പിന്നാലെ കേരള സംസ്ഥാന മലിനീകരണ നിയന്ത്രണ ബോർഡ് 2026 നവംബർ 4-ന് നടത്തിയ പരിശോധനയുടെ അടിസ്ഥാനത്തിലുള്ള റിപ്പോർട്ട് സ്പെഷ്യൽ ഗവൺമെൻ്റ് പ്ലീഡർ കോടതിയിൽ സമർപ്പിച്ചു. ഈ റിപ്പോർട്ട് പ്രകാരം, ഡയാലിസിസ് സെൻ്റർ ആവശ്യമായ നിയമങ്ങളും ചട്ടങ്ങളും പാലിക്കാതെയാണ് പ്രവർത്തിക്കുന്നതെന്നും, സ്ഥാപനത്തിൻ്റെ പ്രവർത്തനം പരിസ്ഥിതി മലിനീകരണത്തിന് കാരണമായിട്ടുണ്ടെന്നും കോടതി വിലയിരുത്തി.

തുടർന്നാണ് സ്ഥാപനം അടച്ചുപൂട്ടാൻ ചീഫ് ജസ്റ്റിസ് അധ്യക്ഷനായ ബെഞ്ച് നിർദേശിച്ചത്. ബയോമെഡിക്കൽ മാലിന്യങ്ങളുടെ അശാസ്ത്രീയമായ സംസ്കരണവും മലിനജലം പുറന്തള്ളുന്നതുമാണ് സ്ഥാപനത്തിനെതിരെ ഉയർന്ന പ്രധാന പാരിസ്ഥിതിക പരാതികൾ.

മാനദണ്ഡങ്ങൾ പാലിച്ചാൽ തുറക്കാം

സംസ്ഥാന സർക്കാർ, തദ്ദേശ സ്വയംഭരണ വകുപ്പ്, ആരോഗ്യ വകുപ്പ്, കാസർകോട് ജില്ലാ കളക്ടർ, തഹസിൽദാർ, ചെങ്കള വില്ലേജ് ഓഫീസർ, ചെങ്കള ഗ്രാമപഞ്ചായത്ത്, മലിനീകരണ നിയന്ത്രണ ബോർഡ് ഉദ്യോഗസ്ഥർ, കാഞ്ഞങ്ങാട് ജില്ലാ മെഡിക്കൽ ഓഫീസർ, അഭയം ചാരിറ്റബിൾ ട്രസ്റ്റ്, മാനേജിങ് ട്രസ്റ്റി ഉമറുൽ ഖയ്യൂം തുടങ്ങി നിരവധി പേരെ എതിർകക്ഷികളാക്കിയാണ് ഹർജിക്കാർ കോടതിയെ സമീപിച്ചത്.

അതേസമയം, മലിനീകരണ നിയന്ത്രണ ബോർഡിൽ നിന്നുള്ള ക്ലിയറൻസും മറ്റ് നിയമാനുസൃതമായ അനുമതികളും ലഭിക്കുന്നത് വരെ സ്ഥാപനം തുറന്നുപ്രവർത്തിക്കാൻ അനുവദിക്കില്ലെന്ന് കോടതി വ്യക്തമാക്കി. ഈ നിയമപരമായ വ്യവസ്ഥകൾ പൂർത്തിയാക്കുന്ന പക്ഷം ഡയാലിസിസ് സെൻ്ററിന് വീണ്ടും പ്രവർത്തനം ആരംഭിക്കാമെന്നും വിധിന്യായത്തിൽ പറയുന്നു.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Kerala High Court ordered the immediate closure of Abhayam Dialysis Centre in Kasaragod Muttathody over severe pollution issues raised by local residents.

#KasaragodNews #KeralaHighCourt #PollutionControlBoard #AbhayamDialysisCentre #MalayalamLegalNews #KeralaHealth #EnvironmentalNews #RenuNews