മരുന്നുസംഭരണത്തിൽ അഴിച്ചുപണി; ഇടനിലക്കാരെ ഒഴിവാക്കി സർക്കാർ, 20 ശതമാനം വിലക്കുറവ് പ്രതീക്ഷിക്കുന്നു

തിരുവനന്തപുരം: (KasargodVartha) സംസ്ഥാനത്തെ ഗവൺമെൻ്റ് ആശുപത്രികളിലേക്കും കാരുണ്യ ഫാർമസികളിലേക്കും മരുന്ന് സംഭരിക്കാനുള്ള ടെൻഡർ നടപടികളിൽ നിന്ന് ഇടനിലക്കാരെ പൂർണമായും ഒഴിവാക്കാൻ ആരോഗ്യ വകുപ്പിൻ്റെ തീരുമാനം. ഇടനിലക്കാരെ ഒഴിവാക്കി മരുന്ന് നിർമാതാക്കളെ നേരിട്ട് ടെൻഡറിൽ പങ്കെടുപ്പിക്കാനാണ് സർക്കാർ ലക്ഷ്യമിടുന്നത്.

ഇതോടെ കാൻസർ മരുന്നുകൾ ഉൾപ്പെടെയുള്ള എല്ലാ മരുന്നുകളും കുറഞ്ഞത് 20 ശതമാനം വിലക്കുറവിൽ സംഭരിക്കാനാകുമെന്നാണ് ആരോഗ്യവകുപ്പ് പ്രതീക്ഷിക്കുന്നത്.

കെഎംഎസ്സിഎല്ലിൽ സമഗ്ര മാറ്റം; ഡിസംബറിൽ പുതിയ ടെൻഡർ

സംസ്ഥാനത്ത് പ്രതിവർഷം 865 ഇനം മരുന്നുകളുടെ ആവശ്യമുണ്ടെങ്കിലും ഇത് പൂർണമായും വാങ്ങാറില്ല എന്നതാണ് മുൻകാലങ്ങളിലെ പ്രശ്നം. പിണറായി സർക്കാരിൻ്റെ അവസാന കാലത്തെ കണക്കുകൾ അനുസരിച്ച് 500 ഇനം മരുന്നുകൾ മാത്രമേ വാങ്ങിയിട്ടുള്ളൂ. എന്നാൽ വരുന്ന ഡിസംബറിൽ ആരംഭിക്കുന്ന പുതിയ ടെൻഡർ നടപടികളിലൂടെ ആവശ്യമായ മുഴുവൻ മരുന്നുകളും വാങ്ങാനാണ് മന്ത്രി കെ മുരളീധരൻ്റെ നിർദേശം.

മരുന്ന് വിതരണത്തിലെ കാലതാമസം ഒഴിവാക്കി ആശുപത്രികളിൽ കൃത്യസമയത്ത് മരുന്നുകൾ ലഭ്യമാക്കാനാണ് നടപടി. കേരള മെഡിക്കൽ സർവീസസ് കോർപ്പറേഷൻ്റെ മരുന്ന് സംഭരണ പ്രക്രിയയിലാണ് സമഗ്രമാറ്റം കൊണ്ടുവരുന്നത്.

വിദേശനിർമിത മരുന്നുകളുടെ ടെൻഡറിൽ പങ്കെടുക്കാനുള്ള അവകാശം ആദ്യ ഇറക്കുമതിക്കാർക്ക് മാത്രമായി നിജപ്പെടുത്താനും തീരുമാനിച്ചിട്ടുണ്ട്. ടെൻഡർ ലഭിക്കുന്ന കമ്പനികൾ മറ്റ് മൂന്ന് സംസ്ഥാനങ്ങളിൽ വിതരണം ചെയ്യുന്ന അതേ ബാച്ച് മരുന്നാണ് കേരളത്തിലേക്കും നൽകേണ്ടത്. എല്ലാ മരുന്നുകളുടെയും ഗുണമേന്മ പൂർണമായി പരിശോധിക്കാനുള്ള സംവിധാനം നിലവിൽ ഒരു സംസ്ഥാനത്തുമില്ല.

അതിനാൽ ഏതെങ്കിലും സംസ്ഥാനത്തെ പരിശോധനയിൽ മരുന്നിന് ഗുണമേന്മയില്ലെന്ന് കണ്ടെത്തിയാൽ ആ കമ്പനിയെ കേരളത്തിൽ ഉടനടി വിലക്കുപട്ടികയിൽ ഉൾപ്പെടുത്തും. നിശ്ചിത സമയത്തിനകം കമ്പനികളുടെ കുടിശിക തീർക്കുമെന്നും ആരോഗ്യവകുപ്പ് അറിയിച്ചു. കുടിശിക കൃത്യമായി നൽകുന്നത് വഴി വൻകിട കമ്പനികളെ ടെൻഡറുകളിലേക്ക് ആകർഷിക്കാൻ സാധിക്കുമെന്നാണ് വിലയിരുത്തൽ.

വരുന്നു ബ്രാൻഡഡ് ജനറിക് മരുന്നുകൾ

കാൻസർ, ജീവിതശൈലീരോഗങ്ങൾ എന്നിവയ്ക്ക് പ്രധാനമായും ചെറുകിട കമ്പനികളുടെ മരുന്നുകളാണ് ഇതുവരെ വാങ്ങിയിരുന്നത്. എന്നാൽ ഇവയ്ക്ക് വേണ്ടത്ര ഗുണമേന്മയില്ലെന്നാണ് ഡോക്ടർമാരുടെ ആക്ഷേപം. അതിനാൽ ഇനി മുതൽ വൻകിട കമ്പനികളിൽ നിന്ന് 'ബ്രാൻഡഡ് ജനറിക്' മരുന്നുകൾ വാങ്ങാനാണ് പുതിയ തീരുമാനം. ഗുണമേന്മയില്ലാത്ത മരുന്നുകൾ രോഗികളുടെ ആരോഗ്യത്തെ ബാധിക്കുമെന്ന വിദഗ്ധ സമിതിയുടെ റിപ്പോർട്ടും തീരുമാനത്തിന് പിന്നിലുണ്ട്.

ഒറിജിനൽ ബ്രാൻഡഡ് മരുന്നിൻ്റെ അതേ ഘടകങ്ങളും അളവും ഗുണനിലവാരവും ബ്രാൻഡഡ് ജനറിക് മരുന്നുകൾക്കും ഉണ്ടാകും. ഒറിജിനൽ മരുന്നുകളെ അപേക്ഷിച്ച് ഇവയുടെ വില വളരെ കുറവാണെന്നതാണ് ആകർഷണം. എന്നാൽ സാധാരണ ജനറിക് മരുന്നുകളെക്കാൾ ചില ബ്രാൻഡഡ് ജനറിക്കുകൾക്ക് അൽപ്പം വില കൂടുതലായിരിക്കും. വിലയിലെ ഈ നേരിയ വ്യത്യാസം നോക്കേണ്ടതില്ലെന്നാണ് ആരോഗ്യവകുപ്പിൻ്റെ തീരുമാനം.

കൂടുതല്‍ വിവരങ്ങള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റില്‍ കമൻ്റായി രേഖപ്പെടുത്തുക.

Article Summary: Kerala govt limits middlemen in medicine tender to reduce costs by 20%.

#KeralaHealthDepartment #KMSCL #KarunyaPharmacy #MedicineProcurement #MalayalamNews #RenuNews