ദേശീയ മെഡിക്കൽ ക്വിസ് ഫൈനലിൽ തിളങ്ങി കാസർകോട് സ്വദേശിയായ യുവ ഡോക്ടർ

ജോധ്പൂർ: (KasargodVartha) ശിശുരോഗ വിദഗ്ധരുടെ അഖിലേന്ത്യാ സംഘടനയായ ഇന്ത്യൻ പീഡിയാട്രിക് അസോസിയേഷൻ (ഐപിഎ) മെഡിക്കൽ പി.ജി. വിദ്യാർത്ഥികൾക്കായി സംഘടിപ്പിച്ച അഖിലേന്ത്യാ ക്വിസ് മത്സരത്തിൽ കാസർഗോഡ് ചെമ്പിരിക്ക സ്വദേശിയായ ഡോ. മുഹമ്മദ് ഫിർനാസ് ദേശീയ ഫൈനൽ റൗണ്ടിൽ പ്രവേശിച്ചു. നോർത്ത് സോൺ മത്സരത്തിൽ ഒന്നാമതെത്തിയാണ് ഈ യുവ ഡോക്ടർ ഈ അഭിമാന നേട്ടം കൈവരിച്ചത്.

ജോധ്പൂർ എയിംസിനെ പ്രതിനിധീകരിച്ച് സഹപാഠിയായ ഡോ. തന്മയിക്കൊപ്പം മത്സരിച്ചാണ് ഡോ. ഫിർനാസ് മുന്നേറിയത്. കഠിനമായ കോളേജ് തലവും സംസ്ഥാന തലവും വിജയകരമായി പിന്നിട്ട ശേഷമാണ് ഇവർ സോൺ മത്സരത്തിൽ പങ്കെടുത്തത്. ഡൽഹിയിലെ ലെ മെറിഡിയൻ ഹോട്ടലിൽ ഞായറാഴ്ച രാവിലെ നടന്ന നോർത്ത് സോൺ മത്സരത്തിൽ മികച്ച പ്രകടനം കാഴ്ചവെച്ച് ഒന്നാം സ്ഥാനം നേടി ഇരുവരും ദേശീയ ഫൈനലിലേക്ക് യോഗ്യത നേടി.

ഇനി കൊൽക്കത്തയിലെ എയിംസിൽ നടക്കുന്ന ദേശീയതല ഫൈനലിൽ, രാജ്യത്തിന്റെ മറ്റ് മൂന്ന് സോണുകളിൽ നിന്നുള്ള വിജയികളുമായി ഇവർ മാറ്റുരയ്ക്കും.

കാസർകോട് കുടുംബശ്രീ മിഷൻ ജില്ലാ കോർഡിനേറ്ററായിരുന്ന മജീദ് ചെമ്പിരിക്കയുടെയും നഫീസത്തുൽ മിസ്രിയയുടെയും മകനാണ് ഡോ. ഫിർനാസ്. നേരത്തെ അഖിലേന്ത്യാ മെഡിക്കൽ എൻട്രൻസ് പരീക്ഷയിൽ മികച്ച റാങ്ക് നേടി ഡൽഹി എയിംസിൽ നിന്നാണ് ഈ മിടുക്കൻ എംബിബിഎസ് പഠനം പൂർത്തിയാക്കിയത്.

ഈ വാർത്തയെക്കുറിച്ച് നിങ്ങൾക്കെന്താണ് പറയാനുള്ളത്? നിങ്ങളുടെ അഭിപ്രായം കമന്റ് ബോക്സിൽ രേഖപ്പെടുത്തൂ.

Article Summary: Dr. Muhammed Firnas from Kasaragod reaches National Medical Quiz final.

#MedicalQuiz #DrMuhammedFirnas #Kasaragod #MedicalStudents #JodhpurAIIMS #NationalFinals