കാഞ്ഞങ്ങാട് ആശുപത്രിയിലെ ഹെർണിയ ശസ്ത്രക്രിയ: ചികിത്സാ പിഴവില്ലെന്ന് ഡിഎംഒയുടെ റിപ്പോർട്ട്, മനുഷ്യാവകാശ കമ്മീഷൻ കേസ് തീർപ്പാക്കി

കാഞ്ഞങ്ങാട്: (KasargodVartha) ജില്ലാ ആശുപത്രിയിൽ നടന്ന ഹെർണിയ ശസ്ത്രക്രിയക്കിടെ ചികിത്സാപിഴവുണ്ടായിട്ടുണ്ടെന്ന ആരോപണം തെറ്റാണെന്ന് ജില്ലാ മെഡിക്കൽ ഓഫീസർ (ഡിഎംഒ) മനുഷ്യാവകാശ കമ്മീഷനെ അറിയിച്ചു.

2024 സെപ്റ്റംബർ 19-ന് നടന്ന ശസ്ത്രക്രിയക്കിടെ പിഴവുണ്ടായെന്ന ആരോപണത്തെക്കുറിച്ച് അന്വേഷിക്കാൻ കമ്മീഷൻ ജുഡീഷ്യൽ അംഗം കെ ബൈജുനാഥ് നൽകിയ നിർദ്ദേശത്തിന്റെ അടിസ്ഥാനത്തിലാണ് ഡിഎംഒ റിപ്പോർട്ട് സമർപ്പിച്ചത്.

കമ്മീഷൻ നിർദ്ദേശാനുസരണം മെഡിക്കൽ സംഘം രൂപീകരിച്ച് വിശദമായ അന്വേഷണം നടത്തിയതായി ഡിഎംഒ അറിയിച്ചു. ശസ്ത്രക്രിയ സമയത്ത് 'ഹെർണിയ സാക്ക്' തിരയുമ്പോൾ അത് കാണേണ്ട സ്ഥലത്ത് കണ്ടില്ലെന്നും, ഇതിനിടെ 'ഫിമറൽ വെയിനി'ന് മുറിവ് സംഭവിക്കുകയും ചെയ്തതായി റിപ്പോർട്ടിൽ പറയുന്നു. ഇക്കാര്യം മനസ്സിലാക്കിയ ഡോക്ടർ കുട്ടിയെ ഉടൻ വിദഗ്ദ്ധ ചികിത്സക്കായി വാസ്കുലാർ സർജറി വിഭാഗത്തിലേക്ക് മാറ്റി.

നിലവിൽ ആസ്റ്റർമിംസിലെ റിപ്പോർട്ട് പ്രകാരം ചികിത്സ തുടരുന്നുണ്ട്. ശസ്ത്രക്രിയ സമയത്ത് രക്തക്കുഴലുകൾക്ക് 1 മുതൽ 3 വരെ മുറിവുകൾ സംഭവിക്കാനുള്ള സാധ്യതയുണ്ടെന്നും ഇത് ചികിത്സാപിഴവായി കാണാനാവില്ലെന്നും റിപ്പോർട്ടിൽ പറയുന്നു.

മെഡിക്കൽ സംഘം വീട്ടിലെത്തി കുട്ടിയെ വിശദമായി പരിശോധിച്ചു. ശസ്ത്രക്രിയ മുറിവ് പൂർണമായി ഉണങ്ങിയിട്ടുണ്ടെന്നും കാലിന് ബലക്കുറവോ വീക്കമോ ഇല്ലെന്നും ആരോഗ്യം സാധാരണ നിലയിലാണെന്നും റിപ്പോർട്ടിൽ വ്യക്തമാക്കുന്നു. വാസ്കുലർ സർജന്റെ അഭിപ്രായപ്രകാരം ഭാവിയിൽ ബുദ്ധിമുട്ടുണ്ടാകാൻ സാധ്യതയില്ലെന്നും റിപ്പോർട്ടിലുണ്ട്.

തുടർ ചികിത്സ കാഞ്ഞങ്ങാട് ജില്ലാ ആശുപത്രി വഴി തുടരാവുന്നതാണെന്നും ഡിഎംഒയുടെ റിപ്പോർട്ടിൽ പറയുന്നു. ഡിഎംഒയുടെയും വിദഗ്ദ്ധ സമിതിയുടെയും റിപ്പോർട്ടിന്റെ അടിസ്ഥാനത്തിൽ മനുഷ്യാവകാശ കമ്മീഷൻ ഈ കേസ് തീർപ്പാക്കി. പത്രവാർത്തയുടെ അടിസ്ഥാനത്തിൽ കമ്മീഷൻ സ്വമേധയാ രജിസ്റ്റർ ചെയ്ത കേസിലാണ് ഈ നടപടി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെയ്ക്കുക. വാർത്ത സുഹൃത്തുക്കൾക്ക് ഷെയർ ചെയ്യൂ. 

Article Summary: DMO's report to the Human Rights Commission states no medical negligence in Kanhangad District Hospital hernia surgery, leading to case closure.

#Kanhangad #HerniaSurgery #MedicalReport #HumanRightsCommission #DMOReport #CaseClosed