നാല് പതിറ്റാണ്ടിലേറെയുള്ള മാതൃകാപരമായ പ്രവർത്തനം; ആസ്റ്റർ ഗ്രൂപ്പിനെ പ്രശംസിച്ച് മുഖ്യമന്ത്രി

കാസർകോട്: (KasargodVartha) ചെങ്കള ഇന്ദിര നഗറിൽ സ്ഥാപിതമായ ആസ്റ്റർ മിംസ് ഹോസ്പിറ്റൽ, മുഖ്യമന്ത്രി പിണറായി വിജയൻ പ്രൗഡഗംഭീരമായ ചടങ്ങിൽ നാടമുറിച്ചും തിരിതെളിയിച്ചും ഉദ്ഘാടനം ചെയ്തു. ആസ്റ്റർ ഡി.എം. ഹെൽത്ത്‌കെയറിൻ്റെ കേരളത്തിലെ എട്ടാമത്തെ ആശുപത്രിയാണിത്. ഉദ്ഘാടന വേളയിൽ കർണാടക ആരോഗ്യ - കുടുംബക്ഷേമ വകുപ്പ് മന്ത്രി ദിനേശ് ഗുണ്ടു റാവു ഉൾപ്പെടെ നിരവധി പ്രമുഖർ സാക്ഷികളായി.

ആസ്റ്റർ, കേരളത്തിൽ മറ്റൊരു സുപ്രധാന ചുവടുവയ്പ്പ് നടത്തുന്നതിൽ ഏറെ സന്തോഷമുണ്ടെന്ന് മുഖ്യമന്ത്രി

ആരോഗ്യരംഗത്ത് വർഷങ്ങളുടെ പാരമ്പര്യമുള്ള ആസ്റ്റർ ഗ്രൂപ്പിൻ്റെ പ്രവർത്തനങ്ങളെ മുഖ്യമന്ത്രി പിണറായി വിജയൻ പ്രശംസിച്ചു. ആരോഗ്യസേവനമേഖലയിൽ നീണ്ട പാരമ്പര്യമുള്ള ആസ്റ്റർ, കേരളത്തിൽ മറ്റൊരു സുപ്രധാന ചുവടുവയ്പ്പ് നടത്തുന്നതിൽ ഏറെ സന്തോഷമുണ്ടെന്ന് അദ്ദേഹം പറഞ്ഞു. ദുബായിൽ ഒരു ക്ലിനിക്കായി തുടങ്ങി, നാല് പതിറ്റാണ്ടിലേറെയായി മാതൃകാപരമായ പ്രവർത്തനമാണ് ആസ്റ്റർ ഡി.എം. ഹെൽത്ത്‌കെയർ കാഴ്ചവച്ചിട്ടുള്ളത്. ഇന്ന് ഇന്ത്യയിലും ജി.സി.സി.യിലും ആശുപത്രികളും മറ്റ് ആരോഗ്യ സേവനങ്ങളും നൽകുന്ന സ്ഥാപനമായി വളർന്ന ഈ ഗ്രൂപ്പ്, ജനങ്ങൾക്ക് ഏറെ വിശ്വാസമുള്ള ഇടമായും മാറിയതായി മുഖ്യമന്ത്രി ചൂണ്ടിക്കാട്ടി. കേരളത്തിലെ ജനങ്ങളുമായി വിശ്വാസത്തിൽ പടുത്തുയർത്തിയ ആത്മബന്ധമാണ് ആസ്റ്ററിനുള്ളത്. ആസ്റ്റർ മിംസ് കാസർഗോഡിലൂടെ ആ ബന്ധം കൂടുതൽ ദൃഢമാവുകയാണ്. ഉന്നത നിലവാരത്തിലുള്ള ആരോഗ്യ സേവനം കാസർകോട്ടെ ജനങ്ങൾക്കും ലഭ്യമാകുമെന്ന് തനിക്ക് ഉറപ്പുണ്ടെന്നും മുഖ്യമന്ത്രി പ്രത്യാശ പ്രകടിപ്പിച്ചു.

ദിനേശ് ഗുണ്ടു റാവുവും ആസാദ് മൂപ്പനും പറഞ്ഞത്

ആസ്റ്റർ മിംസ് കാസർഗോഡ് യാഥാർഥ്യമായതിലൂടെ, ലോകോത്തര നിലവാരത്തിലുള്ള ആരോഗ്യ സേവനം പ്രദേശത്തെ ജനങ്ങൾക്ക് കൂടുതൽ അടുത്ത് എത്തിയിരിക്കുകയാണെന്ന് കർണാടക ആരോഗ്യ - കുടുംബക്ഷേമ വകുപ്പ് മന്ത്രി ദിനേശ് ഗുണ്ടു റാവു പറഞ്ഞു. ഇരു സംസ്ഥാനങ്ങളിലെയും ആരോഗ്യ സംരക്ഷണ സംവിധാനങ്ങൾ ശക്തിപ്പെടുത്തുന്നതിൽ ആസ്റ്റർ സുപ്രധാന പങ്കാണ് വഹിക്കുന്നതെന്നും അദ്ദേഹം കൂട്ടിച്ചേർത്തു. കർണാടകയിലെ ബെംഗ്ളൂറു ഉൾപ്പെടെയുള്ള സ്ഥലങ്ങളിലെ ആസ്റ്ററിൻ്റെ സേവനങ്ങളെ മന്ത്രി എടുത്തുപറഞ്ഞു. 
ഉന്നത നിലവാരത്തിലുള്ള ചികിത്സ എല്ലാവർക്കും ലഭ്യമാക്കുക എന്നതാണ് ആസ്റ്റർ ഡി.എം. ഹെൽത്ത്‌കെയർ മുന്നോട്ട് വയ്ക്കുന്ന ദർശനമെന്ന് സ്ഥാപകനും ചെയർമാനുമായ ഡോ. ആസാദ് മൂപ്പൻ വ്യക്തമാക്കി. പുതിയ ആശുപത്രി വടക്കൻ കേരളത്തിലെ ജനങ്ങളോടുള്ള പ്രതിബദ്ധതയുടെ അടയാളമാണെന്നും, അത്യാധുനിക സൗകര്യങ്ങൾ, വിദഗ്ധരായ ഡോക്ടർമാർ, അനുഭാവപൂർണമുള്ള പരിചരണം എന്നിവയെല്ലാം ഇവിടെ ലഭ്യമാകുമെന്നും അദ്ദേഹം കൂട്ടിച്ചേർത്തു.

ഉദ്ഘാടനത്തിൽ പങ്കെടുത്ത പ്രമുഖർ

മുഖ്യമന്ത്രിയോടൊപ്പം ആസ്റ്റർ ഡി.എം. ഹെൽത്ത്‌കെയർ സ്ഥാപകനും ചെയർമാനുമായ ഡോ. ആസാദ് മൂപ്പൻ, കർണാടക ആരോഗ്യ മന്ത്രി ദിനേശ് ഗുണ്ടു റാവു, കാസർഗോഡ് എം.പി. രാജ്മോഹൻ ഉണ്ണിത്താൻ, കാസർഗോഡ് എം.എൽ.എ. എൻ.എ. നെല്ലിക്കുന്ന്, ഉദുമ എം.എൽ.എ. സി.എച്ച്. കുഞ്ഞമ്പു, മഞ്ചേശ്വരം എം.എൽ.എ. എ.കെ.എം. അഷ്‌റഫ്, തൃക്കരിപ്പൂർ എം.എൽ.എ. എം. രാജഗോപാലൻ, കാഞ്ഞങ്ങാട് എം.എൽ.എ. ഇ. ചന്ദ്രശേഖരൻ, ജില്ലാ പഞ്ചായത്ത് പ്രസിഡൻ്റ് ബേബി ബാലകൃഷ്ണൻ, ചെങ്കള ഗ്രാമപഞ്ചായത്ത് പ്രസിഡൻ്റ് ഖാദർ ബദ്രിയ, ആസ്റ്റർ ഡി.എം. ഹെൽത്ത്‌കെയർ നോൺ-എക്സിക്യൂട്ടീവ് ഡയറക്ടർ ഷംസുദ്ദീൻ ബിൻ മൊഹിദീൻ മാമു ഹാജി, ഡയറക്ടർ അനൂപ് മൂപ്പൻ, എക്സിക്യൂട്ടീവ് ഡയറക്ടർ & ഗ്രൂപ്പ് ഹെഡ് ടി.ജെ. വിൽസൺ, ആസ്റ്റർ കേരള ക്ലസ്റ്റർ സി.എം.എസ്. ഡോ. സൂരജ് കെ.എം, ആസ്റ്റർ മിംസ് കാസർഗോഡ് & കണ്ണൂർ സി.ഒ.ഒ. ഡോ. അനൂപ് നമ്പ്യാർ തുടങ്ങിയവർ പങ്കെടുത്തു. 

കാസർകോട്ടെയും സംസ്ഥാന തലത്തിലെയും നിരവധി ജനപ്രതിനിധികളും വ്യാപാരപ്രമുഖരും പൊതുപ്രവർത്തകരും ആസ്റ്റർ ഗ്രൂപ്പ് നേതൃത്വവും സന്നിഹിതരായിരുന്നു.

നാല് പതിറ്റാണ്ടായി ആസ്റ്റർ ഗ്രൂപ്പ് നൽകുന്ന ആരോഗ്യസേവനങ്ങളെക്കുറിച്ച് നിങ്ങളുടെ അഭിപ്രായം കമൻ്റ് ചെയ്യുക.

Article Summary: CM Pinarayi Vijayan inaugurates Aster MIMS Kasaragod, praises Aster Group's long-standing service.

#AsterMIMS #Kasaragod #PinarayiVijayan #DrAzadMooppen #KeralaHealth #Inauguration