Health Report | കേരളത്തിൽ സിസേറിയൻ പ്രസവം ഏറ്റവും കുറവ് കാസർകോട്ട്; സംസ്ഥാനത്ത് കുത്തനെ കൂടുമ്പോൾ പ്രതീക്ഷയുടെ തുരുത്തായി ജില്ല

കാസർകോട്: (KasargodVartha) കേരളത്തിൽ സിസേറിയൻ പ്രസവങ്ങളുടെ എണ്ണം വർധിച്ചു വരുന്നതായി നാഷണൽ ഹെൽത്ത് മിഷൻ റിപോർട്. അഞ്ച് ജില്ലകളിൽ സിസേറിയൻ പ്രസവങ്ങളുടെ നിരക്ക് 50 ശതമാനത്തിൽ അധികമാണ്. ആലപ്പുഴ (56%), കൊല്ലം (54%), പത്തനംതിട്ട (53%), ഇടുക്കി (53%), എറണാകുളം (52%) എന്നീ ജില്ലകളിലാണ് സിസേറിയൻ കൂടുതലായി കാണപ്പെടുന്നത്. 

സംസ്ഥാന ശരാശരി 44 ശതമാനമാണ്. എന്നാൽ ഈ കണക്കുകൾക്കിടയിലും പ്രതീക്ഷ നൽകുന്ന ഒരു ചിത്രമുണ്ട്; കാസർകോട് ജില്ലയിൽ സിസേറിയൻ നിരക്ക് ഏറ്റവും കുറഞ്ഞ നിലയിൽ (34%) തുടരുന്നു. 2024 ഏപ്രിൽ മുതൽ നവംബർ വരെയുള്ള കണക്കുകൾ പ്രകാരമാണ് നാഷണൽ ഹെൽത്ത് മിഷൻ ഈ റിപോർട് തയ്യാറാക്കിയിരിക്കുന്നത്.

ആരോഗ്യ വിദഗ്ധരുടെ അഭിപ്രായത്തിൽ, സ്വാഭാവിക പ്രസവം പ്രോത്സാഹിപ്പിക്കുന്നതിൽ ഡോക്ടർമാരുടെ ഭാഗത്തുനിന്നുള്ള വിമുഖതയാണ് സിസേറിയൻ കൂടാനുള്ള പ്രധാന കാരണം. പ്രസവസമയത്തെ സങ്കീർണതകൾ ഒഴിവാക്കാനും അടിയന്തര സാഹചര്യങ്ങൾ കൈകാര്യം ചെയ്യാനുള്ള ബുദ്ധിമുട്ട് ഒഴിവാക്കാനും ഡോക്ടർമാർ സിസേറിയൻ തിരഞ്ഞെടുക്കുന്ന പ്രവണത കൂടിവരുന്നു. 

അതുപോലെ, ചില താലൂക് ആശുപത്രികൾ ഉയർന്ന അപകടസാധ്യതയുള്ള ഗർഭധാരണം കൈകാര്യം ചെയ്യാൻ മടിക്കുന്നതായും ഇത് മെഡികൽ കോളജുകളിലേക്കുള്ള റഫറലുകൾ വർദ്ധിപ്പിക്കുന്നുവെന്നും റിപോർടിൽ പറയുന്നു. കൂടാതെ, ഗർഭിണികളും അവരുടെ കുടുംബാംഗങ്ങളും സിസേറിയൻ തിരഞ്ഞെടുക്കുന്ന പ്രവണതയും വർധിച്ചിട്ടുണ്ട്.

സിസേറിയൻ നിരക്ക് വർധിക്കുന്നത് ഒരു ആഗോള പ്രതിഭാസമാണ്. ഇൻഡ്യയിലും യുകെയിലും സമാനമായ പ്രവണതകൾ കാണാം. യുകെയിൽ ഏകദേശം 25% പ്രസവങ്ങളും സിസേറിയൻ വഴിയാണ് നടക്കുന്നത്. സങ്കീർണമായ ഗർഭധാരണങ്ങളുടെ എണ്ണം വർധിക്കുന്നതും പ്രായംകൂടിയ സ്ത്രീകൾ ഗർഭം ധരിക്കുന്നതും ഇതിന് കാരണമായി ചൂണ്ടിക്കാണിക്കപ്പെടുന്നു. 

റോയൽ കോളജ് ഓഫ് ഒബ്‌സ്റ്റെട്രിഷ്യൻസ് ആൻഡ് ഗൈനക്കോളജിസ്റ്റ്സ് പ്രസിഡന്റ് ഡോ. റാനി ഥാക്കർ പറയുന്നതനുസരിച്ച്, സങ്കീർണമായ ജനനങ്ങളുടെ വർധനവ് ഒരു പ്രധാന ഘടകമാണ്. ഭാരം കൂടുന്നതും കൂടുതൽ പ്രായത്തിൽ കുട്ടികളെ പ്രസവിക്കാൻ തിരഞ്ഞെടുക്കുന്നതും സങ്കീർണതകളുടെ സാധ്യത വർധിപ്പിക്കുന്നു.

ഇൻഡ്യയിൽ, കർണാടക പോലുള്ള സംസ്ഥാനങ്ങളിൽ സർകാർ ആശുപത്രികളിൽ സിസേറിയൻ നിരക്ക് വർധിക്കുന്നതായി കണ്ടെത്തിയിട്ടുണ്ട്. ഇത് കണക്കിലെടുത്ത് കർണാടക സർകാർ സിസേറിയൻ കുറയ്ക്കുന്നതിനുള്ള നടപടികൾ ആരംഭിച്ചിട്ടുണ്ട്. ആരോഗ്യ പ്രൊഫഷണൽസിന് പരിശീലനം നൽകാനും പൊതുജനങ്ങളിൽ അവബോധം വളർത്താനുമുള്ള പരിപാടികൾ ആസൂത്രണം ചെയ്തിട്ടുണ്ട്.

ഈ സാഹചര്യത്തിൽ, കാസർകോട് ജില്ല ഒരു മാതൃകയായി നിലകൊള്ളുന്നു. സ്വാഭാവിക പ്രസവത്തിന്റെ പ്രാധാന്യം മനസ്സിലാക്കുകയും അതിനെ പ്രോത്സാഹിപ്പിക്കുകയും ചെയ്യുന്ന ഒരു സംസ്കാരം കാസർകോട് നിലനിൽക്കുന്നുവെന്നാണ് ചൂണ്ടിക്കാട്ടുന്നത്. സിസേറിയൻ പ്രസവങ്ങൾ വർധിക്കുന്നത് അമ്മയുടെയും കുഞ്ഞിന്റെയും ആരോഗ്യത്തെ ദോഷകരമായി ബാധിച്ചേക്കാം എന്നതിനാൽ ഈ പ്രവണതയെ ഗൗരവമായി കാണേണ്ടതുണ്ട്. 

അനാവശ്യ സിസേറിയനുകൾ ഒഴിവാക്കാനും സ്വാഭാവിക പ്രസവം പ്രോത്സാഹിപ്പിക്കാനുമുള്ള നടപടികൾ സ്വീകരിക്കേണ്ടത് അനിവാര്യമാണ്. ഇതിനായി ആരോഗ്യ പ്രവർത്തകർക്കും പൊതുജനങ്ങൾക്കും ശരിയായ ബോധവൽക്കരണം നൽകേണ്ടതുണ്ട്. 

 #Kasaragod, #CesareanRate, #HealthTrends, #KeralaNews, #NaturalDelivery, #Healthcare