കാൽമുട്ട് മാറ്റിവെക്കൽ ശസ്ത്രക്രിയാ രംഗത്ത് അത്യാധുനിക സാങ്കേതികവിദ്യ അവതരിപ്പിച്ച് കാസർകോട് ആസ്റ്റർ മിംസ്; ജില്ലയിലെ ആദ്യത്തെ റോബോട്ടിക് കാൽമുട്ട് മാറ്റിവെക്കൽ ശസ്ത്രക്രിയ വിജയകരമായി പൂർത്തിയാക്കി

കാസർകോട്: (KasargodVartha) വടക്കെ മലബാറിലെ എല്ലുരോഗ ചികിത്സാരംഗത്ത് പുതിയ അധ്യായം കുറിച്ച് കാസർകോട് ആസ്റ്റർ മിംസ് ആശുപത്രി. കാൽമുട്ട് മാറ്റിവെക്കൽ ശസ്ത്രക്രിയയിൽ അത്യാധുനിക കോറി (CORI) റോബോട്ടിക് സാങ്കേതികവിദ്യ വിജയകരമായി ഉപയോഗിച്ച് ജില്ലയിൽ ആദ്യമായി ശസ്ത്രക്രിയ നടത്തിയതായി ആശുപത്രി ചീഫ് ഓപ്പറേറ്റിങ് ഓഫീസർ സുധീർ ബാസുരി കാസർകോട് പ്രസ്ക്ലബ്ബിൽ നടത്തിയ വാർത്താസമ്മേളനത്തിൽ അറിയിച്ചു. കാൽ മുട്ടിന് തെയ്മാനം സംഭവിച്ച് ബുദ്ധിമുട്ടുന്ന രോഗികൾക്ക് വലിയ ആശ്വാസമാണ് ഈ ചികിത്സ.

ആരോഗ്യ രംഗത്തെ വലിയൊരു കുതിച്ചുചാട്ടമായാണ് ഈ സാങ്കേതികവിദ്യയുടെ വരവിനെ കാസർകോട്ടുകാർ നോക്കിക്കാണുന്നത്.

എന്താണ് റോബോട്ടിക് സർജറിയും സാധാരണ സർജറിയും തമ്മിലുള്ള വ്യത്യാസം?

സാധാരണ കാൽമുട്ട് മാറ്റിവെക്കൽ ശസ്ത്രക്രിയകളെ അപേക്ഷിച്ച് സങ്കീർണ്ണതകളും ബുദ്ധിമുട്ടുകളും കുറക്കാൻ സഹായിക്കുന്ന നൂതന സാങ്കേതികവിദ്യയാണ് കോറി റോബോട്ടിക് ശസ്ത്രക്രിയ.

സാധാരണ ശസ്ത്രക്രിയ: സാധാരണ ശസ്ത്രക്രിയയിൽ സർജൻ്റെ അനുഭവസമ്പത്തും കാഴ്ചയുമാണ് പ്രധാനമായും ആശ്രയിക്കുന്നത്. എല്ലുകൾ മുറിക്കുന്നതിലും ഇംപ്ലാന്റ് സ്ഥാപിക്കുന്നതിലും ചെറിയ വ്യതിയാനങ്ങൾ വരാനുള്ള സാധ്യത കൂടുതലാണ്. ഇത് ചിലപ്പോൾ പേശികൾക്കും മൃദുകോശങ്ങൾക്കും കേടുപാടുകൾ വരുത്തുകയും, രോഗി പൂർണ്ണമായും സുഖം പ്രാപിക്കാൻ കൂടുതൽ സമയമെടുക്കുകയും ചെയ്യും.

റോബോട്ടിക് ശസ്ത്രക്രിയ: കോറി റോബോട്ടിക് സാങ്കേതികവിദ്യയിൽ, ഓരോ രോഗിയുടെയും കാൽമുട്ടിന്റെ ഘടന ശസ്ത്രക്രിയയ്ക്കിടെ തന്നെ സൂക്ഷ്മമായി വിലയിരുത്തുന്നു. റോബോട്ടിക് കൈകളുടെ സഹായത്തോടെ മില്ലീമീറ്റർ കൃത്യതയിലാണ് എല്ലുകൾ മുറിക്കുന്നതും ഇംപ്ലാന്റുകൾ സ്ഥാപിക്കുന്നതും. തികഞ്ഞ കൃത്യതയോടെയുള്ള ശസ്ത്രക്രിയയായതിനാൽ പേശികൾക്കും അസ്ഥികൾക്കും ചുറ്റുമുള്ള മൃദുകോശങ്ങൾക്കും ഉണ്ടാകുന്ന ആഘാതം പരമാവധി കുറയ്ക്കാൻ ഇതിലൂടെ സാധിക്കുന്നു. വേദനരഹിതമായ ചികിത്സയും അതിവേഗത്തിലുള്ള രോഗമുക്തിയുമാണ് ഇതിന്റെ ഏറ്റവും വലിയ പ്രത്യേകത.

രോഗിക്ക് ലഭിക്കുന്ന പ്രധാന പ്രയോജനങ്ങൾ

റോബോട്ടിക് കാൽമുട്ട് മാറ്റിവെക്കൽ ശസ്ത്രക്രിയയുടെ ഏറ്റവും വലിയ പ്രത്യേകത കൃത്യതയാണെന്ന് ആസ്റ്റർ മിംസ് ആശുപത്രിയിലെ ഓർത്തോപീഡിക്സ് വിഭാഗം മേധാവി ഡോ. മുഹമ്മദ് ഷബീർ ഖാസിം പറഞ്ഞു. ഇംപ്ലാന്റ് ഏറ്റവും അനുയോജ്യമായ സ്ഥാനത്ത് കൃത്യതയോടെ സ്ഥാപിക്കാൻ കഴിയുന്നതിനാൽ കൃത്രിമ സന്ധിയുടെ ആയുസ്സ് വർധിക്കുകയും പിന്നീട് ഉണ്ടാകാനിടയുള്ള തേയ്മാനം പരമാവധി കുറയുകയും ചെയ്യും. ഇത് സന്ധികളുടെ ചലനം കൂടുതൽ സുഗമമാക്കുന്നു. ശസ്ത്രക്രിയയ്ക്കുശേഷമുള്ള വേദനയും രക്തസ്രാവും കുറയുന്നതിനൊപ്പം അതിവേഗം സാധാരണ ജീവിതത്തിലേക്ക് മടങ്ങാനും സാധിക്കും.

സാധാരണ ശസ്ത്രക്രിയകളെ അപേക്ഷിച്ച് രോഗിക്ക് പെട്ടെന്ന് എഴുന്നേറ്റ് നടക്കാൻ ഈ സാങ്കേതികവിദ്യ സഹായിക്കുന്നു. കിടപ്പ് രോഗികൾക്ക് ഈ ചികിത്സ നടത്തിയിട്ട് കാര്യമില്ലെന്നും, എന്നാൽ 85 വയസുള്ള ആരോഗ്യമുള്ള ഒരു സ്ത്രീക്ക് ഈ ശസ്‌ത്രക്രിയയിലൂടെ വലിയ മാറ്റം ഉണ്ടാക്കാൻ കഴിഞ്ഞുവെന്നും ഡോക്ടർ വിശദീകരിച്ചു. ആശുപത്രിയിൽ നടത്തിയ ആദ്യ ശസ്ത്രക്രിയയിൽ തന്നെ രോഗിക്ക് ശസ്ത്രക്രിയ കഴിഞ്ഞ് നാലാം മണിക്കൂറിൽ എഴുന്നേറ്റ് നടക്കാൻ കഴിഞ്ഞത് ഈ സംവിധാനത്തിന്റെ വലിയ വിജയത്തിന് തെളിവാണെന്നും അദ്ദേഹം കൂട്ടിച്ചേർത്തു.

സങ്കീർണ്ണ രോഗികൾക്കും വലിയ ആശ്വാസം

കടുത്ത സന്ധിവാതം, കാൽമുട്ടിന്റെ തേയ്മാനം, സങ്കീർണ്ണമായ വൈകല്യങ്ങൾ എന്നിവ കാരണം വർഷങ്ങളായി കഠിനവേദന അനുഭവിക്കുന്ന രോഗികൾക്ക് ഈ റോബോട്ടിക് സാങ്കേതികവിദ്യ ഏറെ പ്രയോജനകരമാകും. ഓരോ രോഗിയുടെയും സവിശേഷമായ ശരീരഘടന കൃത്യമായി വിശകലനം ചെയ്ത് ശസ്ത്രക്രിയ ആസൂത്രണം ചെയ്യാൻ കഴിയുന്നതിനാൽ ചികിത്സാഫലം കൂടുതൽ മികച്ചതാകും.

പ്രാദേശികമായി ലോകോത്തര ചികിത്സ ഉറപ്പാക്കി ആസ്റ്റർ മിംസ്

ആധുനിക വൈദ്യശാസ്ത്രത്തിലെ ഏറ്റവും മികച്ച സാങ്കേതികവിദ്യകൾ കാസർകോട് മേഖലയിലെ ജനങ്ങൾക്ക് സ്വന്തം ജില്ലയിൽ തന്നെ ലഭ്യമാക്കുകയെന്നതാണ് ആശുപത്രിയുടെ ലക്ഷ്യമെന്ന് കാസർകോട് ആസ്റ്റർ മിംസ് സിഒഒ സുധീർ ബാസുരി പറഞ്ഞു. ഈ നേട്ടം ആശുപത്രിയുടെ ചികിത്സാ മികവിലെ സുപ്രധാന നാഴികക്കല്ലാണെന്നും അദ്ദേഹം വ്യക്തമാക്കി.

മേഖലയിലെ ജനങ്ങൾക്ക് വിദഗ്ധ പരിചരണവും നൂതന ചികിത്സാ സൗകര്യങ്ങളും ഉറപ്പാക്കുന്നതിൽ കാസർകോട് ആസ്റ്റർ മിംസ് ഹോസ്പിറ്റൽ വഹിക്കുന്ന നിർണ്ണായക പങ്ക് ഈ നേട്ടത്തോടെ ഒന്നുകൂടി വ്യക്തമാവുകയാണെന്ന് ആസ്റ്റർ മിംസ് മെഡിക്കൽ സൂപ്രണ്ട് ഡോ. സാജിദ് സലാഹുദ്ദീൻ പറഞ്ഞു. ഈ പുതിയ സംവിധാനത്തിന്റെ വരവോടെ സങ്കീർണ്ണമായ കാൽമുട്ട് മാറ്റിവെക്കൽ ശസ്ത്രക്രിയകൾക്കായി ഇനി രോഗികൾക്ക് കോഴിക്കോട്, മംഗളൂരു, ബെംഗളൂരു തുടങ്ങിയ നഗരങ്ങളിലേക്ക് ദൂരയാത്ര ചെയ്യേണ്ട സാഹചര്യം ഒഴിവാക്കാനാകുമെന്നും അദ്ദേഹം കൂട്ടിച്ചേർത്തു.

വരുംദിവസങ്ങളിലും കൂടുതൽ ആധുനിക ചികിത്സാ സൗകര്യങ്ങൾ മേഖലയിലെ ജനങ്ങൾക്ക് പ്രാദേശികമായി ലഭ്യമാക്കാനാണ് ആസ്റ്റർ മിംസ് ഹോസ്പിറ്റൽ മാനേജ്മെന്റ് ലക്ഷ്യമിടുന്നതെന്ന് അധികൃതർ വ്യക്തമാക്കി. കൂടുതൽ വിവരങ്ങൾക്കും സേവനങ്ങൾക്കുമായി +91 70345 34529 എന്ന നമ്പറിൽ ബന്ധപ്പെടാവുന്നതാണ്.

വിദഗ്ധ ഡോക്ടർമാരായ ഡോ. ദീക്ഷിത് ഷെട്ടി, ഡോ. അഭിരാം കൃഷ്ണൻ, ഡോ. അമീൻ ഗുൽഷൻ എന്നിവരും വാർത്താസമ്മേളനത്തിൽ പങ്കെടുത്തു 

ഈ ആരോഗ്യവാർത്ത നിങ്ങളുടെ സുഹൃത്തുക്കൾക്കും പങ്കുവെക്കുക. പുതിയ അപ്ഡേറ്റുകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമന്റായി രേഖപ്പെടുത്തുക.

Article Summary: Aster MIMS Kasaragod has successfully introduced the advanced CORI robotic technology for knee replacement surgeries, a first in the district. This cutting-edge method offers millimetre precision, reduced soft tissue damage, and faster recovery times compared to conventional surgery, allowing patients to walk within hours of the procedure.

#AsterMIMS #RoboticSurgery #KneeReplacement #KasaragodNews #HealthcareInnovation #Orthopedics #MedicalNews #AparnaNews