മംഗ്ളൂരിനെ ആശ്രയിക്കുന്ന ദുരവസ്ഥയ്ക്ക് പരിഹാരം; കാസർകോടിൻ്റെ ആരോഗ്യമേഖലയ്ക്ക് കരുത്തായി ആസ്റ്റർ മിംസ് ഒന്നാം വാർഷിക നിറവിൽ; പുതിയ ബ്ലോക്കുകളുടെ ഉദ്ഘാടനം ജില്ലാ പോലീസ് ചീഫ് നിർവഹിച്ചു

കാസർകോട്: (KasargodVartha) ആതുരശുശ്രൂഷാ രംഗത്ത് മികച്ച സേവനങ്ങളുമായി കാസർകോട് ആസ്റ്റർ മിംസ് ഒരു വർഷം പൂർത്തിയാക്കി. ആശുപത്രിയുടെ ഒന്നാം വാർഷികാഘോഷങ്ങളും പുതുതായി നിർമാണം പൂർത്തീകരിച്ച അഡ്മിൻ ബ്ലോക്ക്, ഫുഡ് കോർട്ട് എന്നിവയുടെ ഉദ്ഘാടനവും ജില്ലാ പോലീസ് ചീഫ് പി നിധിൻ രാജ് നിർവഹിച്ചു. കാസർകോട് ആസ്റ്റർ മിംസ് ചീഫ് ഓപ്പറേറ്റിങ് ഓഫീസർ സുധീർ ബാസുരി, വൈസ് പ്രസിഡൻ്റ് ആൻഡ് മെഡിക്കൽ ഡയറക്ടർ ഇന്ത്യ-1 ഡോ. കെഎം സൂരജ് , ചീഫ് ഓഫ് മെഡിക്കൽ സർവീസസ് ഡോ. സാജിദ് സലാഹുദ്ദീൻ എന്നിവർ ചടങ്ങിൽ മുഖ്യാതിഥികളായി പങ്കെടുത്തു.

അത്യാധുനിക ചികിത്സാ സൗകര്യങ്ങളും വിദഗ്ധ മെഡിക്കൽ സംഘത്തിൻ്റെ സേവനങ്ങളും ലഭ്യമാകുന്ന ഒരു മൾട്ടി സ്പെഷ്യാലിറ്റി ആശുപത്രി എന്ന കാസർകോട് മേഖലയിലെ ജനങ്ങളുടെ ദീർഘകാല സ്വപ്നമാണ് ആസ്റ്റർ മിംസ് ആരംഭിച്ചതോടെ സാക്ഷാത്കരിക്കപ്പെട്ടതെന്ന് വൈസ് പ്രസിഡൻ്റ്  ഡോ. കെഎം സൂരജ് പറഞ്ഞു.

മംഗ്ളൂരിനെ ആശ്രയിക്കുന്ന ദുരവസ്ഥയ്ക്ക് പരിഹാരം

വിദഗ്ധ ചികിത്സകൾക്കായി കാലാകാലങ്ങളായി അയൽ സംസ്ഥാനമായ കർണാടകയിലെ മംഗ്ളൂരിനെ ആശ്രയിച്ചിരുന്ന കാസർകോട്ടെയും സമീപപ്രദേശങ്ങളിലെയും ജനങ്ങൾക്ക് അത്യാഹിതഘട്ടങ്ങളിൽ സമ്പൂർണ ആരോഗ്യ പരിരക്ഷ ഒരുക്കാൻ കഴിയുന്ന ഒരു വിശ്വസ്തകേന്ദ്രമായി മാറാൻ ചുരുങ്ങിയ കാലം കൊണ്ട് തന്നെ ആസ്റ്റർ മിംസിന് സാധിച്ചതായി സിഒഒ സുധീർ ബാസൂരി പറഞ്ഞു.

ഹൃദ്രോഗം, വാഹനാപകടങ്ങൾ തുടങ്ങിയ ഗുരുതരമായ ആരോഗ്യപ്രശ്നങ്ങൾക്ക് ചികിത്സ തേടി അതിർത്തി കടന്ന് മംഗ്ളൂരിലേക്ക് പോകേണ്ടി വന്നിരുന്ന ദുരവസ്ഥയ്ക്കാണ് ഇതോടെ ഒരു പരിധി വരെ ശാശ്വത പരിഹാരമായത്. പ്രത്യേകിച്ചും ജീവൻ രക്ഷിക്കാൻ നിർണായകമായ സമയത്ത് ജില്ലയ്ക്കുള്ളിൽ തന്നെ ഉന്നത നിലവാരത്തിലുള്ള മെഡിക്കൽ സൗകര്യങ്ങൾ ലഭ്യമായത് സാധാരണക്കാർക്ക് വലിയ ആശ്വാസമാണ് നൽകുന്നതെന്നും അദ്ദേഹം കൂട്ടിച്ചേർത്തു.

2-ാം വർഷത്തിൽ കൂടുതൽ കരുതൽ

ആരോഗ്യമേഖലയിൽ കാസർകോട് ജില്ല നേരിടുന്ന നിരന്തരമായ വെല്ലുവിളികൾക്ക് പരിഹാരമായി അന്താരാഷ്ട്ര നിലവാരത്തിലുള്ള ചികിത്സാ സൗകര്യങ്ങൾ സാധാരണക്കാർക്ക് പ്രാപ്യമാക്കുക എന്നതാണ് കാസർകോട് ആസ്റ്റർ മിംസിൻ്റെ പ്രധാന ലക്ഷ്യമെന്ന് സിഒഎംഎസ് ഡോ. സാജിദ് സലാഹുദ്ദീൻ പറഞ്ഞു. 

എൻഡോസൾഫാൻ ദുരിതബാധിതർ ഉൾപ്പെടെയുള്ളവർ തിങ്ങിപ്പാർക്കുന്ന ജില്ലയിൽ, മികച്ച മെഡിക്കൽ സാങ്കേതികവിദ്യകളും വിദഗ്ധ ഡോക്ടർമാരുടെ സേവനവും താങ്ങാനാവുന്ന ചെലവിൽ ലഭ്യമാക്കാൻ ആശുപത്രി ശ്രദ്ധ കേന്ദ്രീകരിക്കുന്നുണ്ട്.

വിജയകരമായി രണ്ടാം വർഷത്തിലേക്ക് കടക്കുമ്പോൾ കൂടുതൽ മികവാർന്ന സേവനങ്ങളും നൂതന സൗകര്യങ്ങളും നാടിനായി സമർപ്പിക്കാനുള്ള തയ്യാറെടുപ്പിലാണ് ആശുപത്രിയെന്ന് അധികൃതർ  അറിയിച്ചു.

പ്രൗഡഗംഭീരമായ വാർഷിക ആഘോഷ ചടങ്ങിൽ ആശുപത്രിയിലെ വിവിധവകുപ്പ് മേധാവികളും ഡോക്ടർമാരും ജീവനക്കാരും പങ്കെടുത്തു.

ഈ ആരോഗ്യ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. കാസർകോട്ടെ ഏറ്റവും പുതിയ വാർത്തകളും വിവരങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Aster MIMS Kasaragod celebrated its first anniversary with the inauguration of a new admin block and food court by District Police Chief Nidhin Raj, highlighting its crucial role in providing advanced medical care and reducing the district's healthcare dependency on Mangaluru.

#KasargodVartha #AsterMIMSKasaragod #KasaragodNews #HealthcareKerala #MedicalNews #MalayalamNews #AparnaNews