അണഞ്ഞപ്പോഴും പ്രകാശമായി അർജുൻ; 23-കാരൻ്റെ ആന്തരികാവയവങ്ങൾ 4 പേർക്ക് പുതുജീവനേകി

കണ്ണൂർ: (KasargodVartha) വാഹനാപകടത്തിൽ പരിക്കേറ്റ് മസ്തിഷ്ക മരണം സംഭവിച്ച യുവാവിൻ്റെ ആന്തരികാവയവങ്ങൾ നാല് പേർക്ക് പുതുജീവനേകി. കണ്ണൂർ ശ്രീകണ്ഠാപുരം വളക്കൈ സ്വദേശിയായ 23-കാരൻ എം കെ അർജുൻ ആണ് തൻ്റെ ഹൃദയവും കരളും രണ്ട് വൃക്കകളും ദാനം ചെയ്ത് അവയവങ്ങൾ കാത്തുകഴിയുന്ന രോഗികൾക്ക് വലിയ പ്രതീക്ഷ നൽകിയത്.

നാല് പേർക്ക് പുതുജീവൻ

അർജുൻ്റെ ഹൃദയം തിങ്കളാഴ്ച രാവിലെ കണ്ണൂരിൽ നിന്നും എയർ ആംബുലൻസ് മാർഗ്ഗം കൊച്ചിയിലേക്ക് എത്തിച്ചു. കണ്ണൂർ ആസ്റ്റർ മിംസിൽ നിന്നും കൊച്ചി ആസ്റ്റർ മെഡ്സിറ്റിയിൽ ചികിത്സയിലുള്ള 48-കാരനായ മലപ്പുറം സ്വദേശിക്കാണ് ഹൃദയം മാറ്റിവെക്കുക. 

കരൾ കോഴിക്കോട് ബേബി മെമ്മോറിയൽ ആശുപത്രിയിലേക്കാണ് കൊണ്ടുപോയത്. വൃക്കകളിൽ ഒന്ന് കണ്ണൂർ ആസ്റ്റർ മിംസിലെ രോഗിക്കും, രണ്ടാമത്തെ വൃക്ക കോഴിക്കോട് ഗവൺമെൻ്റ് മെഡിക്കൽ കോളേജിലേക്കുമാണ് ചികിത്സയിലുള്ള രോഗികൾക്കായി നൽകുന്നത്.

അപകടം സംഭവിച്ചത് ഇങ്ങനെ

മെയ് 28-ന് ഉച്ചയ്ക്ക് രണ്ടരയോടെ ചെങ്ങളായി വളക്കൈയിലാണ് അപകടം നടന്നത്. വളക്കൈയിൽ നിന്നും കുറുമാത്തൂരിലേക്ക് പോവുകയായിരുന്ന അർജുൻ സഞ്ചരിച്ച ബൈക്കിൽ എതിരെ വന്ന പിക്കപ്പ് വാൻ കൂട്ടിയിടിക്കുകയായിരുന്നു. ഗുരുതരമായി പരിക്കേറ്റ യുവാവ് കണ്ണൂർ ആസ്റ്റർ മിംസ് ആശുപത്രിയിൽ ചികിത്സയിലിരിക്കെയാണ് മസ്തിഷ്ക മരണം സ്ഥിരീകരിച്ചത്.

കുടുംബം

വളക്കൈ മാടത്താനിക്കുന്നേൽ ഹൗസിൽ എം കെ ഗണേശൻ്റെയും തങ്കമണിയുടെയും മകനാണ് എം കെ അർജുൻ. ആര്യ സഹോദരിയാണ്. യുവാവിൻ്റെ അപ്രതീക്ഷിത വിയോഗത്തിൻ്റെ കടുത്ത ദുഃഖത്തിനിടയിലും അവയവങ്ങൾ ദാനം ചെയ്യാൻ കുടുംബം കാണിച്ച സന്നദ്ധത സമൂഹത്തിന് വലിയ മാതൃകയാവുകയാണ്.

മനുഷ്യത്വത്തിൻ്റെ വലിയ മാതൃകയായ ഈ വാർത്ത നിങ്ങളുടെ സുഹൃത്തുക്കൾക്കും ഗ്രൂപ്പുകളിലും ഷെയർ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: 23-year-old M K Arjun from Valakkai, Sreekandapuram, who suffered brain death following a road accident, will donate his heart, liver, and two kidneys to four different patients, with his heart being transported to Kochi via air ambulance.

#OrganDonation #AsterMIMS #KannurNews #KeralaNews #AirAmbulance #MalayalamNews #Sreekandapuram