അമീബിക് മസ്തിഷ്കജ്വരം: സംസ്ഥാനത്ത് മരണം അഞ്ചായി, ജാഗ്രതാ നിർദേശവുമായി ആരോഗ്യവകുപ്പ്

കാസർകോട്: (KasargodVartha) ജില്ലയിൽ അമീബിക് മസ്തിഷ്കജ്വരം കൂടുതലായി റിപ്പോർട്ട് ചെയ്യുന്നത് ആശങ്ക വർദ്ധിപ്പിക്കുന്നു. കഴിഞ്ഞദിവസം രാജപുരം പനത്തടി പഞ്ചായത്ത് പരിധിയിലാണ് പുതിയ രോഗം റിപ്പോർട്ട് ചെയ്യപ്പെട്ടത്. രോഗി ഇപ്പോൾ കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലാണ്. പുഴയിലോ കുളത്തിലോ കുളിച്ചതാകാം രോഗം ബാധിച്ചതെന്നാണ് ആരോഗ്യവകുപ്പിന്റെ പ്രാഥമിക നിഗമനം.

കോഴിക്കോട് മെഡിക്കൽ കോളേജിൽ ചികിത്സയിലായിരുന്ന മലപ്പുറം വണ്ടൂർ സ്വദേശിനിയായ ഒരു സ്ത്രീ കഴിഞ്ഞദിവസം മരണത്തിന് കീഴടങ്ങിയതോടെ അമീബിക് മസ്തിഷ്കജ്വരം ബാധിച്ച് സംസ്ഥാനത്ത് മരിച്ചവരുടെ എണ്ണം അഞ്ചായി ഉയർന്നു. 

രോഗം ബാധിച്ച രണ്ട് കുട്ടികൾ ഉൾപ്പെടെ 12 പേർ ഇപ്പോഴും ചികിത്സയിലുണ്ട്. മനുഷ്യരിൽനിന്ന് മനുഷ്യരിലേക്ക് പകരാത്ത ഈ അസുഖം കുളിക്കടവുകൾ കേന്ദ്രീകരിച്ചാണ് റിപ്പോർട്ട് ചെയ്യപ്പെടുന്നതെന്ന് ആരോഗ്യവകുപ്പ് പറയുന്നു.

മലബാറിലെ നാല് ജില്ലകളിലാണ് അമീബിക് മസ്തിഷ്കജ്വരം കൂടുന്നതായി റിപ്പോർട്ട് ചെയ്യപ്പെടുന്നത്. കാസർകോടിനു പുറമെ കോഴിക്കോട്, മലപ്പുറം, വയനാട് ജില്ലകളിലായി എട്ടു പേർക്കാണ് രോഗം സ്ഥിരീകരിച്ചിട്ടുള്ളത്. കെട്ടിക്കിടക്കുന്ന വെള്ളത്തിൽ മുങ്ങി കുളിക്കുന്നവരിലും നീന്തുന്നവരിലും വളരെ അപൂർവമായി ഉണ്ടാകുന്ന രോഗബാധയാണ് അമീബിക് മസ്തിഷ്കജ്വരമെന്ന് ആരോഗ്യവകുപ്പ് പറയുന്നു. ഇതിനെതിരെ ജാഗ്രത പാലിക്കണമെന്നാണ് ആരോഗ്യവകുപ്പിന്റെ നിർദേശം.

ആഴ്ചയിൽ ഒരിക്കലെങ്കിലും വെള്ളം പൂർണമായും ഒഴുക്കിക്കളയുന്ന നീന്തൽക്കുളങ്ങളിൽ മാത്രമേ കുളിക്കാൻ പാടുള്ളൂ. സ്വിമ്മിങ് പൂളിന്റെ വശങ്ങളും തറയും ബ്രഷ് ഉപയോഗിച്ച് കഴുകണം. പുതുതായി നിറയ്ക്കുന്ന വെള്ളം ക്ലോറിനേറ്റ് ചെയ്തശേഷം ഉപയോഗിക്കണം തുടങ്ങിയ നിർദേശങ്ങളും ആരോഗ്യവകുപ്പ് മുന്നോട്ടുവെക്കുന്നുണ്ട്.

അമീബിക് മസ്തിഷ്കജ്വരം തലച്ചോറിനെയാണ് ബാധിക്കുകയെന്ന് ആരോഗ്യവകുപ്പ് അധികൃതർ പറയുന്നു. രോഗം പിടിപെട്ടയാളിൽ 97 ശതമാനത്തിലധികം മരണനിരക്കുള്ള രോഗമാണിത്. വെള്ളത്തിലിറങ്ങുമ്പോൾ അടിത്തട്ടിലെ ചെളിയിലുള്ള അമീബ വെള്ളത്തിൽ കലരുകയും മൂക്കിലൂടെ ശരീരത്തിൽ പ്രവേശിക്കുകയും ചെയ്യും. പിന്നീട് രോഗലക്ഷണങ്ങൾ കണ്ടുതുടങ്ങും. 

രോഗലക്ഷണങ്ങൾ എന്താണെന്നറിയാതെ സ്വയംചികിത്സ ചെയ്യുന്നത് രോഗം മൂർഛിക്കാൻ കാരണമാകുമെന്നാണ് ആരോഗ്യവകുപ്പ് നൽകുന്ന സൂചന. തീവ്രമായ തലവേദന, ഓക്കാനം, പനി, ഛർദി, കഴുത്ത് തിരിക്കാൻ ബുദ്ധിമുട്ട്, വെളിച്ചത്തിലേക്ക് നോക്കാനുള്ള ബുദ്ധിമുട്ട് തുടങ്ങിയവയാണ് പ്രാഥമിക രോഗലക്ഷണങ്ങൾ. അതിനാൽ, രോഗലക്ഷണങ്ങൾ പ്രകടമായാൽ എത്രയും വേഗം ചികിത്സ ലഭ്യമാക്കണമെന്നാണ് ആരോഗ്യവകുപ്പിന്റെ നിർദേശം.

അമീബിക് മസ്തിഷ്കജ്വരത്തെക്കുറിച്ചുള്ള ഈ മുന്നറിയിപ്പ് മറ്റുള്ളവരിലേക്കും ഷെയർ ചെയ്യൂ, നിങ്ങളുടെ അഭിപ്രായം കമൻ്റ് ചെയ്യൂ.

Article Summary: Amoebic meningoencephalitis death toll rises in Kerala; Health department issues warnings.

#AmoebicMeningoencephalitis #KeralaHealth #HealthWarning #PublicHealth #Kasaragod #Malappuram